ဘယ်လိုစိတ်ထားနဲ့ မေတ္တာပွားမယ်
ဘုရားရှင်ကိုယ်တော်မြတ်ကြီးက မေတ္တာပွားများရသူတို့ ရှိရမည့် အင်္ဂါရပ်များနဲ့ ပွားများပုံပွားများနည်းစံနစ်တို့ကို ဟောကြားတော်မူပြီးနောက်မှာ ဘယ်လိုစိတ်ထားနဲ့ မေတ္တာပွားရမယ်ဆိုတာကို ထပ်မံဟောပြတော်မူလို၍
မာတာ ယထာ နိယံ ပုတ္တမာယုသာ ဧကပုတ္တမနုရက္ခေ။
ဧဝမ္ပိ သဗ္ဗဘူတေသု၊ မာနသံ ဘာဝယေ အပရိမာဏံ-
“မိခင်ရင်းဟာ မိမိကိုယ်တိုင် ၀မ်းနဲ့ ကိုးလလွယ် ဆယ်လဖွားခဲ့ရတဲ့ တစ်ဦးတည်းသော သားကလေးကို သက်ရှည် ကျန်းမာ ဘေးရန်ကွာဖို့ သေချာဂရုတစိုက် ပြုစုစောင့်ရှောက်သလို သတ္တဝါအားလုံးတို့အပေါ်မှာလည်း ဒီအနှိုင်းမဲ့မေတ္တာမျိုးနဲ့ အကျိုးလိုလား မေတ္တာပွားရမယ်”
ဆိုပြီး ဆက်လက်ဟောကြားတော်မူလိုက်ပြန်ပါတယ်။
“ဒါဆိုရင် မိခင်များရဲ့ သူ့သားသမီးများအပေါ်ဖြစ်တဲ့ ချစ်ခြင်းမျိုးက မေတ္တာအစစ်လား”လို့ မေးစရာရှိလာပြန်ပါတယ်။ ချစ်ခင်မှုတိုင်းတော့ မေတ္တာစစ်မဟုတ်ပါဘူး။ အတ္တကိုယ်ကျိုးမပါ တစ်ဖက်သား ကျန်းမာချမ်းသာစေလို ကြီးပွားတိုးတက်စေလိုတဲ့စိတ်ကောင်းသက်သက်သာ မေတ္တာလို့ ဆိုရမှာပါ။ သားသမီးကိုမျက်စိအောက်ကတောင် အပျောက်မခံနိုင်ပဲ အရိပ်တကြည့်ကြည့်နဲ့ အဖြစ်သည်းနေကြတဲ့ အချစ်မျိုးကတော့ ဂေဟဿိတ ၊ တဏှာပေမ အကုသိုလ်အချစ်မျိုးဖြစ်ပြီး အဲဒီ တဏှာချစ်စိတ်နသာ ဘ၀ဆုံးသွားရင် ထိုသားသမီးများကိုယ်မှာ ပိုးမွှားများ သန်းများ စသည်ဖြစ်ပြီး တွယ်ကပ်နေရတဲ့ဘ၀မျိုး ၊သားသမီးများမွေးထားတဲ့ အချစ်တော်ခွေးကြောင်ဘ၀မျိုးနဲ့ မခွဲနိုင်မခွါရက်ဖြစ်နေကြရမယ့် အခြေနေမှာရှိပါတယ်။
မေတ္တာဆိုတာ ဘာပါလိမ့်
မေတ္တာဆိုတာက “ မိဇ္ဇတိ သိနိယှတီတိ မေတ္တာ- ချစ်ခင်စိုစွပ် စေးကပ်တတ်သောကြောင့် မေတ္တာလို့ခေါ်တယ် ၊ ပိယမနာပဖြစ်သော သတ္တ၀ါပညတ်ကိုအာရုံပြုတယ် ၊
မေတ္တာကား သတ္တ၀ါတို့အပေါ်မှာ စိုစိုဖတ်ဖတ် စေးကပ်လျှက် အာရုံပြုတယ် ဒါပေမယ့် ဆန့်ကျင်ဖက် ဒေါသကတော့ စိုစိုဖတ်ဖတ်မရှိ ခြောက်ကပ်ကပ်အာရုံပြုတယ်။ ဒီလိုအကြောင်းကိုမတွေးပဲ မနေနိုင်လို့သာ တွေးနေ မကြည့်ပဲ အနေနိုင်လို့သာ အပြစ်မြင်တဲ့မျက်လုံးနဲ့ စိုက်ကြည့်နေပေမယ့် မေတ္တာလိုတစ်ဖက်သားနဲ့ တစ်သားထဲကျနေတာမဟုတ်ဘဲ တွန်းကန်နေတဲ့သဘောကိုဆောင်ပါသတဲ့။
