မေတ္တာသုတ်တော်လာ ကရဏီယမတ္ထကုသလေနအဖွင့်မှာ မိမိအကျိုးစီးပွား၌ ကျွမ်းကျင်လိမ္မာသူဆိုတာကတော့
မေတ္တာကျင့်စဉ်ကိုဟောကြားနေတာဖြစ်လို့ လောကုတ္တရာရေးရာ သီလသမာဓိပညာ၊ ဈာန်မဂ်ဖိုလ်အရာကို ဦးတည်ဖွင့်ဆိုနေတာဖြစ်ပါတယ်။
သို့ပေမယ့် စာရှုသူများ ဗဟုသုတရစေဖို့ စူဠသေဋ္ဌိဇာတ်တော်လာ အကျိုးစီးပွားရှာ ကျွမ်းကျင်လိမ္မာလို့၊အတ္ထ ကုသလဖြစ်လို့ နင်းပြားဘ၀မှ ကမ္ဘာကျော်သူဋ္ဌေးဖြစ်သွားသူ တစ်ဦး အကြောင်းကို ဗဟုသုတအဖြစ် တင်ပြပေးချင်ပါသေးတယ် ။ ဗာရာဏသီပြည်ကြီးမှာ ဘုရားအလောင်းတော်
ပညာရှိပရောဟိတ်ကြီးတစ်ဦးဖြစ်ခဲ့စဉ်က
မင်းနန်းတော်သွားရင်း လမ်းမပေါ်မှာ ကြွက်တစ်ကောင်သေနေတာကိုတွေ့လိုက်ရတယ် ။ အဲဒီအချိန်မှာပဲ ကြီးပွားချမ်းသာချင်တဲ့ ဆင်းရဲသားလေးတစ်ယောက်ကလည်း ပုရောဟိတ်ကြီးအနီးရောက်လာပြီး-
“ဆရာပုရောဟိတ်ကြီး ကျွန်တော်မျိုးမှာ ဆင်းရဲနွမ်းပါးလွန်းလို့ ရင်းနှီးစရာ တစ်စုံတစ်ရာလည်းမရှိပါဘူး။ အများသူငါလိုလည်း အရင်းအနှီးလုပ်ပြီး ကုန်သည်ပွဲစားလုပ်ကာ စီးပွားရှာချင်ပါတယ်။ ချမ်းသာမယ့်နည်းလမ်းကောင်းလေးတစ်ခုလောက် မစတော်မူပါ”လို့ ချမ်းသာမယ့်နည်း နိဿျည်းတောင်းတာပေါ့။ ဒီတော့ဘုရားလောင်းပုရောဟိတ်ကြီးက-
“ငါ့တပည့် ချမ်းသာချင်စိတ်ရှိရင် ချမ်းသူတစ်ယောက်ဖြစ်လာနိုင်ပါတယ်။ ချမ်းသာလိုစိတ်ရှိဖို့အဓိကအခရာပဲ၊ ဆန္ဒကြီးရင် ကြံသမျှပြီးနိုင်ပါတယ်။ လိမ္မာကျွမ်းကျင်တဲ့စီးပွားရေးသမားမျိုးဆိုတာ မီးပွားလေးကိုမီးပုံကြီးဖြစ်လာအောင်လုပ်နိုင်သလိုပဲ။ မပြောပလောက်တဲ့ အရင်းနှီးလေးနဲ့အစပြုပေမယ့်လည်း ကမ္ဘာကျော်သူဋ္ဌေးကြီးဖြစ်နိုင်တာပဲကွယ့်။
စီးပွားရေးအမြင်ရှိတဲ့သူဆိုတာ အခုလမ်းမပေါ်မှာသေနေတဲ့ ဒီကြွက်သေလေးကို အရင်းနှီးလုပ်ပြီး စီးပွားရှာရင်တောင်မှ ကမ္ဘာကျော်သူဋ္ဌေးတစ်ယောက်ဖြစ်လာနိုင်တယ်”လို့ ကြွက်သေလေးကိုညွှန်ပြ ပြောဆိုပြီး နန်းတော်ဆီသို့ ဆက်လက်ထွက်သွားပါတယ်။
