*သလ္လဟုက၀ုတ္တိ၊ ပေါ့ပါးလွယ်ကူတဲ့ အသက်မွေးမှုရှိရမယ်*
ဘုရားရှင်က “အတောင်ရှိသော ငှက်သည် ၀န်အပိုမပါ မိမိလိုရာခရီးကို အတောင်ပံတစ်စုံကိုသာ သယ်ဆောင် ပျံသန်းသကဲ့သို့ ရဟန်းဆိုတာ ကိုယ်ကို မျှတစေနိုင်ရုံသော သင်္ကန်းသုံးထည် ဝမ်းကို မျှတစေနိုင်ရုံ ဆွမ်းမျှနဲ့သာ နေထိုင်သီတင်းသုံးနိုင်တယ်၊
သွားလေရာရာ ပရိက္ခရာရှစ်ပါးကိုသာ ဆောင်ယူသွားလေ့ရှိတယ်”…လို့ ဒီဃနိကာယ်လာ သာမညဖလသုတ်တော်မှာ ဟောကြားတော်မူခဲ့ပါတယ်။ဒါ့ကြောင့် မိမိတို့ ရဟန်းတော်များရော သံသရာဝဋ်ဒုက္ခကလွယ်လွက်ကူကူလွတ်မြောက်ချင်ကြသူ ယောဂီသူတော်စဉ်များပါ လွယ်ကူပေါ့ပါးတဲ့အသက်မွေးမှုရှိကြဖို့လိုပါတယ်။ တစ်ဘ၀လုံးမပြောနဲ့ ဟိုနားဒီနားသွားတာတောင်မှ ခန္ဓာကိုယ်အသုံးအဆောင်ပစ္စည်းများစွာသယ်ပိုးပြီး သွားလာနေကြရတာကိုက ဘယ်လောက်ဒုက္ခရောက်ကြတယ်ဆိုတာ သေချာတွေးကြည့်ရင် နားလည်ပါလိမ့်မယ်။
ဘုရားရှင်ကတော့ ရဟန်းတော်များကိုလည်းရှာဖွေစုဆောင်းပြီး ရရသမျှ သိုမှီးသိမ်းဆည်းနေတဲ့ ကြွက်လိုမကျင့်ကြဖို့နဲ့ ၊ လွယ်ကူပေါ့ပါးစွာလိုရာကို ပျံသန်းနိုင်ကြတဲ့ ငှက်လိုရဟန်းတော်မျိုးဖြစ်အောင် နေထိုင်ကြရမည်လို့ ဆုံးမသြ၀ါဒပေးတော်မူခဲ့မြဲဖြစ်ပါတယ်။
သင်္ကန်းပရိက္ခရာများ ကြွယ်ဝချမ်းသာသောရဟန်းတစ်ပါးအား ဘုရားဆုံးမခဲ့ရပုံ
ဓမ္မပဒအဋ္ဌကထာလာ ဗဟုဘဏ္ဍိကဘိက္ခုဝတ္ထုမှာဥစ္စာဘဏ္ဍာများတဲ့ရဟန်းကို ဘုရားဆုံးမခဲ့ရပုံကိုဖော်ပြထားပါတယ်။ သာဝတ္ထိမြို့သား သူကြွတစ်ယောက်ဟာ သူချစ်လှတဲ့ ဇနီးချောကလေးသေဆုံးသွားတော့
ယူကျုံးမရဖြစ်ပြီး စိတ်ဖြေဆည်ရာရှာမယ်ဆိုပြီး ရဟန်းပြုလာတာပေါ့။
သဒ္ဓါပဗ္ဗဇိတလည်းမဟုတ် နေတုန်းနေခိုက် ကောင်းကောင်းမွန်မွန်လည်းမနေနိုင်တော့ ဘုရားရှင်က သပိတ်တစ်လုံး သင်္ကန်းသုံးထည်နဲ့ ငှက်တစ်ကောင်ကဲ့သို့ ပေါ့ပေါ့ပါးပါး သွားလာနေထိုင်ရမယ်လို့ ညွှန်ကြားထားပါလျှက်
မိမိကိုယ်တိုင်စီမံပြီး ကိုယ်ပိုင်ကျောင်း ကိုယ်ပိုင်ဝိုင်းနဲ့နေထိုင်ပါသတဲ့။ စားချင်တာစားလို့ရအောင် စတိုခန်းအပြည့်လည်း ဆီဦးတွေထောပတ်တွေ စတုမဓုတွေအပြည့်ထည့်ထားဆိုပဲ ၊ နောက်ပြီး မိမိလူ့ဘ၀တုန်းကကျွန်တွေကို
အလုပ်အကျွေးအဖြစ်ခေါ်ထားပြီး ကောင်းပေ့ဆိုတဲ့ ဟင်းတွေဆွမ်းတွေချက်ပြုတ်စေပြီး ကျောင်းမှာပဲဘုဉ်းပေးနေတယ် ဆွမ်းခံလည်းမကြွဘူးပေါ့။
ဒီလိုနဲ့ ဆရာတော်ဦးချမ်းသာ ဦးချမ်းသာနဲ့နာမည်ကျော်ကြားလာတယ်၊ သူကညဉ့်အခါမှ ၀တ်ဖို့သင်္ကန်းတစ်စုံ ၊နေ့အခါမှဝတ်ဖို့သင်္ကန်းတစ်စုံပုံစံနဲ့ သင်္ကန်းတွေကိုလည်း ထည်လဲဝတ်နေတာပေါ့။
တစ်နေ့တော့ ရဟန်းတော်များက သူ့ကျောင်းဝင်းအတွင်းလှည့်လည်ကြည့်ရှုကြရင်း သင်္ကန်းများစွာကို လျှောက်ဖွတ်လှမ်းထားတာတွေ့ရတယ် ။
"ဟ ဘယ်လိုပါလိမ့် ဒီကျောင်းတိုက်မှာ သံဃာတစ်ပါးထဲသီတင်းသုံးတယ်လည်းဆိုသေး သင်္ကန်းတွေလျှော်လှမ်းထားလိုက်တာကလည်း သင်္ကန်းဆိုးဆိုင်အလားနည်းတာမဟုတ်ဘူး ။ဘယ်သူ့ဟာတွေပါလိမ့်"
လို့ပြောဆိုကြတော့ ။
အဲဒီသူဋ္ဌေးရဟန်းက ဂုဏ်ယူဝင့်ကြွားစွာ ပြောလိုက်တယ် "ဘယ်သူ့သင်္ကန်းတွေရှိရဦးမှာလည်းကိုယ်တော်တို့ အကုန်လုံးတပည့်တော်သင်္ကန်းချည်းပဲ။ နေ့ဝတ်ဖို့တစ်စုံ ည၀တ်ဖို့တစ်စုံ ခရီးသွားလမ်းသွားဝတ်ဖို့ တစ်စုံ အစုံစုံပေါ့ဘုရာ"….
