သုဝစော စ -ဆိုဆုံးမလွယ်သူသည်လည်း၊အဿ-ဖြစ်ရာ၏။
မေတ္တာသုတ္တာန်လာ ဆိုဆုံးမလွယ်တဲ့သူဆိုတာ…..
မသိနားမလည်လို့အမှားလုပ်မိတာ၊မသင့်တာကြံမမှန်တာပြောမိတာတွေကို တတ်သိနားလည်သူများက
အဆုံးမသြ၀ါဒပေးတဲ့အခါ
“၀မ်းမြောက်လှပါတယ်ဘုရား၊ကိုယ့်ကျောပြင် ကိုယ်မမြင်နိုင်သလိုပဲ ကိုယ့်အပြစ်ကိုယ်ကျ မြင်နိုင်ခဲတယ်လေ၊နောင်လည်း အပြင်မြင်တိုင်း ပြောဆိုဆုံးမတော်မူပါ”လို့ရိုသေစွာလျှောက်ထားပြီး တကယ်လည်းလိုက်နာပြုကျင့်တဲ့သူမျိုးကိုဆိုလိုတာပါ။
ဒီလို နူးညံ့ပျော့ပြောင်းတဲ့စိတ်ကောင်းနှုလုံးကောင်းရှိတဲ့သူ
ဆိုဆုံးမလွယ်သူမှလည်း ဆိုဆုံးမရကျိုးလည်းနပ်မှာ သူတော်သူမြတ်များကလည်း လက်တွဲဖေးမပြီးခေါ်ယူသွားကြမှာပါ။
သူတော်ကောင်းတွေနဲ့ဆက်လက်ပေါင်းသင်းခွင့်ရလို့သာ
ထိုသူတောင်ကောင်းတွေရဲ့ အယူအဆတွေကိုလည်းသိခွင့်ရ၊
အမူအကျင့်တွေကျင့်ကြံအားထုတ်ပုံတွေကိုလေ့လာသင်ယူခွင့်ရပြီး
အတုလိုက်ကျင့်ကြံမှသာ ထိုသူတော်စဉ်ကြီးများကဲ့သို့ မြင့်မြတ်သူများဖြစ်လာနိုင်မယ်မဟုတ်ပါလား။
သို့သော် တတ်သိနားလည်သူများကပြောဆိုဆုံးမသည်ကို နားမထောင်ဘူးလက်မခံဘူးဆိုရင်တော့ ထိုဆိုဆုံးမမရဒုဗ္ဗစမျိုးဟာ ဘယ်လိုမှတိုးတက်ကြီးပွားလမ်းမရှိနိုင်တော့ပါဘူး။ မေတ္တာသုတ္တာန်အဖွင့်မှာတော့ ဆိုဆုံးမခက်သူသုံးဦးရှိကြောင်းကို အောက်ပါအတိုင်း ဖွင့်ပြထားပါတယ်။
*ဆိုဆုံးမမရ ဒုဗ္ဗစ(၃)မျိုး*
(၁) ဆုံးမမှုကိုငြင်းဆန်သူ-
အရှင်ဘုရား၊ “ဒီလိုမပြောသင့် ဒီလိုမလုပ်သင့်ပါဘူးဘုရား” လို့ သွားရောက်ပြောဆိုဆုံးမရင် “နေပါဦးအရှင်ဘုရားက တပည့်တော် ဘာလုပ်တာကိုတွေ့လို့ ဒီလိုလာပြောတာလဲ၊အရှင်ဘုရားကို တပည့်တော်လုပ်တယ်လို့ ဘယ်သူကပြောတာလဲ၊
အရှင်ဘုရားဥပေဇ္ဈာယ်ဆရာနဲ့တပည့်တော်ဆရာက ဂိုဏ်းဂဏချင်းတူလို့လား ကိုယ့်ဂိုဏ်းကိုယ့်ဝါဒ ကိုယ်ယုံကြည်ရာကိုယ်လုပ်နေကြတာပဲမို့လား”စသည်ပြန်လှန်ပြောဆိုကာ ဆုံးမမှုကို လုံးဝလက်မခံတဲ့သူမျိုး၊
(၂)ပြန်မပြောနားမထောင်လုပ်တတ်သူ-
