*သုဘရော စ-မွေးမြူ(ပြုစုထောက်ပံ့ရ)လွယ်သူ၏အဖြစ်သည်၎င်း*
လူဒါယကာများက တတ်စွမ်းသမျှ လှူဒါန်းထောက်ပံ့ကြတာကို မငြီးမငြူ မဆူမအောင့် ကြည်လင်ချမ်းမြစွာ ခံယူသုံးစွဲသူဟာ လူဒါယကာတို့လွယ်ကူစွာ လှူဒါန်းထောက့်ပံ့နိုင်တဲ့ ရဟန်းတော်မျိုးဖြစ်ပါတယ်။
ဆင်းရဲသူဆင်းရဲသားများဆိုတာ သဒ္ဓါတရားနဲ့ ချက်ပြုတ်လှူဒါန်းကြပေမယ့် သူတို့စွမ်းအားအလျှောက်စီမံကြရလို့ ခေါင်းပါးတဲ့ ဆွမ်းကြမ်းဟင်းကြမ်းများပဲလှူနိုင်ကြမှာပေါ့၊ သူဋ္ဌေးသူကြွယ်များဆွမ်းကပ်တဲ့အခါလည်း ဟင်းကောင်းဆွမ်းကောင်းများကို ယင်းတို့သုံးဆောင်သလိုပဲ ရဟန်းတော်တွေလည်း ဘုဉ်းပေးကြရပြန်တာပါပဲ။
ဒါပေမယ့် မွေးမြူလှူဒါန်းထောက်ပံ့ဖို့လွယ်တဲ့ရဟန်းဆိုတာကတော့ ချမ်းသာသူလှူပြန်တော့လည်း ဘုဉ်းပေးကောင်းတယ်ပြောသလို လူဆင်းရဲများက တောဟင်းသီးဟင်းရွက်လေးများခူးချက်ပြီး လာကပ်ပြန်ရင်လည်း မြိန်ရေရှက်ရေဘုဉ်းပေးပြရင်း
“ ဟာ ကောင်းတယ်တကာမကြီး ဦးဇင်းလည်း ဒီလိုဟင်းရွက်ကြော်လေးတွေ မဘုဉ်းရတာ ကြာပြီ "လို့
့ အလှူရှင်ဝမ်းမြောက်ဖွယ်သာ ပြောဆိုတတ်ပါတယ်။ ဒါပေမယ့် လိမ်လည်ပြောဆိုတာတော့မဟုတ်ဘူးနော် မိမိရင်ထဲရှိတဲ့အတိုင်းပြောလိုက်တာပါ ရှုထောင့်ကလှပတော့ စကားလုံးတွေကလည်း လူအများနှစ်လိုဖွယ်ဖြစ်တာပေါ့ ။
လူဒါယကာများကလည်း ထိုကဲ့သို့ နှစ်သက်ဖွယ်စကားကိုသာ ကြားရတော့ ကုသိုိုလ်သဒ္ဓါပိုတိုးပွားပြီး “တပည့်တော်/တပည့်တော်မ နောက်တောသွားလို့ ခူးလာရင်လည်း အရှင်ဘုရားကြိုက်တတ်တယ်ဆို လာပို့ပါဦးမယ်ဘုရား”ဟု ဆိုကာ ပဋိညာဉ်ခံကာ ထပ်မံလှူဒါန်းကြပြန်ရာ မိမိလည်းဆွမ်းကွမ်းမပင်ပမ်း ၊လူဒါယကာများမှာလည်း ကုသိုလ်တိုးပြီးရင်းတိုးရတော့တာပါပဲ။