ဒီတင် သံဃာတော်တွေအားလုံး ပြိုင်တူသဘောပေါက်သွားကြတယ်။" ဒီရဟန်းဟာ ကြွက်ရဟန်းပဲ ။ဘုရားရှင်ကငှက်တစ်ကောင်လို အတောင်ပံဝန်သာဆောင်ပါလို့ပြောထားပါရက်နဲ့ ။ ခုဟာကဘဏ္ဍာကျီကျတွေနဲ့စုဆောင်းထားလိုက်တာ ဘယ်လိုလုပ်လောဘကို
ချုပ်တည်းနိုင်တော့မှာလဲ ။လောဘအလိုဆိုးနောက်လိုက်လာကြရင် နောင်လာနောက်သားရဟန်းများပါ အတုယူမှားကြတော့မှာပဲ”ဟုပြောဆိုကြကာ ။ထိုရဟန်းကို ဘုရားရှင်ထံမှောက် ခေါ်ဆောင်လာကြပြီး အကြောင်းစုံလျှောက်ထားလိုက်ကြပါတယ်။
ဒါနဲ့ဘုရားရှင်က “ချစ်သား မင်းမှာ သင်္ကန်းဘဏ္ဍာပရိက္ခရာတွေအများကြီးသိုမှီးသိမ်းဆည်းထားတယ်ဆိုတာ မှန်သလား”လို့မေးတော့ ဟုတ်မှန်ကြောင်းပြန်လျှောက်ထားရတာပေါ့။ ဒီတော့မှ ဘုရားရှင်က ချစ်သား ရဟန်းဆိုိတာ ပေါ့ပါးလွယ်ကူတဲ့အသက်မွေးမှုရှိရမယ်။ ငါဘုရားရှင်က အလိုနည်းမှုရောင့်ရဲမှုရဲ့ ဂုဏ်ကျေးဇူးများကို ဟောကြားဆုံးမနေပါလျှက် ဘာလို့ဒီလို သင်္ကန်းပရိက္ခရာဘဏ္ဍာများစွာစုဆောင်းသိမ်းဆည်းထားရပါသလဲ”လို့ ဆုံးမသြ၀ါဒပေးတာပေါ့။
ဒီလောက်လေးပဲ ပြောဆိုဆုံးမရကာ ရှိသေးတယ် အဲဒီသူဋ္ဌေးရဟန်းက သူ့ကိုရဟန်းပရိတ်သတ်အလည်လူပရိတ်သတ်အလည်မှာ အရှက်ခွဲရကောင်းလားဆိုပြီး ဘုရားရှင်အပေါ်မှာ စိတ်ဆိုးဒေါသဖြစ်သွားပါသတဲ့ ။ဒီတော့ သူက ဘာလုပ်လိုက်တယ်မှတ်သလဲ ၊
ဝတ်ထားတဲ့ အပေါ်ရုံသင်္ကန်းကြီးကိုချွတ်ချလိုက်ပြီး အောက်ဝတ်သင်းပိုင်လေးမျှသာရှိသော ကိုယ်ဖြင့်
ဘုရားရှင်ရှေ့မှာ မတ်တပ်ရပ်ပြလိုက်ပါသတဲ့။
ဒီတော့မှ ဘေးကသံဃပရိတ်သတ် လူပရိတ်သတ်တွေကလည်း ဟာ ဒီရဟန်းနှယ် ဘုရားစကားကိုထော်လော်ကန့်လန့်တိုက်ပြီး မရှက်မဲ့စွာ မရိုမသေပြုနေပါလားလို့ အုတ်သော်သောင်းနင်း ကဲ့ရဲ့ပြစ်တင်ကြတော့တာပေါ့။
ဘုရားရှင်ကိုယ်တော်မြတ်က "အိုရဟန်း ရှေးအခါကာလတစ်ခုတုန်းက ဟီရိသြတ္တပ္ပဆိုတဲ့လောကပါလတရားနှစ်ပါးကို သိလိုရှာမှီးလို၍ ဆယ့်နှစ်နှစ်ကြအောင်ပင် ရှာဖွေစူးစမ်းခဲ့သူဖြစ်ပါလျှက် ယခုမူကား ပရိတ်သတ်လေးပါးနဲ့ ငါဘုရား၏ရှေ့မှောက်မှာပင် အရှက်မဲ့စွာ အ၀တ်မပါ ဗလာကိုယ်ထီးနေရဘိသနည်း"ဟု မိန့်တော်မူလိုက်မှ အရှက်တရားနဲ့ သတိပြန်ဝင်လာကာ သင်္ကန်းကိုပြန်လည်ဝတ်ရုံလျှက် ရှိခိုးကာ ပြန်ထိုင်နေပါသတဲ့။
ရဟန်းတော်များကလည်း ဘယ်အခါတုန်းက ဒီရဟန်းက ဆယ့်နှစ်နှစ်တိုင်တိုင်လောကပါလတရားနှစ်ပါးကိုရှာဖွေခဲ့ဖူးပါသလဲဘုရားဟု လျှောက်ကြားရာမှ အတိတ်ဇာတ်ကိုပြန်လည်ဟောပြတော်မူခဲ့ရပါတယ်။
.....................................................