တစ်ချို့လူမျိုးကြပြန်တော့ အပြစ်တစ်စုံတစ်ခုလုပ်လို့ တာဝန်ရှိသူများကခေါ်ယူဆုံးမရင် တုဏှီဘာဝေဆိတ်ဆိတ်နေပြီး ‘ပြောတာမောရင်ရပ်သွားလိမ့်မယ်။ သူပြောနိုင်လှတစ်ခဏပေါ့’ဆိုကာထိုင်နေလေ့ရှိတဲ့ သူမျိုးပေါ့၊နောက်ကျတော့လည်း အမြဲကျုးလွန်တာပါပဲ။နောက်ဆုံးဘယ်လိုမှပြောဆိုတားမြစ်မရတော့မှ လက်လျှော့လိုက်ရတဲ့သူမျိုး။
(၃)အပြောနဲ့အလုပ်မညီသူ-
သွားဆုံးမရင် “မှန်ပါဘုရား ကျေးဇူးတင်လိုက်တာ အရှင်သာရိပုတ္တရာတောင်ကိုရင်လေးကသင်္ကန်းမညီမညာဖြစ်လို့သွားပြောတာလက်ခံသေးတာပဲ၊
အရှင်ရာဟုလာဆိုမနက်ခင်းအမှိုက်ကျုံးတဲ့အခါတိုင်းသဲတစ်ဆုပ်ယူပြီး “ဤလက်ထဲကသဲတွေနဲ့အမျှ ဆုံးမမယ့်ဆရာများနဲ့တွေ့ရပါလို၏”လို့ဆုတောင်းခဲ့သေးတာပဲ။ အရှင်ဘုရား သတိပေးဆုံးမတာကို လက်ခံပါတယ်”လို့ပြောဆိုတတ်ပေမယ့် လက်တွေ့မှာတော့မပြုပြင်ပဲ လုပ်ချင်ရာဆက်လုပ်နေသူမျိုး။
အထက်ပါသုံးဦးကိုတော့ ‘ဆုံးမမရ ဒုဗ္ဗစများ’လို့ ဆိုထားပါတယ်။ စာရှုသူများလည်းဗဟုသုတရအောင် ဘုရားရှင်ကိုယ်တိုင်ကြုံတွေ့ခဲ့ရ ဆုံးမမရခဲ့တဲ့ ဒုဗ္ဗစပုဂ္ဂိုလ်အချို့ကိုတင်ပြပေးပါဦးမယ်။
*ဘုရားရှင်ကိုယ်တိုင်ပင် လက်လျှော့ထားရသူ*
ဘုရားလောင်းနဲ့တစ်ချိန်တည်းအတူတူဖွားမြင်ခဲ့ပြီး တောထွက်စဉ်ကနောက်တော်ပါးက လိုက်ပါခွင့်ရခဲ့၊ ဘုရားဖြစ်ပြန်တော့လည်း တစ်ကျောင်းတိုက်ထဲမှာ အတူတူနေခွင့်ရခဲ့ အရှင်ဆန္ဒမထေရ်ကို သိကြမယ်ထင်ပါတယ်။
တကယ်ဆိုတရားထူးရဖို့ သူ့လောက်အခွင့်သာခဲ့သူမရှိသလောက်ပါပဲ။ဒါပေမယ့် တရားထူးမရတဲ့အပြင်ဘုရားရှင်ကိုယ်တိုင်ကပင် ဆုံးမမရလို့လစ်လျူရှု ဗြဟ္မဒဏ်ပေးခဲ့ရပါသတဲ့ ဆိုဆုံးမမရ ဒုဗ္ဗစကြီးဖြစ်နေလို့ပါပဲ။
သူ့ရဲ့ ၀ိနည်းနဲ့မညီတဲ့အပြုမူ အပြောဆိုတွေကို တွေ့မြင်ရတဲ့အခါ အခြားသီတင်းသုံးဖော်ရဟန်းတော်တွေက ဆုံးမပြောဆိုပြီးတားမြစ်ကြတာပေါ့။ဒါပေမယ့်သူကဘုရားရှင်ရဲ့အမျိုးအရင်းကြီးလည်းဖြစ်၊တောထွက်တုန်းကလည်း
လိုက်ပါခွင့်ရခဲ့သူဖြစ်လေတော့ မာန်မာနတွေထောင်လွှားပြီး သူတစ်ပါးတွေဆုံးမတာကိုမနာခံတဲ့အပြင် သူက