ဒီနေရာမှာ သာမန်လူသာဆို ချမ်းသာနည်းလမ်းတောင်းပါတယ်ဆိုမှ လမ်းမပေါ်ကကြွက်သေလက်ညှိးထိုးပြီး ချမ်းသာနည်းကအဲဒီမှာလို့ ပြောရကောင်းလားလို့ စိတ်ဆိုးချင်လည်း ဆိုးမှာပေါ့။ ဒါပေမယ့် ထိုဆင်းရဲသားလေးကတော့ ပရောဟိတ်ကြီးစကားကို အသေချာမှတ်သားတယ်။ နောက်
‘တကယ့်ချမ်းသာနေကြတဲ့စီးပွားရေးသမားတွေဟာ အရင်းနှီးများများရှိလို့မဟုတ်ပဲ လုပ်ရည်ကိုင်ရည်ရှိလို့ဖြစ်တယ်’ ဆိုတာ သဘောပေါက်သွားတယ်။
ဒီလိုအသိညာဏ်မျိုးကို ထုတ်ပြပြောဆိုပြီး အဆုံးအမပေးသွားတဲ့ ပုရောဟိတ်ကြီးကို လည်းကျေးဇူးတင်လိုက်မိတယ်။ နောက်သူ့ရှေ့ကကြွက်သေလေးကိုကြည့်ပြီး …
ကဲ.. ဆရာပုရောဟိတ်က လုပ်ရည်ကိုယ်ရည်သာအဓိက အရင်းနှီးအများကြီးမလိုဘူးလို့သင်ကြားဆုံးမသွားပြီ၊ ငါ ဒီကြွက်သေတစ်ခုကို စတင်အရင်းနှီးပြုပြီး စီးပွားရှာမယ်လို့ဆုံးဖြတ်လိုက်ပြီး ကြွက်သေကိုယူကာ
ကြောင်ချစ်တတ်တဲ့ သူဋ္ဌေးကြီးတစ်ဦးထံသွားပြီး လက်ဆောင်သွားပေးလိုက်ပါတယ်။ ဒီတော့ထိုသူဋ္ဌေးကြီးကလည်း သူချစ်တဲ့ကြောင်လေးအတွက် လက်ဆောင်လာပေးတဲ့သူကို ဘာမှပြန်မပေးလိုက်ရင် မသိတတ်ရာကျမယ် တန်ရာတန်ကြေးတော့ပေးလိုက်မှဆိုပြီး အသပြာတစ်ပဲပေးလိုက်ပါသတဲ့။ သူဋ္ဌေးကြီးပေးလိုက်တဲ့အသပြာတစ်ပဲကို သူကမုန့်ပဲသွားရည်စာဝယ်စားတဲ့နေရာမှာ သုံးလိုက်တာမဟုတ်ပါဘူး။ တင်လဲခဲတွေကိုဝယ်ယူလိုက်ပါတယ်။
နောက်တောထဲက သစ်ခွစတဲ့တောပန်းမျာကိုရှာခူးပြီး မြို့တက်ရောင်းကြတဲ့ ပန်းခူးသမားတွေ တောကပြန်လာရင် ခရီးတစ်ထောက်နားရာဇရပ်ဆီသို့ သောက်ရေတစ်အိုးနဲ့
တင်လဲခဲများကိုယူသွားပြီး တင်လဲခဲတစ်ဖဲ့နဲ့ ရေတစ်မှုတ်စီ ဒါနပြုပါသတဲ့။
ဒီတော့ ခရီးကလည်းပန်း ရေကလည်းငတ်နေသူတွေကို ရေရောအချိုတင်လဲပါကျွေးလိုက်တော့ အရမ်းကျေးဇူးတင်သွားကြတယ်။ ဒါနဲ့သစ်ခွပန်းခူးရောင်းတဲ့သူတွေက သူ့ကိုသစ်ခွပန်းတွေလက်ဆောင်ပေးထားခဲ့တော့တာပေါ့။ ဒီသစ်ခွပန်းတွေကိုလိုက်ရောင်းပြီး ရတဲ့ငွေနဲ့တဖန် တင်လဲခဲများဝယ်ကာ ထိုပန်းခူးသမားများခေတ္တနားခိုရာဇရပ်မှာသွားပြီး ဒါနပြုရင်း ရလာတဲ့လက်ဆောင်ပန်းများကိုလိုက်ရောင်းရင်းနဲ့ပဲ။ ကုန်သွယ်ဖို့ရန် အသပြာရှစ်ကျပ်ထိအောင်ရလာတာပေါ့။