* ဒေ၀ဓမ္မကိုရှာဖွေသူနှင့် ဟောပြသူ*
ဗာရာဏသီမင်းကြီးရဲ့ မိဖုရားခေါင်ကြီးဝမ်းမှာ ဘုရားအလောင်းတော်ပဋိသန္ဓေယူပြီး ဖွားမြင်လာတော့ မဟိံသကုမာရ လို့နာမည်ပေးလိုက်ပြီး နောက်ထားဖွားမြင်လာတဲ့ သားငယ်ကိုလည်း စန္ဒကုမာရလို့ နာမည်ပေးလိုက်ပါတယ်။ ဒါပေမယ့် ကံဆိုးစွာနဲ့ပဲ စန္ဒကုမာရမင်းသားလေးဖွားအပြီးမှာ ဘုရားအလောင်းတော်မင်းသားရဲ့ မယ်တော်ဟာ ကံတော်ကုန်ခဲ့ပါတယ်။
နောက်ထပ်တက်လာတဲ့ နန်းမတော်မိဖုရားမှာလည်း သားတော်တစ်ပါးဖွားမြင်ပြန်ရာ သူရိယကုမာရလို့နာမည်ပေးလိုက်ပြီး မင်းကြီးက မိဖုရားအသစ်လေးအား လိုရာဆုတောင်းစေပါတယ်။
ဒါပေမယ့် မိဖုရားအသစ်က ပညာကြွယ်တယ် မင်းကြီးဆုကိုဆိုင်းငံ့ထားစေပြီး လိုအပ်တဲ့အခါကျမှယူပါမည် ၊မင်းကြီးသာ မင်းမှာသစ္စာဆိုတဲ့အတိုင်း ပြောပြီးသားစကားကို သစ္စာတည်ခိုင်မြဲပါစေလို့ ချည်နှောင်ထားလိုက်သတဲ့။
သူရိယကုမာရမင်းသားလေးအရွယ်ရောက်လာပြီ ဆိုတဲ့အခါမှာတော့ မိဖုရားအသစ်က သူဆိုင်းငံ့ထားတဲ့ ဆုတော်ကိုထုတ်ဖော်တောင်းလာပါပြီ ။ သားငယ်လေးကိုထီးနန်းအရိုက်အရာလွှဲပေးရမယ်ဆိုတဲ့ ဆုပါတဲ့။
ဒါပေမယ့် မင်းကြီးကလုံးဝငြင်းပယ်ပါတယ်။
"မဖြစ်နိုင်ဘူးမိဖုရားကြီး ထီးမွေနန်းလျာဆိုတာ သားကြီးသြရသကိုသာပေးရတဲ့ ဓမ္မတာဖြစ်တယ် သူမရှိတော့ရင်တောင် အလတ်ကောင် စန္ဒကုမာရကျန်သေးတယ် ၊အသင်မိဖုရားသားက အငယ်ဆုံးဘယ်လိုမှမပေးနိုင်ဘူး"လို့ အပြတ်ငြင်းလိုက်တယ်။
ဒါပေမယ့် မိဖုရားအသစ်က သူ့နည်းပရိယာယ်တွေနဲ့ သားကြီးနှစ်ပါးကို အပြတ်ရှင်းမယ်ဆိုတဲ့သတင်းတွေထွက်လာတာကြောင်း ဘုရင်ကြီးက သားတော်နှစ်ပါးကိုခေါ်ပြီး အကျိုးကြောင်းပြောပြတယ်။ ဖခင်ကြီးအသက်ထင်ရှားရှိစေစဉ် ဘေးအန္တရာယ်ကင်းတဲ့ တစ်နေရာရာမှာ သွားဇာတ်မြှပ်နေပြီး ဖခင်ကြီးနတ်ရွာစံမှသာ ပြန်လာပြီး မင်းလုပ်အုပ်ချုပ်ဖို့ပေါ့။
ဒါနဲ့ ဘုရားအလောင်း မဟိံသကုမာရနဲ့ ညီငယ်စန္ဒကုမာရတို့ ထီးနန်းကခွါဖို့ ပြင်ဆင်ကြတာပေါ့။
ဒီလိုအစ်ကိုကြီးနှစ်ပါး တောတွင်းမှာသွားရောက်တော့မယ်ကြားတော့ ညီအငယ်ဆုံးသူရိယကုမာရလည်း လိုက်လာတယ်။ မလိုက်ခဲ့ဖို့ရန်ပြောလည်း ညီနောင်သုံးဖော်မခွဲနိုင်ဘူးလုပ်နေတာကိုး။ ဒါနဲ့ဘုရားလောင်းလည်းလိုက်ခွင့်ပေးပြီး ညီနောင်သုံးဦးခရီးနှင်ခဲ့ကြရာ ဟိမ၀န္တာတောကြီးတစ်နေရာရောက်တော့ ခရီးတစ်ထောက်နားကြရင် ညီအငယ်ဆုံးသူရိယကုမာရကို ရေအရှာလွှတ်လိုက်တယ်။
ဒါနဲ့ အနီးနားကရေအိုင်ကြီးထဲရေဆင်းခပ်တာပေါ့။ ဒါပေမယ့် အဲဒီရေအိုင်ကြီးက ဘီလူးတစ်ကောင်စောင့်ပြီး ဆင်းလာတဲ့လူတွေကိုဖမ်းပြီး ဒေ၀ဓမ္မဆိုတာဘာလဲလို့ မေးတယ် မသိရင် စားတာပဲ။ သူကဝေဿ၀ဏ်နတ်မင်းကြီးရဲ့ အလုပ်ကျွေးဖြစ်ခဲ့လို့ ဒီအခွင့်ရေးရတာ ဒေ၀ဒမ္မတရားကိုိမသိပဲ ရေကန်ထဲဆင်းရေခပ်တဲ့သူတော့ သေပြီသာမှတ်ပေါ့။