“ ငါရှင်တို့ဟာ လေပြင်မုန်တိုင်း တိုက်ခတ်ပြီး ရောက်မိရောက်ရာ စုပြုံနေကြတဲ့သစ်ရွက်အမှိုက်တွေလို၊ မြစ်ကမ်းနံဘေးမှဟိုတစ်စုဒီတစ်စုကပ်နေကြတဲ့ ဒိုက်မှောက်တွေလို
ဟိုဟိုဒီဒီက လူပေါင်းစုံအကျင့်ပေါင်းစုံတွေ စုပြုံနေကြတာဖြစ်တယ်။
ဘာမှလည်းလောကကျင့်ဝတ်တွေကိုနားလည်ကြတာမဟုတ်ဘဲနဲ သူတစ်ပါးကိုသာ ပြောဆိုဆုံးမသင့်တယ် ထင်နေကြတယ် ၊တကယ်ဆုံးမရမှာက သင်တို့ကိုသာဖြစ်တယ်။ ငါတို့မင်းမျိုးကသာ ဘုရားအဖြစ်ပွင့်တော်မူပြီး သစ္စာတရားတွေဟောကြားနေလို့
ငါကသာ သင်တို့နားမလည်တာတွေဆုံးမရမယ်။ငါ့ကိုဘာမှလာမပြောကြနဲ့”လို့ရိုင်းပြစွာပြန်လှန်ပြောဆိုလေ့ရှိပါသတဲ့။
ထိုအကြောင်းကိုဘုရားရှင်ကြားသိရလို့ခေါ်ယူဆုံးမပေမယ့်လည်း မြင်းမြီးဆွဲဆန္ဒဟာဘယ်လိုမှ ဆုံးမလို့မရပါဘူး။
ဒါနဲ့ ဘုရားရှင်ပရိနိဗ္ဗာန်စံတော်မူခါနီးမှာ ငါ၏ဖွားဖက်တော် ဆန္ဒရဟန်းဟာ ငါဘုရားရှိစဉ်မှာတောင် ပြောဆိုဆုံးမမရသူဖြစ်နေတယ်၊ ပရိနိဗ္ဗာန်စံပြီးနောက်မှာ ပိုဆိုးပိုမိုက်နေလျှင်အကျိုးယုတ်ချေတော့မည်ဟုစဉ်းစားမိကာ အရှင်အာနန္ဒာအား
“အာနန္ဒာ… ငါဘုရား ကွယ်လွန်သောအခါ၌ ဆန္နရဟန်းအား ဗြဟ္မဒဏ်ပေးရမယ်”လို့ တချက်လွှတ်အမိန့်တော်ချမှတ်လိုက်ပါတော့တယ်။
အရှင်အာနန္ဒာမထေရ်က "မြတ်စွာဘုရား…အရှင်ဆန္ဒအား ဗြဟ္မဒဏ်ကို ဘယ်လိုပေးရမှာလဲဘုရား”ဟု မေးမြန်း လျှောက်ထားသည့်အခါ
မြတ်စွာဘုရားက
“ချစ်သား အာနန္ဒာ… ဆန္နရဟန်းပြောချင်ရာပြော လုပ်ချင်ရာလုပ်ပစေ။ တစ်စုံတစ်ဦးကမျှ ထိုဆန္နရဟန်းအား မတားမြစ်ရဘူး၊မပြောဆိုရဘူး၊သံဃာတော်များက သူ့အားအရူးတစ်ယောက်ကိုခွင့်လွှတ်ထားသလိုမျိုး ဥပေက္ခာထားကြရမယ်၊ သို့ပြုမူလိုက်ခြင်းသည်ပင် ဆန္ဒရဟန်းအတွက် ဗြဟ္မဒဏ်တည်း…”ဟု မိန့်တော်မူလိုက်ပါတော့တယ်။
*အရှင်ဆန္ဒအားဗြဟ္မဒဏ်ပေးကြပြီ*
အရှင်အာနန္ဒာသည် ဘုရားရှင်ပရိနိဗ္ဗာန်ပြုပြီးနောက် ပထမသံဃာယနာပွဲကိစ္စများကိုလည်းပြုလုပ်ပြီးစီးသောအခါ အရှင်ဆန္ဒအားဗြဟ္မဒဏ်ပေးရန်မိန့်တော်မူခဲ့ပုံကို သံဃာတော်အပေါင်းအားလျှောက်ကြားလိုက်ပါတယ်။သံဃာတော်များကလည်း သို့ဖြစ်လျှင်အရှင်အာနန္ဒာပင် ရှင်ဆန္ဒအားဗြဟ္မဒဏ်ကိုပေးလော့..ဟုတာဝန်ပေးလိုက်ကြပါတယ်။