"ဒါဆိုရင်ဘုရား တဏှာပေမအချစ်မျိုးလည်း ချစ်ခင်သူအပေါ်၌ စေးကပ်စိုစွပ်လျှက် အာရုံပြုတာပါပဲ ကပ်ငြိလွန်းလို့ မခွဲနိုင်မခွါရက်ဖြစ်နေရတာမဟုတ်ပါလား”လို့ မေးစရာဖြစ်လာပြန်ပါတယ်။
မေတ္တာရဲ့ တစ်ဖက်သားနဲ့တစ်သားတည်းကျမှုက လိုက်လျောညီထွေ အတူပေါင်းသင်းဆက်ဆံနိုင်ခြင်း အကျိုးလိုလားခြင်းကိုသာဆိုလိုတာပါ။ မေတ္တာအစစ်ဆိုတာ ကုသိုလ်ကြိယာတစ်မျိုးမျိုးနဲ့သာ ယှဉ်တဲ့သဘောတရားမို့ မိမိစိတ်အလိုလောဘနောက်လိုက်ကာ မခွဲနိုင်မခွါရက်တဲ့သဘောမျိုးမပါပါဘူး။ မိမိရှေ့မှာချမ်းသာစွာတွေ့မြင်နေရပြန်တော့လည်း ကြည်နူးရသလို မိမိရဲ့ အဝေးမှာရှိနေပြန်ရင်လည်း သောကတွေ စိုးရိမ်ခြင်းတွေဖြစ်မလာပဲ ကျန်းမာချမ်းသာစေလိုတဲ့သဘောမျိုးမျှသာဖြစ်ပါတယ်။ ဒါ့ကြောင့် မခွဲနိုင်မခွါရက်ဖြစ်နေကြတဲ့ သားမယားချစ် ၊ဆွေမျိုးချစ်စသော သံယောဇဉ်မကင်းသော ချစ်ခြင်းများ၌ မေတ္တာစစ်မဟုတ် တဏှာပေမ ကိလေသာချစ်မျှသာလို့ မှတ်ရမှာပါ။
ဒါ့ကြောင့်မို့ သားချစ်မယားချစ် ဆွေမျိုးချစ်စသည်ဖြင့် ချစ်အပ်သူအပေါ်မှာလည်း အကျိုးလိုလားတဲ့အခါ မေတ္တာစစ်စစ် ၊ မိမိဆန္ဒအလိုလိုက်ကာ မခွဲနိုင်မခွါရက်ဖြစ်တာက ကိလေသာလို့ ခွဲခြားနားလည်ဖို့ လိုပါလိမ့်မယ်။
သဂြိင်္ုဟ်ဘာသာဋီကာ နှာ(၆၄၉)မှာ ဘာသာဋီကာဆရာတော်ဘုရားကြီးက
“ခွဲသာခွါသာ အကျိုးစီးပွားကိုလိုလားသော မေတ္တာသဘောကား အစစ်တည်း ၊ထို့ကြောင့် မေတ္တာဘာဝနာကိုပွားများရာ၌ ဒေါသတည်းဟူသော အဝေးရန်သူ မေတ္တာအတုတည်းဟူသော အနီးရန်သူ ဤနှစ်ပါးကို ရှောင်ရှားပွားများရသည်..လို့ ရေးသားတော်မူခဲ့တာဖြစ်ပါတယ်။
မေတ္တာတရားရဲ့ အဘိဓမ္မာတရားကိုယ်
အဒေါသကိုပင် သတ္တ၀ါပညတ်ကိုအာရုံပြု၍ ကြည်လင်အေးမြစွာဖြစ်နေသောအခါ အပ္ပမညာဗြဟ္မ၀ိဟာရ၌ပါသော မေတ္တာ လို့ဆိုရပါတယ် ။ ဒါ့ကြောင့် မေတ္တာာစစ်မေတ္တာစစ်မှန်သမျှ တရားကိုယ်မှာ အဒေါသစေတသိက်ဖြစ်ပါတယ် ဒါပေမယ့် အဒေါသတိုင်း မေတ္တာမဟုတ်သေးဘူးနော် ၊ သတ္တ၀ါပညတ်ကိုအာရုံမပြုဘဲ ဘုရားဖူး တရားနာစသော အခြားကုသိုလ်အရာ၌ အဒေါသသဘောသက်သက်သာ ဖြစ်ပါတယ်။
