ဘာ့ကြောင့်အမှန်တရားကိုလက်ခံဖို့ ၀န်လေးနေကြပါလိမ့် ????

                                     *မဟာပဒေသ(၄)ပါး*
     ကျွန်ုပ်တို့ရှင်တော်မြတ်ဘုရားသည် သာသနာ၌ဖြစ်ပေါ်လာလတံ့သော ဘုရားမဟောကြားပဲဘုရားရှင်ကဟောကြားသယောင် လီဆယ်၍ဟောကြားပြသကြမည့်အရေးကိုမြင်တော်မူ၍ အမှားအမှန်ခွဲခြားဝေဖန်ကာ အမှန်ကိုသာလက်ခံပြီး အမှားကိုပယ်နိုင်ကြစေရန် မဟာပရိနိဗ္ဗာနသုတ်တော်မှ မဟာပဒေသ(၄)ပါးကို ဟောကြားထားတော်မူခဲ့ပေသည်။
    ယနေ့မျက်မှောက်ခောတ်ကာလကား ဂိုဏ်းဂဏများစွာပေါ်ထွန်းလာက မိမိတို့အယူအဆများကိုလည်း သာသနာအတွင်းသွတ်သွင်းကြကုန်လျှက် ဤသည်ကား ပါဠိတော်အရဖြစ်ပါတယ် ၊ဤသည်ကားဘုရားဟောဖြစ်ပါတယ်ဟု ဘုရားရှင်အားအကာအကွယ်ယူကာ ဟောပြောလာကြလေသည်။
     ကျွန်ုပ်တို့ဘုရားသားတော် ရဟန်းတော်များသည် ပရိယတ်များကိုမပျောက်ပျက်အောင် သင်ယူမှတ်သားထားကြသည့်အားလျော်စွာ ဘုရားရှင် နည်းလမ်းပြသ သင်ကြားပေးတော်မူခဲ့သည့် မဟာပဒေသ(၄)ပါးအတိုင်း သုတ်/၀ိနည်း/အဘိဓမ္မာတို့နှင့် နှီးနှောက်တိုက်ဆိုင်ကြည့်သော် ယင်းဓမ္မများမှန်ကန်တိကျနေပါက သာသနာစည်ပင်တို့ပွားကြောင်းသာဖြစ်၍ ၀မ်းမြောက်ဝမ်းသာ သာဓုခေါ်မည်သာဖြစ်ပေ၏ ၊အကယ်၍ ဘုရားဟောကြားတော်မူသည်နှင့် ကွဲလွဲချွတ်ချော်မှုရှိခဲ့သော် အဆုံးစွန်ဆုံး တိပိဋက ဓမ္မဘဏ္ဍာဂါရိက ဆရာတော်ကြီးဟောကြားသည်ပင်ဖြစ်စေကာမူ ဘုရားဟောဟု ဆိုပါက ဘုရားဟောမဟုတ်ကြောင်း၊ အဋ္ဌကထာ၌လာသည်ဟု ဆိုပါကလည်း အဋ္ဌကထာ၌ ဖွင့်ဆိုမထားကြောင်း အဟုတ်ကိုအဟုတ်အတိုင်း အမှန်ကိုအမှန်အတိုင်း မိမိတို့ဗုဒ္ဓဘာသာဝင်များ အမှန်အတိုင်းသိရှိကြစေရန် ထုတ်ဖော်ပြောဆိုကြရမည်မှာ  သာသနာကပေးအပ်ထားတဲ့ တာဝန်တစ်ရပ်သာဖြစ်ပေသည်။
    သို့သော် ယနေ့အချိန်အခါ၌ ကျွန်ုပ်တို့သည် ဘုရားရှင်၏အလိုတော်အားလျော်စွာ မှားယွင်းချွတ်ချော်စွာဟောပြောပြသမှုများကို ထုတ်ဖော်ပြောဆိုရာ၌ “ကျော်ကြားထင်ရှားသော ဆရာတော်ကို မနာလို၍ လိုက်လံအပြစ်ရှာသည် ၊ စိတ်ယုတ်မာနှင့်လူအများကိုသိစေသည်။ သာသနာညှိးနွမ်းကြောင်းဖြစ်သည် ၊ ဤအရှင်ကဲ့သို့ သင်ကော ဘာကိစ္စများလောကအတွက် နိုင်ငံအတွက်ဆောင်ရွက်ပေးခဲ့ပါပြီနည်း ” စသည် စသည် ၀မ်းနည်းဖွယ်စကားသံများသာကြားနေရပေပြီး။ အများအားဖြင့် သြော် ဘုရားရှင်၏သာသနာတော်ကို သန့်ရှင်းစင်ကြယ်အောင် ကြိုးပမ်းပေးနေကြပါလား ၊သာသနာအဓွန့်ရှည်ဖို့အတွက် ယင်းကဲ့သို့စစ်ဆေးတိုက်ဆိုင်မှုများ အမှန်တကယ်လိုအပ်ပါလား စသည်ဖြင့် ၀မ်းမြောက်သာဓုခေါ်သူများကား အလွန်ရှားပါးလှသည်ကိုလည်း ကိုယ်တွေ့ကြုံရပေသည်။
    ကျွန်ုသည် အခြေနေအမှန်ကိုသဘောပေါက်သွားသောအခါ အလွန်ပင်စိတ်မကောင်းဖြစ်ရပေ၏ ၊ ကျွန်ုပ်တစ်စုံတစ်ရာအမှားယွင်းလုပ်မိ၍ကားမဟုတ်ပေ။ သာသနာကို မိမိအတွက်အမြတ်ထွက်ရုံသာချည်းကပ်လုပ်ကိုင် အသုံးချကြပြီ မိမိတို့လုပ်ဆောင်ချက်သည် သာသနာ့အဆုံးမနှင့်ဘောင်မ၀င်သောအခါ သာသနာ့အဆုံးအမများကိုသာပစ်ပယ်ရန်ကြိုးစားလာကြသည်ကိုတွေ့မြင်ရ၍ သာသနာအတွက်ရတက်မအေးရသောကြောင့်ပေတည်း ။