ရေခပ်နေတုန်း ဘွားဆို ရေစောင့်ဘီလူးကြီးပေါ်လာပြီး ဆွဲဖမ်းလိုက်တယ်။ နောက်ပြီးမေးတော့တာပဲ ။ဒေ၀ဓမ္မဆိုတာဘာလဲလို့ ။ ဒီတော့ သူရိယကုမာရပြန်ဖြေလိုက်တာက ဒေ၀ဒမ္မုဆိုတာ နေနဲ့လပါ တဲ့။ သူ့အတွေးထဲတော့ နေနဲ့လဆိုတာ ကောင်းကင်မှာရှိတာမို့ ဒေ၀ဓမ္မဖြစ်မယ်ပေါ့ ။ ဘီလူးကြိးလည်းသဘောကျသွားတယ် စားစရာလူတစ်ယောက်တော့ရပြီဆိုပြီး သူ့ဗိမာန်ထဲမှာ ဖမ်းဆီးထားလိုက်တယ်။
သူရိယကုမာရမင်းသားသွားရေခပ်တာ ကြာတယ်ညီငယ်မင်းလိုက်သွားကွာ ဆိုပြီး စန္ဒကုမာရကိုလွှတ်လိုက်ပြန်တော့ သူ့ညီအငယ်ဆုံးသူရိယကုမာရရေကန်ထဲဆင်းသွားတဲ့ခြေရာတွေ့တာနဲ့ ဒါရေခပ်ရင်းရေနစ်တာနေမှာပဲဆိုပြီး မစူးမစမ်းရေထဲငုတ်စမ်းမှပဲဆိုပြီး ခုန်ချလိုက်တာ ဘီလူးကြီးကဖမ်းသွားပါလေရော ။နောက် ဒေ၀ဓမ္မကိုမေးပြန်တော့လည်း အရပ်လေးမျက်နှာဟာ ဒေ၀ဓမ္မပါလို့ ထင်ရာဖြေချလိုက်လို့ သူ့ကိုလည်း ညီအငယ်ဆုံးကိုဖမ်းထားတဲ့ အချုပ်ခန်းထဲပစ်ထည့်ထားလိုက်သတဲ့။
ဘုရားအလောင်း မဟိံသကုမာရမင်းသားကြီးလည်း ဒီညီငယ်နှစ်ယောက်ရေသွားခပ်တာ ကြာလိုက်တာ ဘာအန္တရာယ်တွေများရှိလို့ပါလိမ့်လို့ လိုက်ရှာတော့မှာ ရေကန်ကြီးထဲဆင်းသွားတဲ့ ညီငယ်နှစ်ယောက်ရဲ့ ခြေရာကိုသာတွေ့ရပြီး ပြန်တက်လာတဲ့ခြေရာကိုမတွေ့ရဘူးဖြစ်နေတယ် ။
ဒီတင်ဘုရားလောင်းကသိလိုက်ပါတယ် ။ ဧကန္တတော့ ရေစောင့်ဘီလူးက ငါ့ညီငယ်နှစ်ယောက်ကိုဖမ်းထားပြီလို့။ ဒါနဲ့ ဓားသန်လျှက် ဒူးလေးတို့ကိုအသင့်ပြင်ပြီး ရေကန်ကြီးကိုစောင့်ကြည့်နေတယ်။ ပေါ်လာလို့ကတော့ ပစ်မယ်ထင်ပါတယ်။
ရေစောင့်ဘီလူးကလည်း ဘုရားလောင်းအခြေနေကိုစောင့်ကြည့်နေတယ် ရေကန်ထဲဆင်းလာလို့ကတော့ သူ့ပိုင်နက်ဆိုတော့ စားမယ်ပေါ့ ခုတော့ဘုရားလောင်းကလည်းမဆင်းဘူး။ ဒါနဲ့ တောထဲထင်းခွေလာတဲ့လူယောင်ဆောင်ပြီး သူ့အနားရောက်လာကာ "အမောင် ရေကန်ကြီးကရေတွေလည်းကြည်လင်အေးမြပါတယ် ။ပဒုမ္မာကြာပန်းတွေကလည်း လှမှလှ ရေလည်းချိုးပါ ကြာပန်းတွေလည်း ချိုးယူပန်ဆင်ပါ”လို့ပြောသတဲ့။
ဒီတင် ဘုရားလောင်းက" သင်သည် ဒီရေကန်ကိုစောင့်တဲ့ ရေစောင့်ဘီလူးဖြစ်ရမယ်။ ဘာ့ကြောင့် ငါ့ညီငယ်နှစ်ယောက်ကို ဖမ်းဆီးထားရသလဲ "ဆိုတော့ ဘီလူးက
"မှန်ပါတယ် ငါကရေစောင့်ဘီလူးပဲ ဒေ၀ဓမ္မကိုမသိပဲ ငါ့ရေကန်ထဲဆင်းလာသူမည်သူမဆို ငါစားခွင့်ရှိတယ်"လို့ ပြန်ပြောလိုက်သတဲ့။
အသင်ဘီလူးက ဒေ၀ဓမ္မတရားနှစ်ပါးကို ဘာလို့သိချင်ရတာလဲ သိလို့ကော အကျိုးရှိပါသလားဆိုတော့ အကျိုးရှိကြောင်း ဒီဒေ၀ဓမ္မတရားနှစ်ပါးကိုဟောပြနိုင်သူကို ရှာဖွေခဲ့သည်မှာ ဆယ့်နှစ်နှစ်တိုင်တိုင်ကြာညောင်းခဲ့ပြီဖြစ်ကြောင်း ပြန်ပြောပြတာပေါ့။
ဒီတင်ဘုရားလောင်းက ဘီလူးကြီးအားဒေ၀ဓမ္မတရားကိုဟောကြားပေးလိုက်ပါတယ်။
''ဟိရိသြတ္တပ္ပသမ္ပန္နာ၊ သုက္ကဓမ္မသမာဟိတာ။
သန္တော သပ္ပုရိသာ လောကေ၊ ဒေဝဓမ္မာတိ ဝုစ္စရေ''လို့
