ဦးဇင်းလည်း အလုပ်များနေလို့ ရေးလက်စ မေတ္တာအကြောင်းကို ရှေ့မဆက်နိုင်ဖြစ်သွားတာ တောင်းပန်ပါတယ်။ အခုခဏအားတဲ့အချိန်လေးမှာ ပြီးသမျှလေး ဆက်လက်တင်ပြပေးပါဦးမယ်။
အထက်ကတင်ပြခဲ့သလို ရဟန်းတော်(၅၀၀)တို့အား တောစောင့်နတ်များက အမျိုးမျိုးနှောက်ယှက်ခြောက်လှန့်ကြသောကြောင့် ဘုရားရှင်သီတင်းသုံးတော်မူရာ သာဝတ္ထိမြို့တော်သို့ ပြန်ကြွသွားကြပါတယ်။
ဘုရားရှင်ထံမှောက် ရောက်သွားကြတော့ ဘုရားရှင်က
“ချစ်သားတို့ ၀ါတွင်းကာလမှာ ဟိုဟိုဒီဒီခရီး မသွားလာရလို့ပညတ်ထားပါလျှက် မိမိရဟန်းတရားကို ကြိုးစားအားမထုတ်ပဲ
အဘယ့်ကြောင့် ခရီးလှည့်လည်နေကြဘိသနည်း” လို့မေးမြန်းတော်မူလိုက်ပါသတဲ့။
ရဟန်းတော်ငါးရာဟာ ၀ါမဆိုမီလေးတင်မှ ဘုရားရှင်ထံမှ ကမ္မဋ္ဌာန်းရှူပွားနည်းများ သင်ယူသွားကြသူများဖြစ်ပါလျှက် ယခုဝါတွင်းကာလအတွင်းကြီးမှာ ဘုရားရှင်အထံတော်သို့ ရောက်လာကြပြန်သဖြင့် ထိုကဲ့သို့မေးမြန်းတော်မူလိုက်ခြင်းပဲဖြစ်ပါတယ်။
ဒီနေရာမှာ ၀ါဆိုဝါကပ်ကြရန်ပညတ်တော်မူရခြင်းနဲ့ပတ်သက်လို့ မှတ်သားဖွယ်အချို့ကိုလည်း တင်ပြပေးပါဦးမယ်။ ၀ါဆိုဝါကပ်ကြဖို့ပညတ်တော်မမူခင်က သာသနာတော်မှာ ၀ါတွင်း/၀ါပဆိုတာ မရှိခဲ့သေးပါဘူး။ ဆယ့်နှစ်လရာသီပတ်လုံး မိမိနှစ်သက်ရာဒေသစာရီလှည့်လည်သွားလာလို့ရပါတယ်။တစ်ကျောင်းမကောင်း တစ်ကျောင်းပြောင်းပြီး မိမိနှစ်သက်သလို စိတ်ချမ်းသာသလို သီတင်းသုံးနိုင်ကြပါတယ်။
ဒါပေမယ့် ဘာသာခြားတိတ္ထိဆရာကြီးတွေက ' မိုးတွင်းကာလမှာ ခရီးမထွက်ဘူး'လို့ အဓိဋ္ဌာန်ဆောက်တည်ကြတယ်။ "မိုးဦးကျရင် မြက်ပင်လေးတွေပေါက်လာတယ်၊သစ်ပင်မှာလည်း လူလိုအသက်ရှိတာပဲ မိုးတွင်းခရီးသွားရင် အဲဒီသစ်ပင်လေးတွေနင်းမိပြီး သေကုန်လိမ့်မယ်။မြက်ပင်လေးတွေသနားကရုဏာထားပြီး ခရီးမသွားကြတာ”လို့လည်းပြောဟောကြသတဲ့။
ဒီတော့ ရဟန်းတော်တွေ ဟိုဟိုဒီဒီသွားလာလှည့်လာကြတာကို တိတ္ထိတပည့်တွေကမြင်ကြတဲ့အခါ ကဲ့ရဲ့ကြတော့တာပေါ့။