      ဘုရားရှင်ပရိနိဗ္ဗာန်ပြုတော်မူပြီဟု ကြားလျှင်ကြားချင်းပင် သုဘဒ္ဒရဟန်းအိုကြီးသည် ချက်ချင်းထကာ လက်ခမောင်းခတ်ပြီး ငါရှင်တို့ ယနေ့ကစပြီး လုပ်ချင်တာသာလုပ်ကြပေတော့ “ရဟန်းကြီးဂေါတမရှိစဉ်က ဟိုဟာအပ်သည် ဟိုဟာမအပ်ဘူး ။ဒီဟာအပြစ်ရှိသည် ဒီဟာအပြစ်မရှိဘူးနှင့် ချုပ်ချယ်မှုများစွာနှင့်နေခဲ့ရပြီး ယခုတော့လွပ်လပ်ပြီ  ဂေါတမမရှိတော့ခြင်းအပေါ် ဘာမှဝမ်းနည်းစရာမရှိပေ”စသည်စသည် ပြောဆိုနေသည်ကို အရှင်မဟာကဿပမထေရ်ကြီးကြားတော်မူတော် သံဂေဂကြီးစွာဖြစ်ခဲ့ရလေသည် ထို့ကြောင့်-

     ''ဟန္ဒ မယံ၊ အာဝုသော၊ ဓမ္မဉ္စ ဝိနယဉ္စ သင်္ဂါယေယျာမ။ ပုရေ အဓမ္မော ဒိပ္ပတိ၊ ဓမ္မော ပဋိဗာဟိယျတိ၊ အဝိနယော ဒိပ္ပတိ၊ ဝိနယော ပဋိဗာဟိယျတိ။ ပုရေ အဓမ္မဝါဒိနော ဗလဝန္တော ဟောန္တိ၊ ဓမ္မဝါဒိနော ဒုဗ္ဗလာ ဟောန္တိ၊ အဝိနယဝါဒိနော ဗလဝန္တော ဟောန္တိ၊ ဝိနယဝါဒိနော ဒုဗ္ဗလာ ဟောန္တီ''တိ (စူဠဝ၊ ၄၃၇)။

      “ငါ့ရှင်တို့ မသူတော်တရားတွေ မထွန်းပသေးမီ ဓမ္မကိုမနှောင့်ရှက် မတားမြစ်ကြသေးမီ ။ ဘုရားအဆုံးအမမဟုတ်တဲ့ အ၀ိနယများ အားမကောင်းမီ ။ဝိနည်းတော်ကို မနှောက်ယှက်မဖျက်စီး မတားမြစ်ကြသေးမီ ။ အဓမ္မ၀ါဒီတွေ အားမကောင်းသေးမီ သူတော်ကောင်းများ အင်အားမနည်းသေးမီ ဘုရားရှင်ဟောကြားထားတော်မူခဲ့တဲ့ တရားဓမ္မများကိုသာ သေချာကျနစိစစ်ရွေးချယ်ကာ သံဃာယနာတင်ကြပါစို့”ဟုဆိုကာ  ပထမသံဃာယနာတင်ခဲ့ကြရလေသည်။
………………………………………………