အချို့ရဟန်းတော်များမှာကတော့ မိမိကအသာလက်လျှိုစားရပေမယ့် လူဒါယကာတို့က သလေးထမင်း သားပြွမ်းဟင်းလျှာမွန်တို့နဲ့ ဆွမ်းဆက်ကပ်တာတောင် မျက်နှာမသာမယာပြလျှက် မရှိတာကိုတောင့်တတတ်ကြပြန်ပါတယ်။ သူစိတ်တိုင်းမကျပါက လာလှူတဲ့တကာတကာမကိုမှ အားမနာ “ခင်များတို့ဗျာ ဘုန်းကြီးတွေ ဒီလိုဆွမ်းမျိုးဟင်းမျိုးစားမလား ၊လူမပြောနဲ့ ကျုပ်တို့ကျောင်းက ဂုတ်ကြားတောင်မစားဘူး ၊ဟေ့ ကိုရင်တွေလာစမ်း ဒီဆွမ်းတွေယူသွား” စသည်ဖြင့် မစားချင်သောမသုံးဆောင်ချင်သောဟန်ပန်အမူရာဖြင့် လုပ်တတ်ကြတယ် ။ဒီလိုရဟန်းမျိုးကတော့ ဒုဗ္ဘရ-လှူဒါန်းထောက်ပံ့ရတာ ခက်ခဲတဲ့ရဟန်းမျိုးဖြစ်တယ်လို့ ဆိုပါတယ်။
ဒီလိုရဟန်းမျိုးကိုတော့ တစ်ခါကနှစ်ခါ ထောက်ပံ့လှူဒါန်းချင်စိတ်မရှိကြတော့ပဲ လူဒါယကာတို့လည်း အဝေးမှရှောင်ကွင်းသွားတတ်ကြပါတယ်။
*ဒုဗ္ဘရရဟန်းအား ဘုရားကိုယ်တိုင်ဆုံးမခဲ့ရပုံ*
ဓမ္မပဒ အဋ္ဌကထာလာ တိဿဒဟရဝတ္ထုမှာ အရှင်တိဿအမည်ရတဲ့ ရဟန်းငယ်လေးတစ်ပါးဟာ ဘယ်လိုပင် စီမံကပ်လှူကြပေမယ့် စိတ်နှစ်သက်မှုကိုမရပဲ အမြဲကဲ့ရဲ့စကားဆိုနေပါသတဲ့ ။
သူက အနာထပိဏ်ကျောင်းဒကာကြီးအိမ် ဆွမ်းစားကြွလည်း ကဲ့ရဲ့နေပြန်တယ်။ "သူဋ္ဌေးကြီးနှယ် သံဃာအများကြီးဆွမ်းစားပင့်ထားပြီး အလင်မှီအောင်ဆွမ်းဆွမ်းဟင်းမလိုက်နိုင်ဘူး။ အလုပ်သမားဝေယျာဝစ္စတွေကို သေသေချာချာကျကျနနစီမံထားတာမဟုတ်ဘူး"လို့ ဆိုနေပြန်ပါတယ်။ ၀ိသာခါကျောင်းအမကြီးအိမ်ရောက်ပြန်တော့လည်း ဒီအတိုင်းပါပဲ ကဲ့ရဲ့စရာမရှိကဲ့ရဲစရာလိုက်ရှာပြီးကို ကဲ့ရဲ့ပြစ်တင်နေပြန်ပါတယ်။ "ဆွမ်းပူဟင်းပူများကိုချက်ကပ်ပြန်တော့လည်း သံဃာတော်များမလာခင်ထဲက ခူးခပ်ထားပါလား ခုတော့ ဆွမ်းအေးတဲ့ထိ ထိုင်စောင့်နေရတယ် ။ဟင်းချိုတောင်မှုတ်မသောက်ရင် လျှာလောင်ဦးမယ်"လို့ ဆိုပြန်ပါတယ်။
စောစောထချက်ပြုပ်ခူးခပ်ထားကြလို့ အေးစက်နေပြန်ရင်လည်း "ထမင်းကြမ်းခဲ ယပ်ခပ်စားရတာကမှကောင်းဦးမယ်။
ကျောက်ခဲကိုက်ဝါးနေရသလို မာထောင်နေတာပဲဟေ့"လို့ ကဲ့ရဲ့ပြန်ရောတဲ့။ ဒီတော့ ဘေးကအမြဲကြားနေရတဲ့ ရဟန်းတော်များလည်း စိတ်မသက်မသာဖြစ်ကြရတာပေါ့။
