အလှူဒါနတစ်ခုကို ခွဲခြမ်းစိတ်ဖြာကြည့်လိုက်လျှင်
ဒါနပါရမီ ၊ဒါနဥပပါရမီ နှင့် ဒါနပရမတ္ထပါရမီဟူ၍ သုံးမျိုးသုံးစားရှိကြောင်းတွေ့ရပေမည်။
(၁) သာမညမိမိကိုယ်နှင့်မဆက်စပ်သော အပယိကပစ္စည်းဝတ္ထုအလှူဒါနတို့ကို ဒါနပါရမီ+ဓနပရိစ္စာဂ(ပုတ္တပရိစ္စာဂ+ဘရိယပရိစ္စာဂ) ဟု၎င်း။
(၂) မိမိ၏ လက်ခြေအင်္ဂါ မျက်လုံး နှလုံးကျောက်ကပ်စသည်ကို စွန့်လွှတ်လှူဒါန်းပါက ဒါနဥပပါရမီ + အင်္ဂပရိစ္စာဂ ဟု၎င်း၊
(၃) မိမိ၏အသက်ကိုပင် စွန့်လွှတ်လှူဒါန်းပါက ဒါနပရမတ္ထပါရမီ+ဇီဝိတပရိစ္စာဂဟု၎င်း..ဖွင့်ဆိုထား၏။
နောက်တစ်နည်းအားဖြင့် သုံးသပ်ပြန်ပါကလည်း အင်္ဂုတ္ထိုရ် ပဉ္စကနိပါတ် ဘောဇနသုတ်မှာ ဘုရားရှင်ကိုယ်တော်တိုင်ပင် ဆွမ်းစသော စားသောက်ဖွယ်ရာတွေကိုပေးလှူသူသည်
ငါးမျိုးသော အရာဌာနတို့ကိုပေးလှူသည် မည်၏။
အဘယ်ငါးမျိုးတို့နည်းဟူမူ-
အသက်ကို ပေးလှူသည် မည်၏။
အဆင်းကို ပေးလှူသည် မည်၏။
ချမ်းသာကို ပေးလှူသည် မည်၏။
ခွန်အားကို ပေးလှူသည် မည်၏။
ပညာကို ပေးလှူသည် မည်၏။
လို့ မိမိအသက်ကိုပင်ပေးလှူသည်မည်ကြောင်းကို ဟောကြားတော်မူခဲ့ပါတယ် ။
ဒီစားသောက်ဖွယ်ကိုပေးလှူကာမျှဖြင့် အသက်ကိုပင်ပေးလှူလိုက်တယ် ဆိုတာလည်း အမှန်ပါပဲ ။ ဒီမိမိ၏ ကာယအား ညာဏအားနဲ့ရှေးအတိတ်
ကုသိုလ်ကံတို့ကြောင့်ဖြစ်ပေါ်လာတဲ့ ဆွမ်းစတဲ့အာဟာရတွေဟာ အသက်ရှည်ရာ အနာမဲ့ကြောင်းတွေပဲ မဟုတ်ပါလား ။
အစာရေစာဆိုတဲ့ အသက်ရဲ့ပင်မသွေးကြောကြီးကို ဖြတ်တောက်လိုက်ပါက ထိုသတ္တ၀ါ၏အသက်ဟာ ဘယ်လိုမှဆက်နိုင်တော့မှာမဟုတ်ပါဘူး။ ဒါကိုထင်ရှားပြလိုတော်မူသော မြတ်ဗုဒ္ဓက ဆွမ်းစတဲ့အာဟာရကို မျိုးစေ့ကိုပြုတ်၍ စားပစ်လိုက်သကဲ့သို့ မိမိဖာသာစားးသုံးရင် မိမိကိုယ်တိုင်အသက်ရှည်ခြင်း ၊အဆင်းလှခြင်း၊ခွန်အားကြီးခြင်း ၊ကိုယ်ကျန်းမာ စိတ်ချမ်းသာခြင်းတွေရရှိနိုင်ပါကြောင်း၊