ဒါပေမယ့်အရှင်အာနန္ဒာက အသျှင်ဘုရားတို့ အဘယ်သို့လျှင် အကျွန်ုပ်သည် ဆန္နရဟန်းအား ဗြဟ္မဒဏ်ကိုထားခြင်းငှါစွမ်းနိုင်ပါအံ့နည်း အရှင်ဆန္ဒသည်အလွန်ပင်ပြောရဆိုရခက်ပြီး ကြမ်းတမ်းခက်ထန်သူတစ်ယောက်ဖြစ်ပါတယ်..လို့ပြန်လည်လျှောက်ထားရာမှ သံဃာ့မထေရ်ကြီးများက အရှင်အာနန္ဒာဦးဆောင်ပြီး များစွာသောရဟန်းတို့နှင့်အတူသွားကာ သံဃာအားဖြင့် ဗြဟ္မဒဏ်ပေးကြဖို့ရန် စီမံကြရပါတော့တယ်။
သို့ဖြင့် အရှင်အာနန္ဒာကိုယ်တိုင် သံဃာတော်များကိုဦးဆောင်လျှက် အထက်အညာသို့ ဆန်တက်သော လှေဖြင့် ကောသမ္ဗီ ပြည်သို့ ဆန်တက်ကာ ဥတေနမင်းရဲ့ ဥယျာဉ်အနီး တစ်ခုသော သစ်ပင်ရင်းမှာ ခေတ္တခဏသီတင်းသုံးနားနေတော်မူကြပါတယ်။
ထိုသတင်းကို ဥယျာဉ်တော်အတွင်းက ဥတေနမင်းရဲ့မောင်းမမိဿံအခြွေရံတို့ကြားသိရပြီး သူတို့ကိုနန်းတော်တွင်းမှာ စာလာသင်ပေးဖူးတဲ့အရှင်အာနန္ဒာမထေရ်အားသွားရောက်ဖူးမြော်လိုကြောင်း ဥတေနမင်းအား ခွင့်တောင်းကြရာ ဥတေနမင်းကြီးလည်းသွားရောက်ဖူးမြော်ကြဖို့အခွင့်ပေးလိုက်ပါတယ်။
ထိုအရှင်အာနန္ဒာတို့ခေတ္တနားခိုသီတင်းသုံးနေကြစဉ်ပင် ဥတေနရဲ့ အခြွေရံများရောက်လာကြပြီး ဖူးမြော်ကန်တော့ကြပါတယ်။ အရှင်အာနန္ဒာဦးဆောင်တဲ့သံဃာတော်များကိုလျှပ်တစ်ပြက်ဖူးမြင်ကြရတာမို့ မည်သည့်လှူစရာတစ်စုံတစ်ခုမျှမပါလာကြရကား
သူတို့ကိုယ်မှာခြုံထားကြတဲ့ ဆာရီဝတ်ရုံများကိုသင်္ကန်းလျှာအ၀တ်အဖြစ်အသုံးပြုဖို့ လှူဒါန်းလိုက်ကြပါသတဲ့။
ဥတေနမင်းဆီပြန်ရောက်ကြတော့ မောင်းမများကိုယ်မှာခြုံထားတဲ့အဖိုးတန်ဆာရီတွေကိုမတွေ့ရတော့တာသတိထားမိပြီး ဘာတွေများလှုဒါန်းခဲ့ကြသေးလဲလို့မေးရာမှ ဆာရီများလှူဒါန်းခဲ့ကြကြောင်းပြောကြရာ-
ဥတေနမင်းမှာ … ''အဘယ့်ကြောင့် ရဟန်းအာနန္ဒာသည် ထိုမျှလောက် သင်္ကန်းများစွာကို ခံယူဘိသ နည်း၊ ရဟန်းအာနန္ဒာသည် အထည်ကုန်သွယ်ခြင်းကိုမူလည်း ပြုအံ့လော၊ အထည်ဆိုင်ကိုမူလည်း ခင်းကျင်းအံ့လော''ဟု ကဲ့ရဲ့ပြစ်တင်ကာ အရှင်အာနန္ဒာထံလိုက်သွားပါတော့တယ်။
XXXXXXXXXXXXXXXXXXXXXXXXXXXXXX