မကောင်းမှုမှ ရှက်ခြင်း၊ကြောက်ခြင်းဆိုတဲ့ ဟီရိသြတ္တပ္ပ တရားနှစ်ပါးကို ဒေ၀ဓမ္မလို့ခေါ်ဆိုကြောင်းဟောပြလိုက်တာပေါ့။
ဒီတင် ဘီလူးကြီးက သဘောကျသွားပြီး "အိုပညာရှိ ငါသည် သင့်တရားဓမ္မကိုသဘောကျလို့ ငါစားမယ့်သင့်ညီနှစ်ယောက်ထဲက တစ်ယောက်ကိုငါပြန်လည်ပူဇော်တဲ့အနေနဲ့ပေးမယ့် အလိုရှိတဲ့ညီကိုယူလော့"လို့ပြောပါသတဲ့။
ဒီတင်ဘုရားလောင်းက "ညီအငယ်ဆုံး သူရိယကုမာရကိုသာ" ပေးပါလို့တောင်းဆိုလိုက်တယ်။
ဘီလူးကြီးက ဘုရားလောင်းကို သင်ဟာ ဒေ၀ဓမ္မကိုသိရုံသာသိပြီး အကျင့်မပါတဲ့သူပဲ တကယ်ဆို ဇေဋ္ဌပစာယီ ဆိုတဲ့တရားအရ ကြီးသူကိုသာအလေးဂရုပြုပြီး ကယ်ထုတ်သင့်သည်မဟုတ်ပါလော..ဟုကဲ့ရဲ့စောဒနာလုပ်နေပြန်သဖြင့်
အိုဘီလူးကြီး ငါတို့ညီအစ်ကိုနှစ်ယောက်တို့သည် ဒီညီအငယ်ဆုံးကိုအကြောင်းပြုပြီး ဒီတောတွင်းဝင်ခဲ့ကြရာက ညီအငယ်ဆုံးပါလိုက်လာခဲ့ခြင်းဖြစ်တယ်။ အကယ်၍သာ ငါတို့ညီအစ်ကိုအရင်းနှစ်ယောက်ပဲ နေပြည်တော်ပြန်သွားခဲ့ပါက ။ ဘီလူးဖမ်းစားသည်ကို မည်သူမျှယုံကြည်ကြမည်မဟုတ်ပေ။ ငါတို့ညီအစ်ကိုနှစ်ဦးက တောတွင်းတွင်လုပ်ကြံသတ်ဖြတ်ပစ်လိုက်သည်ဟုသာ မှတ်ယူကြပေလိမ့်မည်။ ထို့ကြောင့် တိုင်းသားပြည်သူအားလုံးအထင်မြင်လွဲမည်မှ ကြောက်သောကြောင့်သာ ညီအငယ်ဆုံးကို တောင်းဆိုရခြင်းဖြစ်ပါတယ်လို့ ပြန်လည်ရှင်းပြရတာပေါ့။
ဘီလူးကြီးလည်း ဒီတော့မှ ဘုရားအလောင်းတော်ရဲ့စိတ်ထားကိုသဘောကျသွားပြီး ညီငယ်နှစ်ယောက်လုံးကိုပြန်လွှတ်ပေးလိုက်ပါတယ်။ ဖခင်ကြီးကံတော်ကုန်တယ်ကြားသောအခါ ဘုရားအလောင်းတော်သားကြီး မဟိံသကုမာရက မင်းလုပ်၍ ညီအလတ်စန္ဒကုမာရကို အိမ်ရှေ့စံရာထူးပေးသနားပြီး ညီအငယ်ဆုံးသူရိယကုမာရကိုတော့ စစ်သူကြီးနေရာထားလိုက်ပြီး တိုင်းပြည်ကိုအေးချမ်းသာယာစွာအားထုတ်သွားကြပါတယ်။ ဘီလူးကြီးကိုလည်း ငါးပါးသီလတရားဟောကြားပြီး နတ်ကွန်းတစ်ခုဆောက်လုပ်ပေးကာ တိုင်းသားပြည်သူတို့အားပူဇော်ပသစေပါသတဲ့။
ထိုအကြောင်းအတ္ထုပ္ပတ်ကိုပြန်လည်ဟောပြတော်မူကာ ဒီရဟန်းဟာ ဟိုရှေးယခင်က ဟီရိသြတ္တပ္ပဆိုတဲ့ ဒေ၀ဓမ္မတရားနှစ်ပါးကို လိုက်လံရှာဖွေစူးစမ်းခဲ့ပါလျှက် ယခုငါဘုရားနှင့် ပရိတ်သတ်လေးပါးမျက်မှောက်၌ ကိုယ်မှအ၀တ်ကိုချွတ်ကာ အရှက်မဲ့ပြုခဲ့ပြန်တယ်ဟု ဟောပြောဆုံးမတော်မူကာ …
''န နဂ္ဂစရိယာ န ဇဋာ န ပင်္ကာ၊ နာနာသကာ ထဏ္ဍိလသာယိကာ ဝါ။
ရဇောဇလ္လံ ဥက္ကုဋိကပ္ပဓာနံ၊ သောဓေန္တိ မစ္စံ အဝိတိဏ္ဏကင်္ခ''
*လောဘတဏှာကို ပယ်ခွါမည်ဟုဆိုတာ အ၀တ်မ၀တ်ဘဲ ကိုယ်လုံးတီး ကျင့်ခြင်း
*လှပမူကို ပယ်ခွါက မပြင်ဆင်တော့ဟုဆိုကာ ဆံမရိတ်တော့ဘဲ ဆံကျစ်ထုံးခြင်း
*ခန္ဓကိုယ်ဟာ ရွံစရာဖြစ်မှ တဏှာကိုပစ်ပယ်နိုင်သည်ဆိုတာ ရွှံ့ညွန် အလိမ်းလိမ်းကပ်၍ ကျင့်ခြင်း