      ကျွန်ုပ်၏ ရေးသားချက်များအပေါ်မှာ မည်သို့ပင် ဝေဖန်ပုတ်ခတ်စေ ကျွန်ုပ်သည်အရေးတယူလုပ်နေမည်မဟုတ်ပဲ မိမိခံယူချက်အတိုင်းသာ ဆက်လက်ရပ်တည်သွားမည်ဖြစ်ပြီး ။ဓမ္မ၀ိနယနှင့်အညီ အမှန်အမှားကိုထောက်ပြကာ ဝေဖန်စောကြောလာမည့် ဓမ္မ၀ါဒီသူတော်စဉ်တို့၏စကားကိုသာ နားစွင့်နေမည်ဖြစ်။ ၊ ကျွန်ုပ်ရေးသားတင်ပြချက်ကိုသာလက်ခံရမည်ဟုလည်း မည်သည့်အခါမှပြောဆိုလိမ့်မည်မဟုတ်ပေ ၊ (ဒါကရှင်းပါသည် )ဘုရားရှင်ကိုယ်တော်တိုင်က “ပိဋကတ်တော်ကလာတာပါလို့ ကျမ်းကိုးကျမ်းကားနှင့် ပြောဆိုနေရင်တောင်မှ ဟုတ်မဟုတ်မှန်မမှန် သုံးသပ်ဝေဖန်ပါဦး”ဟု မဟာပဒေသလေးပါးမှာ အတိအလင်းဟောကြားထားတော်မူခဲ့သည့်အတွက် ဟုတ်မဟုတ်မှန်မမှန်ကိုတော့ မိမိတို့ညာဏ်နှင့်သာ ဆုံးဖြတ်ခံယူကြဖို့လိုပေလိမ့်မည် ။
    ယခုကျွန်ုပ်တင်ပြပေးမည် မဟာပဒေသလေးပါးကို လေ့လာကြည့်ကြစေချင်ပါသည် ။မိမိတို့ဖတ်ရှုလေ့လာပြီးချိန်မှာ ဘုရားရှင်ရဲ့ အနာဂတ်သာသနာ့အပေါ်မှာ မည်သို့မည်ပုံကာကွယ်စောင့်ရှောက်ကြရမည်ဟူသော နည်းလမ်းညွှန်ပြချက်ကို တွေ့မြင်ကြနိုင်လိမ့်မည်ဟု မျှော်လင့်မိပေ၏။
……………………………………………………………………………………………….

                                      *မဟာပဒေသ(၄)ပါး*   

         မြတ်စွာဘုရားသည် များစွာသော ရဟန်းသံဃာနှင့်အတူ ဘောဂမြို့သို့ ကြွရောက်တော်မူ၏။
မြတ်စွာဘုရားသည် ထိုဘောဂမြို့ အာနန္ဒစေတီ၌ နေတော်မူ၏။ ထိုအာနန္ဒစေတီ၌ (နေတော်မူစဉ်) မြတ်စွာဘုရားသည်

        ''ရဟန်းတို့ မဟာပဒေသလေးပါး၁တို့ကို ဟောကြားအံ့၊ ထိုမဟာပဒေသတရားကို နာကုန်လော့၊ ကောင်းစွာ နှလုံးသွင်းကုန်လော့၊ ဟောပေအံ့''ဟု ရဟန်းတို့အား မိန့်တော်မူ၏။
''အသျှင်ဘုရား ကောင်းပါပြီ''ဟု ထိုရဟန်းတို့သည် မြတ်စွာဘုရားအား ဝန်ခံကုန်၏၊ မြတ်စွာဘုရားသည် ဤစကားတို့ကို မိန့်တော်မူ၏-