*ရဟန်းတော်များ အ၀တ်သင်္ကန်းကို အဆင့်ဆင့်အသုံးပြုကြပုံ*
အရှင်ဘုရားအာနန္ဒာထံရောက်လာတော့ “အရှင်ဘုရား တစ်ပါးထဲဖြစ်ပါလျှက် ဘာလို့ တပည့်တော်ရဲ့အပျိုတော်တွေလှူသမျှ ဆာရီငါးရာလုံးကို အလှုခံလိုက်ရပါသလဲဘုရား..လို့လျှောက်ထားလိုက်ပါတယ်။(လောဘကြီးလိုက်လေဟု ကဲ့ရဲ့ပြစ်တင်လိုရင်းပါ)
အရှင်အာနန္ဒာကလည်း “မင်းကြီး .. သင်္ကန်းရှားပါးတဲ့ရဟန်းများကိုခွဲဝေလှူဒါန်းဖို့ပါ..ဟုနားလည်အောင်ရှင်းပြပါတယ်။
ဒါပေမယ့် ဥတေနမင်းမှာ ဤမျှဖြင့်မကျေနပ်သေးပဲ …
အသျှင်အာနန္ဒာ အားနည်းသော အဲဒီသင်္ကန်းရှားပါးတဲ့ရဟန်းတွေရဲ့ အရင်ဝတ်ရုံနေတဲ့ သင်္ကန်းဟောင်းတွေကျ ဘာလုပ်ပစ်ကြမလဲဘုရား…လို့ထပ်အထွဋ်တက်ကာမေးလာပြန်ပါတယ်။
(၁)“မင်းကြီး ထိုသင်္ကန်းဟောင်းတို့ကို အပေါ်ခင်း ပြုလုပ်ကြပါတယ်…
ဒါဆို အရင်ကအပေါ်အခင်းဟောင်းတွေကရော..ဘုရားးးး
(၂)မင်းကြီး ထိုအပေါ်ခင်း အဟောင်းတို့ကို ခေါင်းအုံးစွပ်လုပ်ကြတာပေါ့။
ဒါဆိုအရင်က ခေါင်းအုံးစွပ်ဟောင်းတွေကိုလွှင့်ပစ်လိုက်ကြတာလားဘုရား
(၃)လွှင့်မပစ်ပါဘူးမင်းကြီး အရင်က ခေါင်းအုံးစွပ်တွေကိုတော့ မြေအခင်း လုပ်ကြတယ်။
ဒါဆိုအရင်ကမြေအခင်းဟောင်းကိုဘာလုပ်လိုက်ပါသလဲ ၊မီးထဲထည့်လိုက်သလားဘုရား။
(၄)မထည့်ပါဘူးမင်းကြီး အရင်ကမြေအခင်းအဟောင်းတွေကိုကျ ခြေသုတ်ပုဆိုးပြုလုပ်ကြတယ်။
မှန်ပါ အဲလိုအကျိုးရှိရှိဆက်သုံးသွားရင်တော့မဆိုးပါဘူးဘုရား။ ဒါဆိုအရင်ကခြေသုတ်ပုဆိုးဟောင်းတွေကျအမှိုက်ထဲထည့်လိုက်သလား။
(၅)မထည့်ပစ်ပါဘူးမင်းကြီး အရင်ကခြေသုတ်ပုဆိုးဟောင်းတွေကိုတော့ ဖုံခါတံမြက်စီး(ကြက်မွှေးကဲ့သို့) လုပ်ပြီးအသုံးပြုကြတာပါ။
ဟုတ်ပြီဘုရား၊အဲဒီအရင်ကတံမြက်စည်းလုပ်ထားတဲ့ သုံးမရတေ့တဲ့ အ၀တ်စုတ်တွေကိုရောဘယ်လိုလုပ်ပစ်ပါသလဲ။
(၆)နောက်ဆုံး ဘာမှသုံးလို့မရတဲ့ဖုံခါအ၀တ်ဟောင်းတွေကိုကျတော့
ဓားနဲ့ နုပ်နုပ်စဉ်းထောင်း၍ ညွန်ဖြင့် နယ်ပြီးလျှင် ကျောင်းနံရံတွေခိုင်ခံ့အောင် လိမ်းကျံပြီး
အကျိုးရှိအောင်အသုံးပြုကြပါတယ်..လို့ရှင်းပြလိုက်ပါတယ်။
…………………………..