ဒါ့ထက်ဆိုးတာက ဘုရားတစ်ဆူမှာတစ်ကြိမ်သာကြုံဖူးတဲ့ မဟာအသဒိသ သူမတူထူးကဲတဲ့ ကောသလမင်းကြီးနဲ့မလ္လိကာမိဖုရားကြီးတို့အလှူကိုလည်းကဲ့ရဲ့ပြန်ပါတယ်။
"အပျိုတော်တွေကဘေးကနေ ထိုင်ယပ်ခပ်နေတာကွာ ဘယ်ကလာဆွမ်းမြိုကျမှာလည်း ငါဖြင့် ရှက်တာနဲ့တင် ဆွမ်းစားမရခဲ့ပါဘူး။
ကောသလမင်းကြီးကအသဒိသဒါနသာဆိုတယ် ငါ့မျက်လုံးထဲဖြင့် ပြောစရာတွေချည်းပဲ"လို့ ဆိုနေပြန်ပါတယ်။
ဒီလိုအမြဲအလိုမကျတဲ့စကားတွေကြားနေရတာကြာတော့ ရဟန်းငယ်အချို့က”’ဒီရဟန်းနှယ် သူ့မိဘအသိုင်းဝိုင်းကဘယ်လောက်များအဆင့်ရှိပြီး ဘယ်လိုချက်ပြုတ်စားသောက်နေလို့များ ဒီလောက်ကဲ့ရဲ့နေပါလိမ့်။ သူသာရဟန်းဝတ်လာတာကြာတယ် သူ့ဆီလာတွေ့လှူဒါန်းကြတဲ့ တကာတကာမ တစ်စုံတစ်ယောက်ကမှ မမြင်ရဘူး ။ သူများလှူတာတန်းတာတွေထိုင်စားပြီး အပြစ်မရှိအပြစ်ရှာပြောနေတယ်”ဆိုပြီး သူ့ဘ၀ဇာတ်ကြောင်းကိုနည်းနည်းစုံစမ်းကြည့်လိုက်တော့ ဖုံးထားသမျှပေါ်လာတော့တာပါပဲ။ သူ့ဇာတိမျိုးရိုးကဖြင့် ဖခင်ကြီးကတံခါးစောင့်အလုပ်လုပ်ရပြီး ထမင်းတောင်နပ်မှန်တာမဟုတ်ပါဘူး။
မြင်းကုန်သယ်တွေရဲ့ မြင်းစာကျွေးအဖြစ်သာဝတ္ထိလိုက်လာရင်းက သာသနာ့ဘောင်ဝင်လာတဲ့ လူငယ်တစ်ယောက်မျှသာဖြစ်ကြောင်းသိကြရတော့ ထိုpessimism-အဆိုးမြင်ဝါဒီရဟန်းကို ဘုရားထံမှောက်ခေါ်ဆောင်သွားကြပြီး အကြောင်းစုံလျှောက်တင်ကြပါတော့တယ်။
ဒီတင်ဘုရားရှင်က “ဒီရဟန်းငယ်လေးဟာ ယခုမှသာ ကဲ့ရဲ့ပြစ်တင်နေတတ်သူမဟုတ်ပါဘူး ဟိုးသံသရာမှာ ငါဘုရားနဲ့ဆုံခဲ့ရတဲ့ဘ၀တစ်ခုမှာထဲက ဒီအပြုမူဒီညာဉ်ဆိုးတွေကြောင့် ငါဘုရားဆုံးမခဲ့ရဖူးတယ်” လို့ မိန့်တော်မူလိုက်ရာ..ရဟန်းတော်များအားလုံးက
“ အတိတ်အကြောင်းလေးလည်း ပြန်ဟောကြားပေးတော်မူပါဘုရား”လို့ လျှောက်ထားကြပြန်၍ ကဋာဟကဇာတ်ကို ပြန်လည်ဟောပြတော်မူခဲ့ရပြန်ပါတယ်။
*ကျွှန်မသားက စကားကြီးစကားကျယ်ပြောကာ ကဲ့ရဲ့နေ၍ ဆုံးမခဲ့ရပုံ*