ကောင်းမွန်စွာလေ့လာမှတ်သား သင်ကြားနိုင်ခွင့်ရပြီး ညာဏ်ပညာကြီးမားခြင်းအကျိုးတွေရရှိမှာဖြစ်ပါကြောင်း ။
အဲ…မိမိမစားသောက်တော့ပဲ ရရှိလာတဲ့မျိုးစေ့ကိုစိုက်ပျိုးလိုက်ဘိသကဲ့သို့ တကယ်လိုအပ်နေတဲ့နေရာမှာ လိုအပ်တဲ့သူတွေကိုပေးလှုလိုက်ပါက ထိုအကျိုးတရားတို့ဟာ အလှူခံပုဂ္ဂိုလ်က ရရှိခံစားသွားရပြီး အလှုရှင်ကလည်း မိမိ၏ အသက် ။ချမ်းးသာ ၊စည်းစိမ်ဥစ္စာကိုပင် ပေးလှူရာရောက်တဲ့အကြောင်းကို အကျယ်တ၀ံ့ ဖွင့်ဆိုဟောကြားသွားတော်မူခဲ့တာပါ။
ဒီလိုပေးလှူလိုက်တဲ့အလှူရှင်ဟာလည်း သဒိသံ ပါကံ ဇနေတိ ၊ဆိုတဲ့အတိုင်း အသက်လှူလျှင် အသက်ကိုပင်ပြန်လည်ရရှိပါကြောင်း ၊ဥစ္စာလှူက ဥစ္စာဓနပေါကြွယ်ဝမည်သာဖြစ်ပါကြောင်း အောက်ပါအတိုင်း ဆက်လက်ဟောကြားတော်မူထားပြန်ပါတယ်။
ထိုဆွမ်းအလှုရှင်သည် အသက်ကို ပေးလှူသည်မည်ခြင်းကြောင့် နတ်သက်သော်လည်းကောင်း၊ လူသက်သော်လည်းကောင်းရှည်ရန်ဖြစ်၏၊
အဆင်းကို ပေးလှူသည်မည်ခြင်းကြောင့် နတ်အဆင်းသော်လည်းကောင်း၊ လူအဆင်းသော်လည်းကောင်း လှရန် ဖြစ်၏၊
ချမ်းသာကို ပေးလှူသည်မည်ခြင်းကြောင့် နတ်ချမ်းသာသော်လည်းကောင်း၊ လူချမ်းသာသော်လည်းကောင်း ရရန်ဖြစ်၏၊
ခွန်အားကို ပေးလှူသည်မည်ခြင်းကြောင့် နတ်ခွန်အားသော်လည်းကောင်း၊ လူခွန်အားသော်လည်းကောင်း ကြီးရန်ဖြစ်၏၊
ပညာကို ပေးလှူသည်မည်ခြင်းကြောင့်နတ်ပညာသော်လည်းကောင်း၊ လူပညာသော်လည်းကောင်း ရှိရန်ဖြစ်၏၊
……………..……………………….