နောက်ပြီး တစ်နေ့လေပြင်းကျတော့ မင်းကြီးရဲ့ဥယျာဉ်ထဲကသစ်ကိုင်းတွေကျိုးကျကုန်တာပေါ့ ဒီတင်အခွင့်လမ်းကိုရှာနေတဲ့ထိုဆင်းရဲသားလေးက ဥယျာဉ်မှူးထံသွားပြီး ထိုသစ်ကိုင်းကျိုးတွေကို ထင်းစိုက်ဖို့ပေးမယ်ဆိုရင် ဥယျာဉ်ကိုကူရှင်းလင်းပေးမယ်လို့ ကမ်းလှမ်းပြန်ပါတယ်။
ဥယျာဉ်မှူးကလည်း သူအရှင်းရသက်သာတော့သူ့ကိုရှင်းလင်းဖို့အားလုံးလွှဲလိုက်တော့တာပေါ့။
ဒီတင်အကြံပိုင်တဲ့စီးပွားရေးသမားပီပီ ဥယျာဉ်ထဲမှာကစားနေကြတဲ့ ကလေးငယ်တွေကိုမုန့်ပဲသွားရည်စာတွေဝယ်ကျွေးပြီး ကလေးငယ်များကိုဝိုင်းဝန်းရှင်းလင်းစေပြီး ဥယျာဉ်တံခါးဝမှာ သစ်ကိုင်းများကိုစုပုံထားလိုက်စေပါတယ်။ပြီးမှ အိုးဖုတ်သမားထံသွားပြီး ထင်းအလိုရှိပါက ရောင်းရန်ရှိကြောင်းပြောဆိုကာ ထိုဥယျာဉ်ပေါက်မှထင်းပုံကြီးကို အသပြာ(၁၆)ကျပ်နှင့်ရောင်းလိုက်ရပြီး အိုးထိန်းသည်ထံမှ အိုးကြီးငါးလုံးကိုပါအပိုလက်ဆောင်အဖြစ် ရရှိခဲ့ပြန်ပါတယ်။ဤနည်းဖြင့်ပင် အသပြာ(၂၄)ကျပ်ထိစုဆောင်းမိလာတယ်။
တစ်ဖန် အိုးထိမ်းသည်ထံမှရလာသော အိုးကြီးများထဲတွင် သောက်ရေများထည့်ကာ
မြက်ရိတ်ရောင်းကြသူ မြက်ထမ်းသမားငါးရာတို့ထံသို့သွားကာ ရှေးနည်းအတူရေချမ်းဒကာလုပ်ပြန်တယ်။ မြက်ရိတ်သမားတို့လည်း
ရေငတ်နေစဉ် ရေလာတိုက်ဖော်ရသောသူ့ကို "အကူအညီလိုတဲ့အခါပြောပါတတ်နိုင်သမျှကူညီလုပ်ကိုင်ပေးပါ့မယ်"ဟု ပြောဆိုကာ ခင်မင်ရင်းနှီးနေကြပါတော့တယ်။ ဤနည်းဖြင့်ပင် ရေလုပ်သားများ။ ကောက်စိုက်လယ်ထွန်စသော လယ်ယာလုပ်သူများအားလုံးနှင့်ပါ ခင်မင်ရင်းနှီးလာပြီး မိတ်ဆွေအပေါင်းအသင်းကဏ္ဍလည်း အလျှင်မြန် ကြီးထွားလာပါတယ်။