အတိတ်တစ်ချိန်သံသရာကျင်လည်ခဲ့စဉ်မှာ ဘုရားအလောင်းတော်ဟာ သူဋ္ဌေးကြီးတစ်ဦးဖြစ်ခဲ့ပြီး ဇနီးသည်မှာ သားကလေးတစ်ယောက်ကိုဖွားမြင်ခဲ့ပါသတဲ့။တစ်ချိန်ထဲမှာပဲ ကျွန်မလေးကလည်း ကလေးတစ်ယောက်ကိုဖွားမြင်ပြန်ရာ မွေးနေ့တူတစ်အိမ်တည်းသားများဖြစ်ကြလို့ ကျွန်မလေးရဲ့သားငယ်လေးကိုလည်း
သူဋ္ဌေးသားနဲ့ အတူတကွသူငယ်ချင်းပြုကာ အရွယ်ရောက်သည်အထိ အတူတူပညာသင်ခွင့်ပေးခဲ့ပါတယ်။
ဘုရားအလောင်းသူဋ္ဌေးကြီးကလည်း မေတ္တာကရုဏာကြီးမားသူပီပီ ကျွှန်မသားလေးကို “ကဋာဟက”လို့ နာမည်ပေးပြီး သားအရင်းအလားချီးမြှောက်ထားကာ ဘဏ္ဍာစိုးရာစိုးရာထူးကိုပင် လွှဲပေးထားခဲ့ပါသတဲ့ ။
ဒါပေမယ့် ကျွန်မသားလေးကစဉ်းစားတယ်။ သူဋ္ဌေးကြီးက သူ့သားအရင်းအလားသူကောင်းပြုထားပေမယ့် တစ်ချိန်ချိန်အလိုမကျရင် ငါ့ကိုရိုက်ပုတ်နှိပ်စက်ပြီး ကျွန်မသားအရာပြန်ထားလိမ့်မယ်။ ဒီတော့ အခွင့်ရတုန်းအကြံထုတ်မှပဲဟုဆိုကာ
တိုင်းစွန်ပြည်ဖျားမှာနေတဲ့ သူဋ္ဌေးကြီးသူငယ်ချင်း တောသူဋ္ဌေးတစ်ဦးရဲ့သမီးကို မိမိသားအရင်းနှင့် လက်ထပ်ထိမ်းမြားပေးဖို့ရန် ကမ်းလှမ်းစာပေးလိုက်သယောင်မိမိကိုယ်တိုင် လီဆယ်ရေးသားကာ ကိုယ်တိုင်သွားရောက်ပေးလိုက်ပါတယ်။
တိုင်းစွန်ပြည်ဖျား တောသူဋ္ဌေးကလည်း ဘုရားလောင်းသူဋ္ဌေးကြီးစကားကိုမပယ်ရှာသူပီပီ သားအရင်းတကယ် ထင်မှတ်ကာ သမီးလေးနဲ့လက်ဆက်ပေးလိုက်ပါတယ်။ ဒီလိုနဲ့ကျွန်မသားက နယ်စွန်နယ်ဖျားမှာ သားအရင်ဟန်ပြုကာ ကြီးပွားနေတာပေါ့၊၊ ကြီးပွားနေရုံတင်မဟုတ်သေးပဲ အမြဲတမ်းဆူပူကြိမ်းမောင်းနေလိုက်ပါသေးသတဲ့။ ဇနီးသည်သူဋ္ဌေးသမီးလေးကိုလည်း
“ဟင်းဒီလိုချက်ရသလား။ ယာဂုဒီလိုတည်ရသလား ၊ ဒါ့ကြောင့်နင်တို့ တောသူဖြစ်နေတာ”စသဖြင့် မြည်တွန်တောက်တီးမှုမပြတ်လုပ်နေပါသတဲ့ ။ ဒီတော့ သူဋ္ဌေးသမီးလေးလည်း လင်တော်မောင်ကိုစိတ်ကုန်စပြုလာပါတော့တယ်။