မင်းကြီးလည်း အရှင်အာနန္ဒာရဲ့ ရဟန်းတော်များသင်္ကန်းဟောင်းများကိုအဆင့်ဆင့်အသုံးပြုပုံကိုကြားရတော့မှ ကဲ့ရဲ့ပြစ်တင်လိုတဲ့ ဒေါသအစား ကြည်ညိုမှုသဒ္ဓါတရားတွေတဖွားဖွားပေါက်လာကာ…
''သာကီဝင်မင်းသား ဘုရားအနွယ်တော်ဖြစ်သော ရဟန်းတို့သည် သင့်လျော်အောင် ဆောင်ရွက်ကုန်၏၊ အကျိုးမဲ့ ပျက်စီးခြင်းသို့ မရောက်စေကုန်''ဟု ချီးမွမ်းပြောဆိုတာ အသျှင်အာနန္ဒာအတွက်နောက်ထပ် ခြုံထည် ငါးရာတို့ကိုပေးလှူပြန်ပါတယ်။
ထိုတခဏချင်းပင်လျှင် အသျှင်အာနန္ဒာအား သင်္ကန်း တစ်ထောင်အလှူခံရရှိသွားပါသတဲ့။
…………………….
*ဖွားဖက်တော်နှစ်ဦး တွေ့ဆုံကြခြင်း*
ထို့နောက် အသျှင်အာနန္ဒာမထေရ် သံဃာတော်များစွာခြံရံလျှက် အရှင်ဆန္ဒမထေရ်သီတင်းသုံးရာ ဃောသိတာရုံကျောင်းသို့ ကြွသွားတဲ့အခါ အသျှင်ဆန္နက အရှင်အာနန္ဒာကိုလာရောက်ဖူးမြော်ပါတယ်။
(အရှင်အာနန္ဒာနှင့် အရှင်ဆန္ဒတို့သည် တစ်နေ့တည်းတစ်ချိန်တည်းဖွေးဖွားခဲ့ကြတဲ့ ဘုရားရှင်၏ဖွားဖက်တော်ကြီးများဖြစ်ကြသောကြောင့် ထိုအချိန်၌ သက်တော်(၈၀)မျှပင် ရှိကြပြီဖြစ်သော်လည်း ၊အရှင်အာနန္ဒာက ရဟန္တာဖြစ်နေပေပြီ၊အရှင်ဆန္ဒမထေရ်ကြီးကား ဒုဗ္ဗစ္စကြီးဖြစ်နေဆဲ ၊သို့သော် သူအားကိုးသည့်ဘုရားရှင်မရှိတော့ပြီဖြစ်သဖြင့် စိတ်အားငယ်စ ပြုလာနေချိန်ဖြစ်၏)
အသျှင်အာနန္ဒာကစကားစလိုက်ပါတယ်…
''ငါ့သျှင် ဆန္န ဘုရားရှင်နောက်ဆုံးမိန့်မှာတော်မူခဲ့တဲ့စကားတော်အတိုင်း သံဃာအားလုံးက သင့်အား
ဗြဟ္မဒဏ်ထားလိုက်ကြပြီဖြစ်တယ် ၊ထိုအကြောင်းကိုသိစေဖို့ ငါလာခဲ့ခြင်းဖြစ်တယ်''
“အရှင်ဘုရား အာနန္ဒာ ဗြဟ္မဒဏ်ဆိုတာ ဘာဘာလဲဘုရား “
“ငါ့သျှင် ဆန္န ..သင်သည် ရဟန်းတို့ကို ပြောလိုရာပြောဆိုခွင့်ရှိပေသည်။ သို့သော် ရဟန်းသံဃာအားလုံးက သင့်ကို
ကောင်းသည် ဆိုးသည် တစ်စုံတစ်ခုမျှ အရေးတစ်ယူလုပ်၍ ပြောကြတော့မည်မဟုတ် ၊
ဤသည်ပင် ဘုရားရှင်အလိုတော်ကျ ၊ဗြဟ္မဒဏ်ထားကြခြင်းဖြစ်တယ်"
''ဟာ အဲလိုတကယ်ပဲ တပည့်တော်အပေါ်ဆက်ဆံကြတော့မှာလားဘုရား
သီတင်းသုံးဖော်တို့က တပည့်တော်ကိုအရေးတယူမလုပ်ကြ မပြောဆို မဆုံးမ ကြတော့ဘူးဆိုရင်
တပည့်တော်ဘ၀က ဘာထူးတော့မှာလဲဘုရား။ ဒီအပြစ်ဒဏ်မျိုးကတပည့်တော်ကိုအရှင်လတ်လတ်သတ်ပစ်လိုက်သလို သံဃာ့အဖွဲ့မှထုတ်ပစ်လိုက်သလိုပါပဲဘုရား။အခြားအပြစ်တခုခုကိုသာတပည့်တော်ကိုပေးပါ။မပြောမဆိုမဆုံးမပဲမနေပါနဲ့"လို့ ထိုပြစ်ဒဏ်မျိုးမချမှတ်ရန်လျှောက်ထားပါသေးတယ်။ သို့သော်အရှင်အာနန္ဒာက..