မေတ္တာတိုင်းညာဏ်နဲ့မယှဉ်(ညာဏ၀ိပ္ပယုတ်မေတ္တာမျိုးလည်းရှိ)
တစ်ချို့ကလည်း ညာဏ်ရှိသူမှ မေတ္တာစိတ်ဖြစ်နိုင်တာ မေတ္တာဟာ ညာဏ်နဲ့ယှဉ်တယ်လို့ယူဆပြောဆိုနေကြတာလည်း တွေ့ရဖူးပါတယ်။ ညာဏ်နဲ့ယှဉ်တဲ့မေတ္တာရှိသလို ညာဏ်မပါတဲ့ အကျိုးလိုလားမှုသက်သက်မေတ္တာလည်းရှိတာမို့ ထိုအဆိုဟာ အပြည့်အ၀မမှန်ပါဘူး။
မေတ္တာဆိုတာ သောဘနသာဓာရဏ (ညာဏသမ္ပယုတ်/၀ိပ္ပယုတ်)
ကုသိုလ်ဖြစ်တိုင်းပါဝင်ဖြစ်ပေါ်တဲ့ အဒေါသစေတသိက်မျှသာဖြစ်လို့
သတ္တ၀ါပညတ်ကိုအာရုံပြုပြီး အကျိုးလိုလားတဲ့ ညာဏ၀ိပ္ပယုတ်မှာယှဉ်တဲ့ အဒေါသလည်းမေတ္တာစစ်ပါပဲလို့ ဆိုပါရစေ ။ အကျယ်ကို (သဂြိင်္ုဟ်ဘာသာဋီကာ နှာ ၁၄၁)မှာ ဆက်လက်လေ့လာနိုင်ကြပါတယ်။
၅၂၈-သွယ်မေတ္တာ လား ၁၅၀၀-မေတ္တာလား
လူတော်တော်များများပြောနေကြတဲ့စကားဖြစ်ပါတယ်။ တစ်ဦးနဲ့တစ်ဦး မခွဲနိုင်မခွါရက်ဖြစ်ကြတဲ့အခါ ၊ တို့က ၅၂၈-မောင်ချစ်နှမချစ်မဟုတ်ဘူး /၁၅၀၀-မေတ္တာစစ်နဲ့ချစ်ကြတာပါ..တဲ့ မိမိငယ်စဉ်ကလည်း ထောင့်ငါးရာဆိုတော့ ငါးရာ့နှစ်ဆယ့်ရှစ်ထက် ၉၇၂ -ကြီးများတောင်ပိုချစ်တာပေါ့ တကယ်အချစ်ကြီးတဲ့ အချစ်စစ်သမားလို့ တွေးမိခဲ့ဖူးပါတယ်။ တကယ်တော့ မေတ္တာစစ်နဲ့ ကိလေသာချစ်ကို ခွဲနားမလည်လို့ ရောထွေးပြောဆိုနေမိကြတာဖြစ်ပါတယ် ၊ ယင်းနှစ်မျိုးကို ကွဲကွဲပြားပြားသိနားလည်ဖို့လည်း တွက်နည်းလေးတွေ ဖော်ပြပေးလိုက်ပါတယ်
၅၂၈-သွယ်မေတ္တာတွက်ပုံ
ပဋိသမ္ဘိဒါမဂ်လာ အနောဓိသောမေတ္တာဖရဏာ (၅)နည်း၊ သြဓိသောမေတ္တာဖရဏာ(၇)နည်းအားဖြင့် ပေါင်းပုဂ္ဂိုလ်(၁၂)ယောက်ကို
အဝေရာ ဟေန္တု ၊ အဗျာပဇ္ဇာ ဟောန္တု ၊ အနီဃာ ဟောန္တု ၊ သုခီ အတ္တာနံ ပရိဟန္တု ဆိုိတဲ့ မေတ္တာပွားများပုံ စိတ်ထားလေးမျိုးနဲ့ မြှောက်ပွားပါက (၄၈)မျိုးဖြစ်ပါတယ်။
ထို(၄၈)မျိုးကို အရပ်ဆယ်မျက်နှာနှင့်မြှောက်ပွားပြန်လျှင် (၄၈၀)ဖြစ်လာပါတယ်။ ယင်း(၄၈၀)ကို မူလ (၄၈)နှင့်ပြန်ပေါင်းသော် =၅၂၈ သွယ်မေတ္တာဖြစ်လာပါတယ်။
ငါးရာနှစ်ဆယ်ရှစ်သွယ်မေတ္တာ ဆောင်ပုဒ်