ဘုရားအလောင်းတော်သူဋ္ဌေးကြီးလည်း ကျွန်ယုံတော်ပျောက်ချင်းမလှပျောက်ဆုံးသွား၍ လိုက်လံရှာဖွေစေရာ ထိုတိုင်းစွန်ပြည်ဖျားမှာ သူဋ္ဌေးကြီးသားအရင်းဟန်ဆောင်ကာ ကြီးပွားနေကြောင်းကြားသိရကာ ကိုယ်တိုင်သွားခေါ်အံ့ဟု များစွာသောအခြံအရံနဲ့ ထွက်လာပါသတဲ့။
ဒီသတင်းကို ကျွန်မသားကသိသည်နှင့် “ငါထွက်ပြေးလျှင်လည်း သူဋ္ဌေးကြီးမတွေ့မမြင်ရာအရပ်ကိုရှောင်ပုန်းနိုင်မည်မဟုတ် ။ ဒီအတိုင်းပြန်လိုက်သွားပါကလည်း ငါသည်ကျွန်မသားစင်စစ်ပြန်ဖြစ်ကာ ဆင်းရဲဒုက္ခရောက်ရတော့မည် ဒီတော့ ဖွေးစားဖခင်သူဋ္ဌေးကြီးစိတ်ကျေနပ်အောင်သာ ကြိတ်တောင်းပန်ဝန်ချကာ
နေမြဲတိုင်းနေနိုင်အောင်ကြိုးစားမယ်”လို့ဆုံးဖြတ်လိုက်တယ်။
ဒါပေမယ့် သူ့ယောက္ခမသူဋ္ဌေးကြီးနဲ့ဇနီးအခြံရံများအထင်မလွဲအထင်မသေးသွားစေဖို့ လိမ်ညာလိုက်ပြန်ပါသေးသတဲ့။
“သင်တို့အရပ်မှာနေကြတဲ့သူတွေက မိဖကျေးဇူးကိုသိတတ်ကြတာမဟုတ်ဘူး ။ မိဖတွေနဲ့လည်းအတူစားတယ် ။ငါကတော့ငါ့ဖခင်သူဋ္ဌေးကြီးလာရင် ငယ်ကျွန်ရင်းတစ်ယောက်သဖွယ် ခြေဆုပ်လက်နယ်ပြုမယ်။ စားပြီးသိမ်းဆည်းပြီးမှ ငယ်ကျွှန်များနဲ့အတူသာစားမယ်”စသဖြင့် လိမ်ညာပြောဆိုကာ ဖခင်ကြီးအားခရီးဦးကြိုအံ့ဟုကြိုတင်သွားကာ လမ်းခရီးအကြား၌ပင် ဘုရားလောင်းအားအမျိုးမျိုးငိုယိုတောင်းပန်ကာ သူ့ဘ၀ကို မဖျက်ဆီးပါနဲ့လို့ တောင်းပန်သတဲ့။
ဘုရားလောင်းလည်း စိတ်သဘောထားသိမ်မွေ့သူပီပီ ကောင်းပြီချစ်သား စိတ်ချမ်းသာစွာနေပါ ငါ၏မိတ်ဆွေကြီးအားနှစ်သက်အားရစေလျှက် နှစ်ရက်သုံးရက်မျှနေပြီး ငါပြန်မည်။ လိမ်မာစွာနေရစ်လော့ ဟုဆုံးမသြ၀ါဒပေးကာခွင့်လွှတ်လိုက်ပါတယ်။
သူဋ္ဌေးကြီးအိမ်ရောက်တော့ “သမီးလေးလာစမ်းပါဦး ငါ့သားက သင့်အပေါ်စိတ်ချမ်းသာအောင်ထားပါသလား..” လို့မေးမြန်းရာမှတော့ “အခြားအပြစ်ပြောစရာတစ်စုံတစ်ခုမျှမရှိသော်လည်း အမြဲလိုလိုထမင်းဟင်းများအပေါ် ဝေဖန်အပြစ်ပြောသဖြင့် စိတ်ညစ်ရပါသည်ဖခင်”ဟု ပြန်ပြောပြရာ။