“ငါ့ရှင်ဆန္ဒ သင်သည်ပင် ဒီလိုအခွင့်ရေးမျိုးကိုရယူလိုခဲ့သည်မဟုတ်ပါလော။ ဟိုယခင်ဘုရားရှိတော်မူစဉ်အခါကပင် ရဟန်းတော်သီတင်းသုံးဖော်တို့က လာရောက်ပြောဆိုဆုံးမကြလျှင် လက်မခံပဲပြန်လှန်သာပြောဆိုခဲ့ဖူးတယ်။ဒီတော့ မလိုက်နာတဲ့သူကိုဆုံးမပြောဆိုနေလို့လည်း မောရုံသာအဖတ်တင်မယ်။ အမှန်တကယ်က ဒီပြစ်ဒဏ်ဟာ သင့်ကိုချတယ်ဆိုပေသည့် သင်နှင့်ရဟန်းတော်များအကြား အချင်းချင်းစွပ်စွဲပြောဆိုကာ အဆင်မပြေဖြစ်မှာကိုစိုးတော်မူခဲ့ခြင်းကြောင့်သာ ၊ သင်လိုချင်ဖြစ်ချင်တဲ့ဆန္ဒအတိုင်း ဗြဟ္မဒဏ်ပေးရစ်ကြဖို့ မိန်ှ့တော်မူခဲ့ခြင်းဖြစ်တယ်''လို့ပြန်လည်ပြောဆိုလိုက်ပါတယ်။
********************************
အရှင်ဆန္ဒမှာ ထိုသို့သူ့အား ဗြဟ္မဒဏ်ပေးလိုက်ပြီဖြစ်ကြောင်း (သံဃာထုမှ မျက်ကွယ်ပြုလိုက်ပြီဖြစ်ကြောင်း)
သတင်းစကားကြားလိုက်ရသည်တွင် မခံစားနိုင်ဖြစ်ပြီး သတိလစ်လဲကျကာ မေ့မြောသွားပါတော့တယ်။
*******************************
ထိုအခါမှ နောက်ပါရဟန်းတော်များလည်းသတိရအောင်ပြုစုပေးပြီး အရှင်အာနန္ဒာနဲ့အတူ ရာဇဂြိုဟ်သို့ ပြန်ကြွသွားကြပါတယ်။
နောက်ရက်များမှာ အရှင်ဆန္ဒဟာ တခြားသီတင်းသုံးဖော်များကို လိုက်လံစကားပြောကြည့်တယ်။
ရဟန်းတော်လေးပါးစကားတရားစကားဆွေးနွေးနေတဲ့စကားဝိုင်းထဲ ၀င်ထိုင်လိုက်ပြီး အရှင်ဘုရားများဘာတွေဆွေးနွေးနေကြပါလိမ့်ဗျာ..လို့သွားစကးစလိုက်ပါတယ်။
ဒါပေမယ့် တစ်ပါးမှသူ့စကားကိုအရေးတယူမလုပ်ကြပဲ သူတို့လေးပါးအချင်းချင်းသာဆက်လက်ဆွေးနွေးနေကြပါသတဲ့။ဒီတင် သူဟာအပယ်ခံကြိးဖြစ်လာတယ်၊လူကောင်းတစ်ယောက်ဖြစ်ပါလျှက်အရူးကြီးပမာစွန့်ပစ်ခံထားရတာကို သဘောပေါက်လာမိတယ်။
ဟာ …သွားပြီ၊သွားပြီ ငါမာန်တွေတက်ပြီး သံဃာကိုစော်ကားမိတာမှားပါပေါ့လား..သူနောင်တတွေတသီကြီးလက်ဆောင်ရလိုက်ပါတော့တယ်။
……………………………..