နောဓိ ပဉ္စ ၊ သြ သတ္တဖြင့် ၊ ဒွါဒသဟု ပုဂ္ဂိုလ်စုကို န္တုလေးဖြာ မြှောက်ဆင့်ပါမူ ရှစ်ဖြာလေးဆယ် ဂဏန်းကြွယ်၏။ ရပ်ဆယ်ဖြင့်လှောက် ထပ်ဆင့်မြှောက်၍ မှတ်လောက်ပွားက လွန်များလှသည်
ငါးရာ့နှစ်ဆယ့်ရှစ်စွန်းစွန်းတည်း ။
………………………………
ထောင့်ငါးရာမေတ္တာ(ကိလေသာ ၁၅၀၀ )တွက်ပုံ
စိတ်အားလုံးကို တစ်မျိုးတည်းယူ၍ စေတသိက် ၅၂-ပါးနဲ့ပေါင်းလျှင် နာမ်တေပညာသ(၅၃)ပါးရပါတယ်။ နိပ္ဖန္နရုပ်(၁၈)ပါး လက္ခဏာရုပ်(၄)ပါးနဲ့ ထပ်ပေါင်းလျှင် =၇၅
ပါးဖြစ်လာပါတယ် ။ မိမိအဇ္ဈတ္တသန္တာန်မှာဖြစ်တဲ့ (၇၅)ပါးနဲ့ သူတစ်ပါးတို့သန္တာန်မှာဖြစ်တဲ့ (၇၅)ပါးပေါင်းလျှင် =၁၅၀ ဖြစ်ပါတယ်။ ထို(၁၅၀)သော အာရုံတရားတွေကို ကိလေသာ(၁၀)ပါးနဲ့မြှောက်လိုက်ရင် ကိလေသာတစ်ထောင့်ငါးရာဖြစ်လာပါတယ်။
ကိလေသာဆယ်ပါးမှာ အခြားသော ဒေါသမောဟမာန်မာနစတာတွေလည်းပါဝင်ပြီး အာရုံကလည်း များစွာကွဲပြားသွားတာကြောင့် ဘယ်လိုမှ လူတစ်ယောက်နဲ့တစ်ယောက် လင်ချစ်မယားချစ်ကြရာမှာ တစ်ထောင့်ငါးရာကိလေသာနဲ့ချစ်ကြဖို့ဆိုတာ ဘယ်လိုမှမဖြစ်နိုင်ပါဘူး။
ဒီတစ်ထောင့်ငါးရာသော ကိလေသာထဲမှာ ပါဝင်နေတဲ့ လောဘကိုရည်ရွယ်ပြီးသာ တစ်ထောင့်ငါးရာမေတ္တာလို့ ဆိုနေကြတာပါ။ တကယ်တန်းတော့ မေတ္တာလို့သုံးနှုံးနေကြတာကိုက အတူပြု အတုပြုတဲ့သဘောမျှသာဖြစ်လို့မမှန်ကန်ပါဘူး ။ အပါယ်သွားမယ့် ကိလေသာသက်သက်မျှသာဖြစ်ပါတယ်။
တစ်ထောင့်ငါးရာ ကိလေသာတွက်ဖို့ ဆောင်ပုဒ်
နာမ်တေပညံ၊ ရုပ်နိပ္ဖန်၊ လက္ခဏံရုပ်လေး။
သန္တာန်နှစ်ဝ၊ မြှောက်ဆင့်က၊ တစ်ရာ့ငါးဆယ်ရေး။
ဆယ်ကိလေသာ မြှောက်ဆင့်ကာ၊ ငါးရာတစ်ထောင်တွေး။
(အခြေပြုသဂြိင်္ုဟ် နှာ ၄၁၉)
XXXXXXXXXXXXXXXXXXXXXXXXXXXX
ဒီလောက်ဆို မေတ္တာပွားများမည့်သူရဲ့ မိခင်ရင်းကဲ့သို့ သတ္တ၀ါတွေပေါ် မေတ္တာထားရပုံ ၊ ၅၂၈-သွယ်မေတ္တာ ရေတွက်ပုံနဲ့ ၁၅၀၀ ကိလေသာ ရေတွက်ပုံများကို သဘောပေါက်လောက်ပြီထင်ပါတယ်။
မိမိရဲ့သားအရင်းအပေါ်မေတ္တာစစ်ထက်လွန်ကာ ကိလေသာချစ်နဲ့ချစ်မိလို့ ဒုက္ခရောက်ခဲ့ရတဲ့ ဘုရားလက်ထက်က အမျိုးသမီးတစ်ဦးအကြောင်းကိုလည်း ဗဟုသုတဖြစ်ဖွယ် ဆက်လက်တင်ပြပေးပါဦးမယ်။
ကျန်းမာချမ်းသာကြပါစေ (လင်္ကာအရှင်-မုံရွာ)
……………………..
No comments:
Post a Comment