မကြာမီ ကုန်သွယ်လယ်လုပ်သူများထံမှ မြင်ကုန်သည်ငါးရာ မြင်းရောင်းလာကြမည့်အကြောင်း သတင်းကြားသောအခါ ရေချမ်းတကာအားပြောပြကြပြန်ရာ ထိုအကြောင်းသိသည်နှင့် သူရေချမ်းဒါနပြုစဉ်က အကူညီပြန်ပေးလိုပါသည်ဟုပြောခဲ့ဖူးသော မြက်ရိတ်သမားငါးရာတို့ထံသွားကာ တစ်ယောက်တစ်ထုံးစီမြက်ထုံးများ
လက်ဆောင်ပေးကြစေလိုကြောင်းပြောရာ မြက်ရိတ်သမားများကကြည်ကြည်ဖြူဖြူပင် မြက်တစ်ထုံးစီ ရိတ်ပေးလိုက်ကြပါတယ်။
တဖန် သူက "သူငယ်ချင်းတို့ မနက်ဖြန်မြင်းကုန်သယ်ငါးရာတို့မြက်လာဝယ်ရင် ကျွန်ုပ်မရောင်းပဲမရောင်းကြပါနှင့် အားလုံးငါ၏အိမ်မှာသာမြက်ထုံးများကိုစုပုံထားကြပါ မြက်များဈေးကောင်းရအောင် ကြံဆောင်ပေးမယ်"ဆိုကာ လက်ဝါးရိုက်ထားလိုက်တယ်။
မြင်းကုန်သည်များရောက်လာကြသောအခါ အရင်အခေါက်များလို မြက်များကိုအလွယ်တကူဝယ်ယူလို့မရတော့ပဲ ထိုရေချမ်းတကာထံမှပင် မြက်ထုံးတစ်ထောင်ကို အသပြာတစ်ထောင်ဖြင့် ၀ယ်ယူကြရပါတော့တယ်။ ထို့ကြောင့် မြင်းကုန်သည်များထံမှလည်း အရင်းတစ်ပြားမှမစိုက်လိုက်ရပဲ အသပြာငါးရာ ရရှိခဲ့ပြန်ပါတယ်။
နောက်ရက်များမကြာမီပင် ရေလုပ်သားများထံမှ ကုန်သွယ်လှေသင်္ဘောကြီးတစ်စီး ဆိုက်ကပ်လာတော့မည်ဖြစ်ကြောင်း သတင်းရလိုက်ပြန်ရာ အသပြာရှစ်ကျပ်မျှပေးပြီး ရထားလုံးနှင့် သူဋ္ဌေးသူကြွယ်အဆောင်အယောင်တို့ကိုငှားရမ်းကာ များစွာသောအခြံအရံတို့ဖြင့် ဆိပ်ကမ်းသို့သွား၍ သူဋ္ဌေးကြီးတစ်ဥိးအသွင်ဖြင့် လှေသူကြီးနှင့်ဆွေးနွေးဈေးစကားပြောဆိုကာ ကုန်ရောင်းကုန်ဝယ်စာချုပ်ကြိုတင်ချုပ်ထားလိုက်တယ်။
နောက် လှေကြီးနှင့်မလှမ်းမကမ်းမှာ ရုံးခန်းဖွင့်လိုက်ပြီး အဝေးမှသီတင်းကြား၍ ကုန်စည်များဝယ်ယူဖို့ရန်ရောက်လာကြသော ကုန်သည်များအား "ကုန်သည်ကြီးတစ်ဦးထဲမှအားလုံးစာချုပ်ဝယ်ယူပြီးဖြစ်ကြောင်းနှင့်ထပ်မံဝယ်ယူလိုပါက ထိုကုန်သည်ကြီးနှင့်ဆွေးနွေးပါ"
ဟုပြောဆိုကြစေပြီး သူ့ထံမှ တဆင့်ဝယ်ယူကြသူများကိုလည်း တစ်ရာတန်ပစ္စည်းများကို တစ်ထောင်မျှဈေးခေါ်ကာ ပြန်လည်ရောင်းချလိုက်ပါတယ်။