* အရှင်ဆန္ဒဗြဟ္မဒဏ်မှ လွတ်ပြီ *
ဒီလိုနဲ့ အသက်ကလည်းရှစ်ဆယ်မငယ်တော့ဘူး။ အသက်ကြီးမှတစ်သက်တစ်ကျွန်းကျခံနေရသူလို ဗြဟ္မဒဏ်ဖြင့် နှိပ်စက်သောကြောင့်လည်းကောင်း၊ ရှက်သောကြောင့်လည်းကောင်း၊ စက်ဆုပ်သောကြောင့်လည်းကောင်း တစ်ယောက်ထီးတည်း ဆိတ်ငြိမ်ရာသို့ ကပ်လျက် မမေ့ လျော့သည် ဖြစ်၍ ပြင်းစွာ အားထုတ်သည်ဖြစ်၍ တည်ကြည်သော စိတ်ရှိသည်ဖြစ်၍ နေသည်ရှိသော် များမကြာမီကာလမှာပဲ ရဟန္တာဖြစ်သွားပါတော့တယ်။
ရဟန်းကိစ္စပြီးသောအခါမှာ အရှင်အာနန္ဒာကိုသွားရောက်ဖူးမြော်ကန်တော့ရင်း
''အသျှင်အာနန္ဒာ တပည့်တော်အားချမှတ်ထားတဲ့ ဗြဟ္မဒဏ်ကို ပြန်လည်ရုပ်သိမ်းပေးပါဘုရား'' လျှောက်ထားလိုက်ပါတယ်။
ထိုအခါရှင်အာနန္ဒာက ငါ့သျှင်ဆန္န ဗြဟ္မဒဏ်ဆိုတာ ဆိုဆုံးမရခက်ပြီး သံဃာတော်များနဲ့အဆင်မပြေတဲ့
ဒုဗ္ဗစဆန္ဒအပေါ်မှာသာ ချမှတ်တော်မူခဲ့ခြင်းဖြစ်ပေတယ် ။
သင်အရဟတ္တ ဖိုလ်ကို မျက်မှောက်ပြုသော နေ့မှစ၍ပင် သင့်အား ဗြဟ္မဒဏ်မှကင်းလွတ်စေပြီးဖြစ်တယ်”လို့
ရှင်းပြမိန့်တော်မူလိုက်ပါတယ်။
Xxxxxxxxxxxxxxxxxxxxxxxxxxxxx
အထက်ပါဝတ္ထုဇာတ်လမ်းကိုစဉ်းစားကြည့်လျှင် ဆိုဆုံးမမရဒုဗ္ဗစများဟာ တရားထူးမရနိုင်ဘူးဆိုတာထင်ရှားပါတယ်။ အရှင်ဆန္ဒသည်ပင်လျှင် ဘုရားရှင်ကဗြဟ္မဒဏ်ပေးကာ မာနကျိုးသွားအောင်ချိုးနှိမ်မပေးခဲ့ပါက၊ ဆုံးမနှိပ်ကွတ်တော်မမူခဲ့ပါက ဒုဗ္ဗစရဟန်းတစ်ပါးအဖြစ်ဖြင့်ပင်ဘ၀နိဂုံးချုပ်ကာ အပါယ်မှာဆုံးဆုံးမြုပ်ရမှာမလွဲပါဘူး။
ထိုအဖြစ်ကိုမြင်တော်မူ၍သာ ပြန်လည်လိမ္မာရေးခြားရှိလာအောင် ဖွားဖက်ကေတ်ာသူငယ်ချင်းကြီး မြင်းမြှီးဆွဲမောင်ဆံအား သံသရာဝဋ်ဆင်းရဲမှ ကယ်မတော်မူခဲ့ခြင်းပင်မဟုတ်ပါလား။
ထို့ကြောင့် စာရှုသူများလည်း လောကီလောကုတ်အကျိုးမယုတ်ကြစေဖို့
မေတ္တာသုတ်တော်လာ သုဝစော စဆိုတဲ့ (ဆိုဆုံးမလွယ်သူအဖြစ်ဆိုတဲ့)ဂုဏ်အင်နဲ့ပြည့်စုံအောင် ၊တတ်သိနားလည်သူများက ပြောဆိုဆုံးမလာသည့်အခါ မိမိမျက်နှာက အညစ်အကြေးချေးညှော်တွေကို
သန့်စင်ဆေးကြောပေးသူတစ်ယောက်အဖြစ်သဘောပေါက်ပြီး လိုက်နာကျင့်ကြံနိုင်အောင်ကြိုးစားကြဖို့ တိုက်တွန်းလိုက်ရပါတယ်။
သုဝစဆိုတဲ့ ဆိုဆုံးမလွယ်ခြင်းဂုဏ်နဲ့ ပြည့်စုံနိုင်ကြပါစေ
လင်္ကာအရှင်-မုံရွာ
No comments:
Post a Comment