“တို့ဆရာကြီးတွေက သနားကရုဏာကြီးမားပြီး သစ်ပင်လေးတွေကို ငဲ့ညှာသနားသလောက် ဂေါတမဗုဒ္ဓရဲ့သားတော်တွေက မိုးတွင်းမှာလည်းအနားမနေကြဘူး၊ ဟိုဟိုဒီဒီလျှောက်သွားပြီး သစ်ပင်လေးတွေကိုနင်းသတ်နေကြတာပဲ။ လူမပြောနဲ့ ငှက်တွေတောင် မိုးတွင်းမှာ အသိုက်လုပ်ပြီးမိုးခိုနေကြတယ်”လို့ ကဲ့ရဲ့ကြပါသတဲ့။
တိတ္ထိတပည့်တွေရဲ့ကဲ့ရဲ့ရှုံ့ချစကားတွေကြားရပြန်တော့ မြတ်ဗုဒ္ဓရဲ့တပည့်တကာတကာမတွေလည်း ဘယ်စိတ်ချမ်းသာပါ့မလဲ၊ ဒီအကြောင်းတွေကို ရဟန်းတော်တွေကတစ်ဆင့် ဘုရားရှင်ရွှေနားတော်ပေါက်အောင် လျှောက်ကြတာပေါ့။
ဒီတင် ဘုရားရှင်ကိုယ်တော်မြတ်က ထိုအကြောင်းနဲ့စပ်ပြီး တရားဓမ္မများဟောကြားဆုံးမပေးတော်မူကာ မိုးတွင်းကာလမှာ ၀ါဆိုဝါကပ်ကြဖို့ ပညတ်တော်မူခဲ့တာဖြစ်ပါတယ်။
ဒီနေရာမှာ ဘာသာခြားတွေအယူမှား အမြင်မှားပြီး” မြက်ပင်လေးတွေကိုနင်းချေသေစေလျှက် မိုးတွင်းကာလမှာ ခရီးထွက်ကြတယ်” စသဖြင့် ကဲ့ရဲ့ရှုံ့ချမှုကိုအရေးတယူထားပြီး မိုးတွင်းကာလများမှာ ၀ါဆိုဝါကပ်ကြဖို့ပညတ်တော်မမူပဲ သစ်ပင်မှာ လူကဲ့သို့အသက်ဇီဝမရှိကြောင်း အယူအမြင်မှန်အောင်သာ ဖြေရှင်းဟောကြားသင့်သည်မဟုတ်ပါလား.."လို့မေးစရာရှိပါတယ်။
ဘုရားရှင်တော်ဟာ အရင်ထဲက ပရမတ္ထဆိုက်အောင် တရားဓမ္မများဟောကြားတော်မူရင်း မြက်သစ်ပင်များဟာ လူတို့ကဲ့သို့ အသက်ဇီဝိတိနြေ္ဒမရှိကြောင်းကို ရှင်းလင်းဟောကြားထားတော်မူပြီးလည်းဖြစ်ပါတယ်။
နောက်တစ်ဖက်ကကြည့်ပြန်ပါကလည်း အယူဝါဒမတူသူတွေနဲ့ထိပ်တိုက်ငြင်းခုံနေခြင်း ၊၀ါဒတင်စွပ်စွဲခြင်းပြုလုပ်ပါက
အကျိုးထက်အပြစ်များလာဖို့ပဲရှိပါတယ်။ဘုရားရှင်ရဲ့သာသနာမှာ တဖက်အယူဝါဒသမားများကို အမှန်တရားကို
နားလည်လက်ခံလာနိုင်အောင်သာ သိမ်မွေ့နူးညံ့စွာရှင်းလင်းဟောပြတော်မူခဲ့တာမဟုတ်ပါလား။
တဖန် သာသနာ့ဝန်ထမ်းရှင်ရဟန်းများကို ကြည်ညိုနေသူများအဖို့ အပြစ်မမြင် မပြစ်မှားကြပဲ ရဟန်းတော်များဖူးမြင်ရလျှင် ကုသိုလ်ပွားရပေမယ့်၊ သာသနာမကြည်ညိုသူတို့အတွက် ယင်းတို့ဘာသာအယူဝါဒအရ