ယင်းသို့အမြတ်စွန်းများများဖြင့်ကုန်စည်များကိုရောင်းချလိုက်ပြီး ရလာသောအမြတ်အစွန်းငွေများဖြင့်ပင် ထိုကုန်များတင်လာသော သင်္ဘောကြီးကိုဈေးဖြတ် ၀ယ်ယူလိုက်ပြန်ရာ တစ်ပြားမှမကုန်ပဲကုန်တင်လှေသင်္ဘောကြီးကိုပါ ပိုင်ဆိုင်ခွင့်ရသွားပြန်ပါတယ်။ ထိုသင်္ဘောကြီးကိုပါ တဆင့်ပြန်ရောင်းလိုက်ပြန်ရာ ထိုမြစ်ကမ်း၌ပင် နေ့ချင်းညချင်း အသပြာနှစ်သိန်းမျှစုသွားပါသတဲ့။
ဆင်းရဲသားနင်းပြားဘ၀မှ သူဋ္ဌေးဖြစ်လာသောအခါ မိမိအားကြွက်သေတစ်ခုအရင်းပြုကာ သူဋ္ဌေးဖြစ်ကြောင်းနည်းလမ်းကောင်းကိုမြွက်ကြားခဲ့သူပုရောဟိတ်ကြီးကျေးဇူးအား သွားရောက်
ပူဇော်မည်ဟု စဉ်းစားမိကာ အသပြာတစ်သိန်းအားထိုပုရောဟိတ်ကြီးအားသွားရောက်ကန်တော့၍ လေးလတာမျှအတွင်း၌ပင် အသပြာနှစ်သိန်းရအောင်ရှာဖွေနိုင်ခဲ့ကြောင်းပြောပြရာမှ သဘောကျသွားပြီး ထိုဆင်းရဲသားဘ၀မှဖြစ်လာသော စီးပွားရေးပညာရှင် သူဋ္ဌေးပေါက်စလေးအား ချောမောလှပလှသော တစ်ဦးတည်းသောသမီးကလေးနှင့် လက်ထပ်ထိမ်းမြားပေးလိုက်ပါတော့တယ်။ ဒီလိုကျိုးစားရင်းနဲ့ပဲ ဆင်းရဲသားလေးဘ၀ကနေ ကမ္ဘာကျော်သူဋ္ဌေးတစ်ဥိးဖြစ်သွားတော့တာပေါ့။
ယင်းအဖြစ်ပျက်လေးမှာ ဘုရားအလောင်းတော်ပါရမီဖြည့်စဉ်ကာလ တစ်ခုသောအချိန်ကဖြစ်ခဲ့ငြားသော်လည်း ယနေ့ထက်တိုင် “ကြွက်သေတစ်ခုအရင်းပြု” ဟူသောစကားပုံလေးကိုကား ယနေ့ထက်တိုင် ပြောဆိုသုံးဆွဲနေကြဆဲပင်မဟုတ်ပါလား။
နင်းပြားဘ၀မှနေ၍ သူဋ္ဌေးသမက်ဖြစ်အောင်ကြိုးစားအားထုတ်နိုင်ခဲ့သူကိုလည်း လောကီရေးရာမှာ အတ္ထကုသလ-အကျိုးစီးပွား၌ ကျွမ်းကျင်လိမ္မာသူလို့ဆိုရမယ်ထင်ပါတယ်။
စာရှုသူသူငယ်ချင်းများလည်း စူဠသေဋ္ဌိဇာတ်လာ ချမ်းသာနိဿျည်းကိုနည်းမှီကာ မိမိအလိုရှိအပ်တောင်းတအပ်သည့်အကျိုးစည်းပွားများ ကြိုးစာအားထုတ်နိုင်ကြပါစေကြောင်း ဆန္ဒပြုလိုက်ရပါတယ်။
(ကရဏီယမတ္ထကုသလ-အကျိုးစီးပွား၌ ကျွမ်းကျင်လိမ္မာသူ
နောက်တစ်ဦးအကြောင်းကိုလည်း နောက်ပို့စ်မှာ ဆက်လက်တင်ပြပေးပါဦးမယ်)
(လင်္ကာအရှင်-မုံရွာ)
No comments:
Post a Comment