“သို့ဖြစ်လျှင်မပူနှင့် ချစ်သမီး ဆိုဆုံးမခက်ခဲတဲ့ ဒီအကောင် နှုတ်ပိတ်သွားစေမယ့် ဂါထာတစ်ပုဒ်သင်ပေးခဲ့မယ်။ ထမင်းစားချိန်မှာ သူကကဲ့ရဲ့မည့်ဟန်မြင်သည်နှင့် ဒီဂါထာကိုသာ ရွတ်ပေတော့ ။( ဒီအတိုင်းပြောလိုက်တော့လို့ သင်ပေးခဲ့ပါသတဲ့ )
ဘုရားအလောင်းတော်ပြန်သွားပြီး သူဋ္ဌေးသမီးလေးလည်း လင်တော်မောင်စားဖို့ထမင်းခူးပေးရာမှ ထိုကျွန်မသားလင်တော်မောင်ကအလိုမကျဟန်ပြလိုက်သည်နှင့်
''ဗဟုမ္ပိ သော ဝိကတ္ထေယျ၊ အညံ ဇနပဒံ ဂတော။
အနွာဂန္တွာန ဒူသေယျ၊ ဘုဉ္ဇ ဘောဂေ ကဋာဟက''
“ကဋာဟက ကိုယ့်ထမင်းကိုယ် အသာစားပါ၊
အခြားတိုင်းစွန်ပြည်ဖျားသို့ရောက်ပြီဆိုပြီး ကဲ့ရဲ့စကားများများ ပြောနေလျှင်
သူဋ္ဌေးကြီး တဖန်ပြန်လာပြီး သင့်ကိုအပြစ်ပေးပါလိမ့်မယ်”
လို့ ရွတ်ဆို (ပြော)လိုက်ရာ ကျွန်မသား ကဋာဟမှာ မျက်လုံးပြူးသွားပါတော့တယ် ။
အင်း ဒီသူဋ္ဌေးသမီးငါ့အကြောင်းအကုန်သိပြီးဖြစ်ပေလိမ့်မယ် ဟုမာန်မာနကျိုးသွားကာ မိမိထမင်းကိုသာခေါင်းငုံ့စားနေပါတော့သတဲ့။နောင်တစ်သက်လုံးလည်း သူ့ရဲ့ ကဲ့ရဲ့ပြစ်တင်တတ်တဲ့ အကျင့်ကိုလည်းပြင်ဆင်သွားပါတော့တယ်။ အမှန်တော့သူဋ္ဌေးသမီးလည်း အဓိပ္ပါယ်အတိကျမသိပါဘူး ။
ဘုရားလောင်းက ကျွန်မသားမာန်မထောင်အောင် ပရိယာယ်ဖြင့်ဆုံးမပေးခဲ့ခြင်းမျှသာဖြစ်ပါသတဲ့။
ဘုရားရှင်လည်း ထိုအတိတ်ဇာတ်ကိုပြန်လည်ဟောပြပြီး ဤရဟန်းငယ်သည် ယခုမှသာ အစားအသောက်အပေါ်အလိုမကျကဲ့ရဲ့ပြစ်တင်နေတတ်သူမဟုတ် ရှေးယခင်ကပင် လိမ္မာရေးခြားရှိအောင် ဆုံးမခဲ့ရဖူးတယ်လို့ မိန့်ကြားတော်မူပြီး အောက်ပါအတိုင်းဆက်လက်ဟောတော်မူခဲ့ပါတယ်။
''ဒဒါတိ ဝေ ယထာသဒ္ဓံ၊ ယထာပသာဒနံ ဇနော။
တတ္ထ ယော စ မင်္ကု ဟောတိ၊ ပရေသံ ပါနဘောဇနေ။
န သော ဒိဝါ ဝါ ရတ္တိံ ဝါ၊ သမာဓိမဓိဂစ္ဆတိ။