ဒီတော့ ဟုတ်ပြီဘုရား မိမိအသက်တမျှအရေးကြီးနေတဲ့ မစားရလျှင် အသက်ပင်ရှင်ဖို့မလွယ်တော့တဲ့ဆွမ်းကို ပေးလှူသူတွေကော ရှိဖူးပါသလား…လို့များ ပေါက်ပေါက်ရှာရှာမေးလာခဲ့လျှင်လည်း ။သာသနာ့သမိုင်းမှာ ရှိခဲ့ဖူးပါကြောင်း ရှာဖွေတင်ပြပေးပါဦးမယ်နော် -
ရဟန်းတော်များကျင့်သုံးလိုက်နာရမည့် အကျဉ်း(၂၂၇)အကျယ်အားဖြင့် ကုဋေကိုးထောင် တရာ့ရှစ်ဆယ်နှင့် ငါးသန်း သုံးသောင်း ခြောက်ထောင်မျှရှိသော သိက္ခာပုဒ်တို့တွင် ပါဋိဒေသနီ (အသီးခြားဒေသနာကြားကုစားရသော)
အားပတ်လေးပါးတို့မှ ပထမ သိက္ခာပုဒ်ဖြစ်ပေါ်လာရခြင်းအကြောင်းအတ္ထုပ္ပတ်မှာ လွန်စွာ စိတ်ဝင်စားဖွယ်ကောင်းဘိသကဲ့သို့ လွန်စွာလည်းစိတ်မကောင်းဖြစ်ရပေ၏။
ပဌမပါဋိဒေသနီ သိက္ခာပုဒ်
ဖြစ်ပေါ်လာပုံမှာ ဘုရားရှင် သာဝတ္ထိမြို့မှာ သီတင်းသုံးနေတော်မူစဉ်တွင် သဒ္ဓါတရားအလွန်အင်မတန်မှထက်သန်သော ရဟန်းမလေးတစ်ပါးရှိခဲ့လေ၏။ သူမသည် ဆွမ်းခံလှည့်လည်၍ ရရှိလာသောဆွမ်းကို မိမိတို့သာသနာအနေနှင့်
အစ်ကိုကြီးများဖြစ်ကြသည့် ရဟန်းတော်များဆွမ်းခံကြွသည်နှင့်ကြုံလျှင် လှူဒါန်းပူဇော်လေ့ရှိ၏။
တချို့သံဃာတော်များသည်ကား အမျိုးသမီးရဟန်းမလေးကိုသနား၍
အလှူမခံပဲ ပယ်ဖြစ်ခဲ့ကြ၏။ အချို့ရဟန်းတော်များက သူမအတွက်လည်း ဆွမ်းဘုဉ်းပေးလောက်။ မိမိလည်းမျှတရုံမျှခွဲဝေခံယူကာ စာနာစိတ်ထားကြ၏။
သို့သော် မဟာလောဘကုမ္မာရ အလိုကြီးသော ရဟန်းတော်များနှင့်ဆွမ်းခံအပြန်မှာတွေ့လျှင်ကား ဆွမ်းသပိတ်တစ်လုံးလုံး
အလှူခံယူဆောင်သွားကြ၍ သူမမှာ ဆွမ်းမစားရသည့်ရက်များလည်း ရှိခဲ့လေသည်။
ထိုရဟန်းမလေးးကတော့ မိမိအသက် ၊မိမိကျန်းမာရေးကိုပင် ပဓာနမထားပဲ ရသမျှဆွမ်းဆွမ်းဟင်းတို့ကိုရဟန်းတော်တို့ကိုသာ ပေးလှူမြဲဖြစ်သည်သာတည်း ။
ဤသို့ဖြင့် တစ်နေ့ဆွမ်းခံမှအပြန် ရဟန်းတော်တစ်ပါး ဆွမ်းခံလှည့်နေသည်ကိုမြင်လျှင် ''အရှင်ဘုရား ဆွမ်းအလှုခံတော်မူပါ'ဟု
ဖိတ်မန်လိုက်ရာ ထိုကိုယ်တော်ကလည်း နှစ်ခွန်းမလျှောက်ထားလိုက်ရပေ။