သက်ရှိလို့လက်ခံထားတဲ့မြက်သစ်ပင်များကို နင်းလျှက်ခရီးသွားတာကိုတွေ့မြင်ရလျှင် ကဲ့ရဲ့ပြစ်တင်မိကြပြီး အပြစ်များကုန်မှာကိုလည်းမလိုလာ၍ ယင်းတို့အား သနားငဲ့ညှာတော်မူကာ တားမြစ်တော်မူခဲ့ခြင်းဖြစ်မယ်ထင်ပါတယ်။
နောက်တချက်က ဘာသာခြားများနဲ့မဆန့်ကျင်အောင်နေထိုင်ခြင်းအားဖြင့် မကြည်ညိုသေးတဲ့သူတို့ ကြည်ညိုသဒ္ဓါပွားကာ အမှန်တရားကိုလက်ခံလာနိုင်မယ်မဟုတ်ပါလား။
ထိုသို့မိုးတွင်းကာလမှာ ၀ါဆိုဝါကပ်ကြဖို့ စည်းကမ်းသတ်မှတ်လိုက်ခြင်းအားဖြင့် ခရီးများတဲ့ရဟန်းတော်များလည်း ခြေညိမ်သွားကာ ရဟန်းတရားများ ပွားများအားထုတ်နိုင်ခွင့် ရရှိမှာလည်းဖြစ်ပါတယ်။
ဘုရားရှင်လက်ထက်တော်အခါက ရဟန်းတော်များဟာ သီတင်းဝါလမတိုင်မီ သပိတ်ဖုတ်ခြင်း သင်္ကန်းချုပ်ခြင်းစသည့် ဗာဟီယကိစ္စများကိုပြီးစီးအောင်ပြုလုပ်ကြကာ ဘုရားရှင်ထံမှောက်မှာ ကမ္မဋ္ဌာန်းဘာဝနာပွားများနည်းများ သင်ယူကြတာပါ။ နောက်ဆိုချိန်အမှီ မိုးတွင်းဝါလသီတင်းသုံးလို့အဆင်ပြေမည့်ကျောင်းသင်္ခန်းစသည်သို့ ချည်းကပ်ကာ ကမ္မဋ္ဌာန်းတရားများ အထူးကြိုးစားအားထုတ်ကြပါတယ်။ သီတင်းဝါလကျွတ်သည်နှင့် ဘုရားရှင်ရှေ့တော်မှောက်သွားရောက်ကာ မိမိရရှိပေါက်မြောက်ခဲ့တဲ့ အသိထူးဈာန်မဂ်ဖိုလ်တရားများလျှောက်ထားကာ ဘုရားရှင်အားနှစ်သက်တော်မူစေမယ်လို့လည်း သန္ဒိဋ္ဌာန်ချထားတော်မူကြတာပါ။
ဆွမ်း တကာတကာမများကလည်း ၀ါပကာလမှာ သံဃာတော်များလည်း သင့်တော်ရာနေရာဌာနတွေမှာပြောင်းရွှေ့သီတင်းသုံးတော်မူကြ၊ခရီးလှည့်လည်ကြလို့ အတည်တကျသီတင်းသုံးတဲ့သံဃာကို အမြဲဆွမ်းဝတ်ပြုနိုင်ကြဖို့ ခဲယဉ်းလှပါတယ်။ ၀ါတွင်းကာလမှာတော့ မိမိတို့အရပ်ဒေသမှာ တစ်ဝါတွင်းမျှ အမြဲသီတင်းသုံးတော်မူမည့်ရဟန်းတော်များရပြီဖြစ်၍ အားရပါးရ လိုအပ်ရာရာ ထောက်ပံ့လှူဒါန်းကြခြင်း ၊ကမ္မဋ္ဌာန်းရှုပွားနည်းများသင်ယူကာ အားထုတ်ကြခြင်းဖြင့် ဒါနသီလစသော ကုသိုလ်များနှင့် မဂ်ဖိုလ်အသီးအပွင့်များကိုလည်း ရရှိခံစားခွင့်ရကြပါတယ်။ ၀ါတွင်းကာလသည် မြတ်ဗုဒ္ဓ၏သာသနာတော်အတွက် အလွန်အရေးပါသော တန်ဖိုးရှိသော အချိန်ကောင်းကာလကောင်းကြီးပဲဖြစ်ပါတယ်။