ချစ်သားတို့ “လူအပေါင်းသည် တစ်စုံတစ်ယောက်အား ယုံကြည်သည့်အလျောက် ကြည်ညိုသည့်အလျောက် ပေးကမ်း လှူဒါန်း၏၊ စားဖွယ်သောက်ဖွယ်စသည်ကို သူတစ်ပါးတို့ ပေးလှူရာ၌ မျက်နှာမသာသူသည် နေ့ရောညဉ့်ပါ ဘယ်အခါမှ
စိတ် တည်ကြည်မှုကိုရလိမ့်မည်မဟုတ်ပေ။
''ယဿ စေတံ သမုစ္ဆိန္နံ၊ မူလဃစ္စံ သမူဟတံ။
သ ဝေ ဒိဝါ ဝါ ရတ္တိံ ဝါ၊ သမာဓိမဓိဂစ္ဆတိ”
“ မျက်နှာမသာမှုသဘောကို အကြွင်းမဲ့ဖြတ်ကာ အမြစ်ပြတ် ပယ်နုတ်ပြီးသူသည်သာ နေ့ရောညဉ့်ပါ အခါခပ်သိမ်း စိတ်၏တည်ကြည်မှုကို ဧကန်ရနိုင်ပါတယ်”
ထိုတရားတော်အဆုံးမှာ များစွာသောတရားနာပရိတ်သတ်တို့လည်း သောတာပန်စသည့်တရားထူးများရသွားကြပါသတဲ့။
xxxxxxxxxxxxxxxxxxxxxxxxxxxxxxxxxx
ထို့ကြောင့် အမြဲကဲ့ရဲ့ပြစ်တင်ဝေဖန်နေတတ်သူတစ်ယောက်ဖြစ်နေပြန်လျှင်လည်း pessimism -အဆိုးမြင်ဝါဒီတစ်ဦးဖြစ်နေပြီး အမှန်ကိုမြင်နိုင်တော့မည်မဟုတ်ပေ။ပစ္စည်းလေးပါးဒါယကာတို့ကလည်း ထိုရဟန်းမျိုးစိတ်ကျေနပ်သည်အထိ ပြုစုစောင့်ရှောက်ကြဖို့ မဖြစ်နိုင်တော့ပေ။
ဆွမ်းတကာတကာမများ စိတ်ချမ်းသာရေး ကုသိုလ်ကောင်းမှုတိုးပွားရေးကိုသာ ဦးစားပေးစဉ်းစားပြောဆိုသူများကား အလှူရှင်များရဲ့လိုအပ်ချက်များကို ရှာကြံပြောဆိုနေမှာမဟုတ်ပဲ မွေးမြူရ ပြုစုထောက်ပံ့ရလည်း လွယ်ကူပါလိမ့်မယ်။
မိမိကိုယ်တိုင်လည်း အမှန်ကိုရှုတတ်မြင်တတ်တဲ့ truism တစ်ယောက်ဖြစ်အောင် တကာတကာမများလည်း မွေးမြူပြုစုထောက်ပံ့ရလွယ်ကူကြအောင် စိတ်သဘောထားပျော့ပြောင်းနူးညံ့သူတစ်ယောက်ဖြစ်ဖို့ ကြိုးစားဖို့ လိုပါလိမ့်မယ်..
လို့တင်ပြရင်း သုဘရောစ ..နဲ့ပတ်သက်တဲ့မှတ်ဖွယ်များအား ဤမျှဖြင့် ရပ်နားလိုက်ရပါတယ်။
စာရှုသူများလည်း သုဘရောစ ဆိုတဲ့အတိုင်း လွယ်ကူစွာ ကိုယ့်ကိုယ်ကိုမွေးမြူရင်း ဘ၀ခရီးလမ်းကိုလျှောက်လှမ်းနိုင်တဲ့ စိတ်သဘောထားပျော့ပြောင်းသူများဖြစ်နိုင်ကြပါစေ။
ဆက်လက်ဖော်ပြပေးပါဦးမည်(လင်္ကာအရှင်-မုံရွာ)
No comments:
Post a Comment