*ရသတဏှာကို ပယ်ခွါနိုင်မှ တရားရမည်ဆိုကာ အစာဖြတ်၍ အငတ်ခံကျင့်ခြင်း
*မြင့်သောနေရာ မြတ်သောနေရာများကား တဏှာပွားစေသည်ဆိုတာ မြေ၌အိပ်၍ နေခြင်း
*ရေချိုးခြင်းဖြင့် တပ်မက်မှုကိုတိုးပွားစေသည်ဆိုတာ မြူမှုန်အလိမ်းလိမ်း တင်စေလျှက် ကျင့်ခြင်း
*ဒုက္ခကို သည်းခံမည်ဟုဆိုတာ ဆောင့်ကြောင့်ထိုင်၍ ကျင့်ခြင်းတို့သည်
ဝိစိကိစ္ဆာမှ မလွတ်မြောက်သေးသော သတ္တ၀ါကို မစင်ကြယ်စေနိုင်ကုန်…လို့ဟောကြားတော်မူလိုက်ပါတယ်။
ဆိုလိုရင်းမှာ ဘုရားရှင်က ဥစ္စာများသောရဟန်းတော်ကို အလိုနည်းဖို့ဆုံးမရာ ထိုရဟန်းက ဒါဆို ဂျိမ်းကိုယ်တော်ကြီးများလို ကိုလုံးတီးနေကာ တဏှာကိုပယ်ခွါတော့မည် ဟုပြန်လည်လျှောက်ထားသဖြင့်
"အလိုနည်းသည်ဟုဆိုတာ ကိုလုံးတည်းနေပါက ဟိရီသြတ္တပ္ပမရှိ ပတ်ဝန်းကျင်ကို မရိုသေမလေးစား အရေးမထားသူသာဖြစ်သဖြင့် လွဲမှားစွာချိုးခြံခြင်းသည်လည်း တရားထူးရမည်မဟုတ်ပေ" ဟု ဆိုလိုရင်းဖြစ်ပေသည်။
ထိုအဆုံးမသြ၀ါဒတရားဆုံးသောအခါ တရားနာပရိတ်သတ်များစွာ တရားသဘောကို ကောင်းစွာနားလည်သွားကာ လမ်းမှန်ရောက်ခဲ့ကြရလေတော့သည်။(သောတာပန်ဖြစ်သွားကြသည်ဟူလို)
ထိုသို့ အဆုံးမသြ၀ါဒပေးလိုက်မှ ထိုရဟန်းတော်လည်း သပိတ်တစ်လုံးသင်္ကန်းသုံးထည်မျှဖြင့် ပေါ့ပါးလွတ်လပ်စွာ သာသနာဘောင်မှာ ဆက်လက်သီတင်းသုံးသွားခဲ့ပါသတဲ့။
……………………………………..
*သီဟိုဠ်ကျွန်းက ပေါ့ပါးလွတ်လတ်သော အသက်မွေးမှုရှိတဲ့ ရဟန်းတစ်ပါး*
သီရိလင်္ကာနိုင်ငံ အနုရာဓပုရမြို့မှ သူငယ်ချင်းနှစ်ယောက်တို့ဟာ ထူပါရုံကျောင်းတိုက်ကြီးမှာ ရဟန်းအတူပြုကြပါတယ်။ ဒါပေမယ့် တစ်ပါးကတော့ ပါစိနခဏ္ဍရာဇ် မည်သော အရပ်သို့ ကြွရောက်သီတင်းသုံးပြီး တစ်ပါးကတော့ ထူပါရုံကျောင်းတိုက်ကြီးမှာပဲ သီတင်းသုံးနေထိုင်ခဲ့ပါသတဲ့။
ဆယ်နှစ်မျှကြာသောအခါ ပါစိနခဏ္ဍအရပ်မှာ သီတင်းသုံးတဲ့ သူငယ်ချင်းက ယခုငါနေထိုင်တဲ့နေရာလေးက ရေမိုးမီးပြည့်စုံတယ် ။ တရားဘာဝနာပွားများအားထုတ်လိုသူများအဖို့ သင့်တဲ့နေရာလေးပဲ ထူပါရုံကသူငယ်ချင်းကိုပါဒီမှာလာနေဖို့ သွားခေါ်ဦးမှာပဲ” အကြံဖြစ်မိသတဲ့ ။
ဒါနဲ့ သူငယ်ချင်းကိုခေါ်မယ်ဆိုပြီး ထူပါရုံပြန်သွားတာပေါ့ ၊ထူပါရုံရောက်တော့ သူ့သူငယ်ချင်းကတွေးမိတယ် ။ငါ့သူငယ်ချင်းက ဒီမှာပဲ ဆယ်နှစ်ဆယ်မိုးလုံးနေလာခဲ့တော့ တပည့်တကာတကာမတွေတော့ ပေါ်မှာပဲ ။အာဂန္တုတစ်ပါးကြွလာတယ်ဆိုရင် ညနေသုံးဆောင်ဖို့ စတုမဓုတို့ ကြံသကာတို့ထန်းလျှက်တို့ လာပို့တန်ကောင်းရဲ့လို့ တွေးလိုက်မိသတဲ့။
ဒါပေမယ့် ဘယ်တကာတစ်ယောက်မှလည်း သူ့ထံမှောက်အလှူအတန်းရောက်လာကြတာမတွေ့ရဘူး။ အခန်းအတွင်းဟိုဟိုဒီဒီလှည့်ပတ်ကြည့်တော့လည်း စားစရာထန်းလျှက်တစ်လုံးမျှမမြင်ရဘူးတဲ့။ ညအိပ်ချိန်ရောက်လို့ သာ ရေသောက်ဗိုက်မှောက်ပြီး ကျိန်းဖို့ပြင်လိုက်ရတယ်။