ထို့ကြောင့် ၀ါတွင်းကာလမှာ ခရီးသွားလာကြတဲ့သံဃာတော်များ မရှိသလောက်ရှားပါးနေချိန်မှာ ရဟန်းငါးရာတို့ ဘုရားရှင်ထံမှောက်ရောက်လာတော်မူကြ၍ ဘုရားရှင်ကိုယ်တော်မြတ်က နှစ်သက်တော်မမူပဲ
“ချစ်သားတို့ ၀ါတွင်းကာလမှာ ဟိုဟိုဒီဒီခရီး မသွားလာရလို့ပညတ်ထားပါလျှက် မိမိရဟန်းတရားကို ကြိုးစားအားမထုတ်ပဲ အဘယ့်ကြောင့် ခရီးလှည့်လည်နေကြဘိသနည်း”လို့မေးတော်မူလိုက်ခြင်းဖြစ်ပါတယ်။
ထိုအခါမှာ ရဟန်းငါးရာတို့ခေါင်းဆောင်မထေရ်ကြီးက ထိုမိမိတို့တောအုပ်မှာကြုံခဲ့ရတဲ့တောအုပ် ထိုအကြောင်းအလုံးစုံကိုသိစေပြီး အခြားတစ်နေရာရာမှာပဲ ကမ္မဋ္ဌာန်းတရားပွားများအားထုတ်နိုင်ဖို့ ညွှန်ပြပေးတော်မူပါရန် လျှောက်ထားတောင်းပန်ပါတယ်။
ဒါပေမယ့် မြတ်စွာဘုရားက “ချစ်သားတို့ သင်ချစ်သားတို့အတွက် ထိုတောအုပ်မှာပဲ နေထိုင်သီတင်းသုံးကာ ကမ္မဋ္ဌာန်းတရားပွားများအားထုတ်သင့်ကြတယ် ကျောင်းအိပ်ယာနေရာ ။ဆွမ်းကွမ်း၊ သောက်ရေသုံးရေစသည်များလည်း
ပြည့်စုံပြီးဖြစ်တယ်”ဟုမိန့်တော်မူရာ
“မှန်ပါဘုရား ဘုရားတပည့်တော်များလည်း ထိုနေရာလေးမှာသီတင်းသုံးရတာ သဘောကျပေမယ့် တောကြမ်းလှပါတယ်ဘုရား ကြောက်စိတ်မရှိလျှင်တောင်မှ တပည့်တော်များ အနံ့အသံတို့ကို
သည်းခံနိုင်စွမ်းမရှိဖြစ်နေရပါတယ်”ဟု အခက်ခဲကိုထပ်မံလျှောက်ထားပြီး ပြန်သွားကြဖို့ နောက်တွန့်နေကြရာ ဘုရားရှင်တော်က
“ချစ်သားတို့သည် ကိုယ်အစောင့်အရှောက်အဖော်ကို ခေါ်မှမသွားခဲ့ကြချေ။ အပေါင်းအဖော်နှင့်သွားလျှင် ရန်သူပင်မိတ်ဆွေဖြစ်ပေလိမ့်မည်။ သင်ချစ်သားတို့အတွက် အစောင့်အရှောက်ဖြစ်စေရန်အတွက်၎င်း ၊
ကမ္မဋ္ဌာန်းရှပွားနည်းဖြစ်စေရန်အတွက်၎င်း ငါဘုရား မေတ္တာကမ္မဋ္ဌာန်းကို သင်ကြားပေးတော်မူမည် ထိုတောအုပ်သို့သာ ပြန်ကြွပြီး တရားရှုမှတ်ကြရမည်”ဟု တိုက်တွန်းအားပေးတော်မူလျှက် မေတ္တာသုတ္တာန်ကို ထုတ်ဖော်ဟောကြားတော်မူခဲ့ပေသည်။