''ကောင်းပြီ ငါ့နှမ''ဟု ဆိုကာ ဆွမ်းကို အကုန်လုံး ခံယူလိုက်လေ၏။ ထိုရဟန်းမလေးမှာလည်း မွန်းတည့်အချိန် နီးလတ်ရကား ဆွမ်းခံလှည့်လည်ခြင်းငှါ မတတ်နိုင်သဖြင့် ဆွမ်းမစားလိုက်ရရှာတော့ပေ။
နှစ်ရက်မြောက်သော နေ့၌လည်းထိုနည်းတူစွာ ထိုကိုယ်တော်မှပင် ရဟန်းမလေးရသမျှကို အကုန်သိမ်းကြုံးအလှူခံသွားပြန်သဖြင့် သူမမှာ ဆွမ်းမဘုဉ်းရရှာတော့ပဲ နေခဲ့ရပြန်၏ ။ဤသို့ဖြင့်
လေးရက်မြောက်သော နေ့၌ကား ဆာလောင်မွတ်သိပ်ခြင်းဒဏ်ကို မည်သို့မျှအန်တုနိုင်စွမ်းမရှိတော့ပဲ မြို့အ၀င်လမ်းမပေါ်သို့ တုန်တုန်ရီရီဖြင့် ဆွမ်းခံထွက်ခဲ့ရရှာတော့၏။
ထိုစဉ်မှာ မြင်းရထားလုံးတစ်စီးသည်လည်း ခရီးရင်ဆိုင်မှ ဘဲလ်ကို အဆက်မပြတ်တီးလျှက် “ဘေးကို ၊ဘေးကို”ဟု အော်ဟစ်လမ်းတောင်းကာ တလကြမ်းမောင်းနှင်လာ ရဟန်းမလေးလည်း အားယူပြီး လမ်းဘေးသို့ ရှောင်လိုက်ရတော့၏။ မြင်းရထားဖြင့်မထိခိုက်မိလိုက်သော်လည်း ဆွမ်းမစားရသည်မှာ လေးရက်ဆက်တိုက်ပင်ရှိပြီဖြစ်သောကြောင့် မဟန်နိုင်တော့ပဲ မူးမေ့လဲကျသွားတော့၏။
ထိုမြင်းရထားပေါ်မှာစီးနင်းလိုက်ပါလားသူကား ထိုမြို့မှ သူဋ္ဌေးတစ်ဦးဖြစ်ရာ ရထားမောင်းသမားကိုအမြန်ရပ်ခိုင်း၍ ရဟန်းမလေးအား ချက်ချင်းသွားရောက်ပြုစုကာ အကြိမ်ကြိမ်တောင်းပန်လေတော့၏။
ထိုအခါ ထိုရဟန်းမလေးက သူဋ္ဌေးရထားနဲ့တိုက်မိသွားလို့ လဲကျရတာမဟုတ်ပါကြောင်းနဲ့ ဆွမ်းမစားရသည်မှာလေးရက်ပင်
ရှိပြီဖြစ်သောကြောင့် အားပြတ်လဲကျသွားရပါသည်ဟု ပြောဆိုသောအခါမှ ထိုရထားလုံးဖြင့်ပင် မိမိနေထိုင်ရာ အိမ်တော်သို့ပင်ဆောင်ကာ ဆွမ်းဆက်ကပ်လိုက်ရလေတော့၏။
သို့သော် ထိုသူဋ္ဌေးကြီးမှာ ဆွမ်းမစားရတာလေးရက်ပင်ရှိပြီဖြစ်သော ထိုရဟန်းမလေးကိုလည်း ကိုယ်ချင်းစာကရုဏာသက်မိ၏။ ထိုရဟန်းမလေးထံမှ ရရသမျှဆွမ်းဆွမ်းဟင်းတို့ကို နေ့စဉ်အကုန်ခံယူသွားသော ကိုယ်တော်ကိုလည်း စိတ်တွင်းမှ သဘောမကျနိုင်ပဲဖြစ်နေတော့၏။ ထိုအကြောင်းကို အခြားရဟန်းတော်တို့အားလျှောက်ကြားရာမှ ဘုရားရှင်တော်ထံ သတင်းပေါက်ကြားသွားတော့၏။