အာဂန္တုကိုယ်တော်က မျှော်လင့်ချက်တော့ မကုန်သေးပါဘူး အိပ်ယာဝင်ရင်းစဉ်းစားလိုက်တယ် မနက်လင်းရင်တော့ ငါ့မိတ်ဆွေထံ ယာဂုတွေမုန့်တွေ ခဲဖွယ်တွေလာလှူတန်ကောင်းရဲ့ အဲဒီကျမှပဲ ဘုဉ်းရတော့တာပေါ့လေ လို့တွေးပြီး အိပ်ယာဝင်ခဲ့ရတာပေါ့။
မနက်လင်းတာနဲ့ အလှု့တကာတွေတကာမတွေများလာပို့နိုးပို့နိုးနဲ့ မျှော်နေလိုက်တာ ဆွမ်းခံချိန်ရောက်လို့ သူငယ်ချင်းကမြို့တွင်းဆွမ်းခံကြွရအောင်လို့ လာခေါ်လို့သာလိုက်ခဲ့ရတယ် ဘယ်သူတစ်ယောက်မှလာမလှူဘူး။
ဒီတင်သူစဉ်းစားမိတယ် …အင်း ငါ့သူငယ်ချင်းတကာတွေက ကျောင်းလာမပို့ပဲ အိမ်ကြွလာမှ ဆွမ်းခဲဖွယ်ဘောဇဉ်တွေ ပြင်ဆင်ကပ်ကြထင်ပါရဲ့။ သူ့တကာတွေကပ်မှပဲ ဆွမ်းဘုဉ်းရတော့မှာပလေလို့ စဉ်းစားရင်း ဆွမ်းခံလိုက်ခဲ့ရာ
ရပ်ကွက်ထဲက ဥပါသိကာမကြီးတစ်ဦးလောင်းလှူလိုက်တဲ့ တစ်မှုတ်မျှသော ယာဂုကိုရ၍ ဆွမ်းစားဇရပ်၌ ထိုင်ပြီးလျှင်သောက်ကြရတယ်။ ဒီယာဂုလေးကို ဆွမ်းစားဇရပ်ကြွဘုဉ်းကြရင်း တောအရပ်မှာသီတင်းသုံးတဲ့ကိုယ်တော်က မအောင့်အီးနိုင်တော့ပဲ မေးလိုက်တယ်။
" အရှင်ဘုရားနှယ် ဆယ်နှစ်ဆယ်ဝါလုံးလုံး ဒီလိုရရသမျှလေးနဲ့ပဲ ဒီမှာသတင်းသုံးနေသလား"လို့
…ဒီတော့ ထူပါရုံမှာနေတဲ့ကိုယ်တော်ကလည်း "မှန်ပါ ၊ဒီလိုပဲ ရတာလေးနဲ့တင်းတိမ်ရတာပေါ့ဘုရား"လို့ပြန်လျှောက်တာပေါ့။
"ဒါဆိုအရှင်ဘုရား ဒီမှာဆက်သီတင်းမသုံးနေပါနဲ့ဘုရား ဆွမ်းကွမ်းပင်ပန်းလှပါတယ်။ တပည့်တော်နေတဲ့ ပါစိနခဏ္ဍရာဇိ အရပ်ကမှ ရေမိုးမီးပြည့်စုံတယ် ဆွမ်းကွမ်းမပင်မပန်းရနိုင်ပါတယ် အဲဒီကိုသွားကြရအောင်"လို့ ပြောသတဲ့ ။
ဒီတင် ထူပါရှုံမှာနေတဲ့ကိုယ်တော်က ဒါဆိုလည်းအဲဒီသွားကြတာပေါ့ဘုရားဟုဆိုကာ ကျောင်းမပြန်တော့ပဲ ပါစိနခဏ္ဍအရပ်ကို တန်းကြွပါတော့တယ်။ အာဂန္တုသူငယ်ချင်းကိုယ်တော်ကတော့ ကျောင်းပြန်တာမှတ်တာပေါ့ နောက်တော့မှ
မြို့ပြင်လမ်းသွားနေတာတွေ့တော့
"ဟိုး ဟိုး နေပါဦး ဆရာတော် ခုကျောင်းမကြွသေးပဲ ဘယ်ဆက်ကြွဦးမှာလဲ"လို့လျှောက်ထားလိုက်တော့မှ
"အရှင်ဘုရားပဲ ပါစိနခဏ္ဍအရပ်ကိုကြွကြမယ်ဆို"
"မှန်ပါ ဟုတ်တယ်လေ ဒါပေမယ့် အရှင်ဘုရားမှာ သယ်ယူထုပ်ပိုးရမယ့် ပစ္စည်းတွေရှိတယ်လေ လိုအပ်တဲ့အသုံးအဆောင်လေးဘာလေးတော့ ယူဦးမှပေါ့။ နောက်ကျောင်းအခန်းကိုလည်း သိုမှီးစရာရှိတာ သိုမှီရဦးမှာမလား"
"အရှင်ဘုရားကလည်း တပည့်တော်မှာ ယခုလက်ထဲကသပိတ်တစ်လုံးနဲ့ ၀တ်ထားတဲ့သင်္ကန်းသုံးထည်ကလွဲလို့ ဘာအပိုပစ္စည်းတစ်စုံတစ်ခုမှ ကိုယ်ပိုင်မရှိပါဘူးဘုရား။ အခန်းထဲမှာလည်း ဘာပစ္စည်းတစ်စုံတစ်ခုမှ စုဆောင်းသိမ်းဆည်းထားတာမရှိပါဘူး။ ဒါ့ကြောင့် တခါတည်းသာ အရှင်ဘုရားနေထိုင်တဲ့ ပါစိနခဏ္ဍတောအရပ်ကို တန်းကြွလို့ရပါတယ်"