တဖန် “ချစ်သားတို့ လူသူမနီးတဲ့ တောကြီးတောင်ကြီးတွေမှာ မှီတင်းသီတင်းသုံးနေထိုင်ကြမယ့် ရဟန်းတော်တို့ဟာ နံနက်တကြိမ်၊ညတစ်ကြိမ် ပရိတ်တော်ကိုလည်း အရံအတားအစောင့်အရှောက်အလို့ငှါ ရွတ်ဖတ်သရဇ္ဈာယ်ရမယ်။ မေတ္တာ၊ အသုဘဘာဝနာ၊ မရဏာနုဿတိတို့ကိုလည်းပွားရမယ်၊ သံဝေဂ၀တ္ထု(၈)မျိုးကိုလည်းဆင်ခြင်ပေးရမယ်လို့ မိန့်တော်မူလိုက်ပါတယ်။
ထိုအခါရဟန်းတော်တို့က သံဝေဂ၀တ္ထုရှစ်မျိုးဆိုတာကို တပည့်တော်များပွားတတ်အောင် အကျယ်အားဖြင့်ဟောတော်မူပါဘုရား..ဟု ရိုသေစွာလျှောက်ထားရာ
ချစ်သားရဟန်းတို့ သံဝေဂ၀တ္ထု(၈)မျိုးဆိုတာ
(၁) ပဋိသန္ဓေနေရခြင်း ဆင်းရဲ၊
(၂) အိုခြင်းဆင်းရဲ ၊
(၃)နာခြင်းဆင်းရဲ
(၄)သေခြင်းဆင်းရဲ၊
(၅)ပုထုဇဉ်ဘ၀နဲ့များ ဘ၀ဆုံးပါးသွားခဲ့ရင် အပါယ်လေးဘုံမှာ ဒုက္ခပေါင်းစုံခံစားရမယ့်ဆင်းရဲ၊ (၆)အတိတ်ဘ၀တွေကခံစားခဲ့ရတဲ့ ဆင်းရဲ၊
(၇)အနာဂါတ်သံသရာမှာ ခံစားရမယ့် ဆင်းရဲ၊
(၈)မျက်မှောက်ဘ၀မှာလည်း အသက်ရှင်ရပ်တည်ရေးအတွက် သပိတ်ခွက်ကိုလက်စွဲပြီး ဆွမ်းခဲဖွယ်ဘောဇဉ်ကို လိုက်လံရှာဖွေရတဲ့ဆင်းရဲ ဒုက္ခရှစ်မျိုးကို ခေါ်တယ်။ ထိုဆင်းရဲဒုက္ခတွေကို အဖန်ဖန် အထပ်ထပ် ဆင်ခြင်ပွားများပေးနိုင်မှသာ သံသရာဝဋ်ဒုက္ခအပေါ်မှာ တွယ်တာကပ်ငြိမှုကို အလွယ်တကူပယ်ခွါနိုင်လိမ့်မယ်လို့ မိန့်တော်မူလိုက်ပါတယ်။
ထိုအခါရဟန်းတော်(၅၀၀)က တဖန် “ မေတ္တာဘာဝနာရှုပွားပုံ ရှုပွားများနည်းကို သင်ပေးတော်မူပါဘုရား ။ ထိုတောအုပ်သို့ပြန်သွားပြီး ကြိုးစားအားထုတ်ကြပါမည်”ဟုလျှောက်ထားကြရာ ဘုရားရှင်ကိုယ်တော်မြတ်က
မေတ္တာဘာဝနာပွားများရမည့် မေတ္တာရှင်ရဟန်းတော်များအတွက် ပြည့်စုံရမည့်အရည်အချင်းတွေကို ရှေးဦးစွာဟောကြားပေးတော်မူပါတယ်။
(မေတ္တာဘာဝနာပွားများလိုသည့် ရဟန်းတော်များပြည့်စုံရမည့် အင်္ဂါရပ်များကို နောက်ပို့စ်မှ ဆက်လက်တင်ပြပေးပါမယ်)
ကိုယ်စိတ်နှစ်ဖြာ ကျန်းမာချမ်းသာကြပါစေ
လင်္ကာအရှင်(မုံရွာ)
No comments:
Post a Comment