ဘုရားရှင်သည် ထိုဆွမ်းကိုလေးရက်တိုင်တိုင်အကုန်အလှုခံယူလိုက်သော ဦးလောဘကိုခေါ်ယူကာ “ဆွေရင်းမျိုးရင်းမို့များ ဒီလောက်တောင် ဆွမ်းကိုခံယူရသလား”ဟုမေးမြန်းတော်မူရာ ထိုရဟန်းမှ မည်သို့မျှမတော်စပ်ကြောင်း လျှောက်ထားရာ-
ဆွေမတော်မျိုးမစပ် သူတို့သည် ရင်းနှီးကြွမ်းဝင်သူများမဟုတ်ကြ၍
ပြည့်စုံသည် မပြည့်စုံသည် တစ်စုံတစ်ရာလျှောက်ထားကြမည်မဟုတ်ကြောင်း ။ မိမိသည် ထိုသူစိမ်းတစ်ရံဖြစ်သော ဘိက္ခုနီမထံမှာ ဆွမ်းကိုခံယူခြင်းသည် သီတင်းသုံးဖော်အချင်းချင်း မညှာတာ မငဲ့ကွက်ရာရောက်၍ လုံးဝမသင့်လျှော်ကြောင်း ပြစ်တင်ရှုံ့ချတော်မူ၍ -
ရဟန်းတော်အားလုံး ဆွေမျိုးတစ်စုံတစ်ရာ တော်စပ်ခြင်းမရှိသော ရဟန်းမထံမှ ဆွမ်းအလှူမခံရ ။ခံယူမိသောရဟန်းအား ပါဋိဒေသနီယအားပတ်သို့ သင့်ရောက်စေ…ဟု ၀ိနည်းစည်းကမ်းကို တင်းကြပ်စွာ ထုတ်ပြန်တော်မူခဲ့လေသည်။
……………………………………………………………………..
အထက်ပါ ၀တ္ထုကြောင်းကိုထောက်ဆကြည့်ပါက ထိုရဟန်းမလေးမှာ မိမိမှာ ပိုလျှံလို့လူဒါန်းသည်မဟုတ်ပဲ ။မိမိဘုဉ်းပေးသုံးဆောင်ရမည့်ဆွမ်းဘောဇဉ်ကိုပင် မစားပဲ အငတ်ခံကာ လှူဒါန်းခဲ့တာကိုတွေ့ရမည်ဖြစ်၏။
ထို့ကြောင့်ပင် ဘုရားရှင်တော်က ဆွမ်းဘောဇဉ်တို့ကိုပေးလှူသူသည် ဇီဝိတဒါန အသက်ကိုပင်ပေးလှူသည်မည်ကြောင်း တိုက်ရိုက်မိန့်ကြားတော်မူခဲ့ခြင်းဖြစ်၏။
ဤကဲ့သို့သော ဒါနမျိုးသည် ဒါနသာမန်မျှသာမဟုတ်မူ၍ ဒါနပရမတ္ထ မိမိ၏ အသက်ကိုပင် စွန့်လွတ်ကာ လှူဒါန်းသည်မည်ကြောင်းကိုလည်း နားလည်သဘောပေါက်ကြရမည်ဖြစ်၏။
ဆိုလိုသည်မှာ မိမိမှာပိုမှ လျှံမှ လှူဒါန်းသည်ဆိုက အပိုလျှံအပယိကကိုလှူဒါန်းခြင်းဖြစ်၍ ဒါန/ဓနပရိစ္စာဂ မျှသာ။
မိမိကိုယ်တိုင်သုံးဆောင်ခံစားရမည်ကိုပင် မစားမသောက်တော့ပဲ စွန့်လှူလိုက်ပါက ဒါနပရမတ္ထပါရမီအရာမြောက်ကာ ဇီဝိတပရိစ္စာဂအဆင့်အတန်းသို့ပင် ဆိုက်ရောက်သည်ဟူ၍ပင်။
...........................................................
(ဆက်လက်ဖော်ပြပါဦးမည် )
လင်္ကာအရှင်(မုံရွာ)
No comments:
Post a Comment