" ဟာ"… ဒီတင်တောကကြွလာတဲ့ အာဂန္တုကိုယ်တော်မှာ ထူပါရုံကသူငယ်ချင်းရဲ့ ကျင့်ဝတ်နဲ့အညီနေထိုင်နိုင်မှု ချိုးခြံချွေတာမှု တကာတကာမလာဘ်လာဘမမငြိကပ်မှု၊ ငှက်တစ်ကောင်ကဲ့သို့ ပေါ့ပါးလျှင်မြန်စွာ လိုရာခရီးသွားနိုင်မှုတို့ကို မျက်ဝါးထင်ထင်တွေ့မြင်ပြီး ကြည်ညိုလေးစားသွားမိပါသတဲ့။
ဒီတင်သူကလျှောက်ထားလိုက်တယ်။
''အရှင်ဘုရားမှာ ဘာပစ္စည်းမှယူစရာမရှိပေမယ့် တပည့်တော်မှာမူ ခရီးဆောင်တောင်ဝှေး(တုတ်ကောက်)တစ်ချောင်း ,ခြေနယ်ဆီလိမ်းကြံဖို့ ဆီကျည်တောက်တစ်ခု, ဖိနပ်ထည့်စရာ ဘိနပ်အိတ်တစ်လုံး အရှင်ဘုရားနေတဲ့အဆောင်မှ ထားခဲ့တယ်ဘုရား အဲဒါလေးသွားယူချင်ပါသေးတယ်။
ထိုအခါ အာဝါသိက သူငယ်ချင်းရဟန်းက
'သြော် ငါ့ရှင်နှယ် တစ်ရက်တာလေးတည်းခိုသီတင်းသုံးတဲ့ကျောင်းမှာတောင် ဒီပစ္စည်းပေါင်းစုံကို သိုမှီသိမ်းဆည်းထားခဲ့သေးသကိုး ရဟန်းဆိုတာ မိမိကြွသွားလိုရာကို မငြိမကပ်ကြွသွားနိုင်ဖို့ အပိုဝန်မထားရဘူး။ သပိတ်တစ်လုံးသင်္ကန်းသုံးထည်မျှဆို လုံလောက်နေပါပြိ ငါ့ရှင်”
အာဂန္တုမထေရ်လည်း ထိုအခါမှ ထူပါရုံမှာ သီတင်းသုံးနေထိုင်နေတဲ့ အရှင်ဟာ လူပုံအလည်မှာနေပေမယ့် လူတို့နဲ့မငြိကပ်ပုံ၊ အပိုဆာလာတစ်စုံတစ်ရာမထားပဲ သပိတ်တစ်လုံးသင်္ကန်းသုံးထည်ဖြင့်သာ လူသူများအကြား မထင်ရှားအောင် ခြိုးခြံသေ၀ပ်စွာ သီတင်းသုံးနေပုံတို့ကို မျက်ဝါးထင်ထင်တွေ့မြင်ရသည်ဖြစ်၍ ကြည်ညိုသွားပြီး ထိုင်ကန်တော့ပါတော့တယ်။
'' အရှင်ဘုရားကဲ့သို့သော ပုဂ္ဂိုလ်တို့အား အလုံးစုံသောအရပ်တို့၌ (မည်သည့် နေရာ၌ မဆို) တော၌ နေသည်သာ မည်ပါတယ်၊
ထူပါရုံစေတီသည် လေးဆူသော မြတ်စွာဘုရားတို့၏ ပရိဘောဂ ဓာတ်တော်များနှင့် သရီရဓာတ်တော်များကို ဌာပနာရာအရပ်ဖြစ်ပါတယ်ဘုရား၊
ကြေးပြာသာဒ်၌ သင့်လျော်သော တရားတော်များကို နာကြားခြင်း, မဟာစေတီကို ဖူးမြော်ခြင်း, မထေရ်တို့ကို ဖူးမြော်ခြင်းများကိုလည်း ရနိုင်ရာဌာနဖြစ်ပါတယ်၊
မြတ်စွာဘုရား ပွင့်တော်မူသော အခါကဲ့သို့ ဖြစ်ပါပေသည်၊ ဤအရပ်၌ပင် အရှင်ဘုရားတို့ သီတင်းသုံးတော်မူကြပါကုန်''ဟုလျှောက်ထားက သူတစ်ပါးထဲပဲ ပါစိနခဏ္ဍအရပ်သို့ ပြန်ကြွသွားပါတော့တယ်။
(၀ိသုဒ္ဓိမဂ် အာဝါသပလိဗောဓအခဏ်းမှ)
ထိုကဲ့သို့ ထူပါရုံမှာ ဆယ်နှစ်ဆယ်နွေနေခဲ့တာတောင် ဘာတစ်စုံတစ်ခုမှ ငြိကပ်တွယ်တာခြင်းမရှိပဲ လွယ်ကူပေါ့ပါးစွာ စွန့်ခွါနိုင်သူမျိုးကို မေတ္တာသုတ္တာန်လာ ဘုရားရှင်ဟောကြာတော်မူခဲ့တဲ့ သလ္လဟုက၀ုတ္တိ - ပေါ့ပါးလွယ်ကူတဲ့ အသက်မွေးမှုရှိသူမျိုးလို့ ဆိုရမှာဖြစ်ပါတယ်။
စာရှုသူများလည်း တွယ်တာမှုများ နည်းနိုင်သမျှနည်းပါးပြီး အတောင်နှစ်ဖက်ကိုသာသယ်ဆောင်ပျံသန်းနေတဲ့ ငှက်တစ်ကောင်ကဲ့သို့ ပေါ့ပါးလွတ်လပ်စွာ လိုရာခရီးကိုလျှောက်လှမ်းနိုင်ကြပါစေလို့ ဆန္ဒပြုလိုက်ရပါတယ်။
(ဆက်လက်ဖော်ပြပါဦးမည်)
လင်္ကာအရှင်-မုံရွာ
No comments:
Post a Comment