         ရဟန်းတို့ ဤ (သာသနာတော်) ၌ (တစ်စုံတစ်ယောက်သော) ရဟန်းသည် ဤသို့ ပြောဆိုငြားအံ့-
''ငါ့သျှင်တို့ ငါသည် ဤတရားကို မြတ်စွာဘုရား မျက်မှောက်တော်မှ ကြားနာခဲ့ရပါ၏၊ ခံယူခဲ့ရ ပါ၏၊ ဤကား တရားတော်ပါတည်း၊ ဤကား ဝိနည်းတော်ပါတည်း၊ ဤကား ဘုရားသျှင့် အဆုံးအမတော်ပါတည်း''ဟု (ပြောဆိုငြားအံ့)။
        ရဟန်းတို့ ထိုရဟန်း၏ စကားကို လက်လည်း မခံအပ်သေး၊ ပယ်လည်း မပယ်အပ်သေး၊ လက်လည်းမခံ ပယ်လည်းမပယ်သေးဘဲ ထို (ပြောဆိုသော) ပုဒ်ဗျည်းတို့ကို ကောင်းစွာ မှတ်သား၍ သုတ်တရားတော်၌ သွင်းကြည့်အပ်ကုန်၏၊ ဝိနည်းတော်၌ နှီးနှောကြည့်အပ်ကုန်၏။
       (ဤသို့) သုတ်တရားတော်၌ သွင်းကြည့်လျက် ဝိနည်းတော်၌ နှီးနှောကြည့်သည်ရှိသော် ထို (ပုဒ် ဗျည်း) တို့သည် သုတ်တရားတော်၌လည်း မသက်ဝင်ကုန်ငြားအံ့၊ ဝိနည်းတော်၌လည်း မနှီးနှောမိကုန်ငြားအံ့၊ (သို့ဖြစ်လျှင်) ''ဤစကားသည် ထိုမြတ်စွာဘုရား၏ စကားတော် စင်စစ်မဟုတ်ချေ၊ ဤရဟန်း၏ မှားယွင်းစွာ သင်ယူထားသော စကားသာ ဖြစ်ချေသည်''ဟု ဤအရာ၌ ဆုံးဖြတ်ကြရမည်။ ရဟန်းတို့ ဤသို့ (ဆုံးဖြတ်၍) ထိုစကားကို ပယ်ကြလေ။
      (သို့မဟုတ်) သုတ်တရားတော်၌ သွင်းကြည့်လျက် ဝိနည်းတော်၌ နှီးနှောကြည့်သည်ရှိသော် ထို (ပုဒ် ဗျည်း) တို့သည် သုတ်တရားတော်၌လည်း သက်ဝင်ကုန်ငြားအံ့၊ ဝိနည်းတော်၌လည်း နှီးနှောမိကုန်ငြားအံ့၊ (သို့ဖြစ်လျှင်) ''ဤစကားသည် ထိုမြတ်စွာဘုရား၏ စကားတော် စင်စစ် ဖြစ်ပေသည်၊ ဤရဟန်း၏ ကောင်းစွာ သင်ယူထားသော စကားလည်း ဖြစ်ပေသည်''ဟု ဤအရာ၌ ဆုံးဖြတ်ကြရမည်။ ရဟန်းတို့ ရှေးဦးစွာ ဤမဟာပဒေသကို မှတ်ထားကြကုန်လော့။ (၁)

       ရဟန်းတို့ ထို့ပြင် ဤ (သာသနာတော်) ၌ (တစ်စုံတစ်ယောက်သော) ရဟန်းသည် ဤသို့ ပြောဆိုငြားအံ့-
''ဤမည်သော ကျောင်း၌ အကြီးအမှူးမထေရ်နှင့် တကွသော သံဃာသည် နေလျက် ရှိ၏၊ ငါသည်ထိုသံဃာ၏ မျက်မှောက်မှ ကြားနာခဲ့ရပါ၏၊ သင်ယူခဲ့ရပါ၏၊ ဤကား တရားတော်ပါတည်း၊ ဤကားဝိနည်းတော်ပါတည်း၊ ဤကား ဘုရားသျှင့် အဆုံးအမတော်ပါတည်း''ဟု (ပြောဆို ငြားအံ့)။
      ရဟန်းတို့ ထိုရဟန်း၏ စကားကို လက်လည်း မခံအပ်သေး၊ ပယ်လည်း မပယ်အပ်သေး၊ လက်လည်း မခံ ပယ်လည်း မပယ်မူ၍ ထို (ပြောဆိုသော) ပုဒ်ဗျည်းတို့ကို ကောင်းစွာ မှတ်သား၍ သုတ်တရားတော်၌ သွင်းကြည့်အပ်ကုန်၏၊ ဝိနည်းတော်၌ နှီးနှောကြည့်အပ်ကုန်၏။
(ဤသို့) သုတ်တရားတော်၌ သွင်းကြည့်လျက် ဝိနည်းတော်၌ နှီးနှောကြည့်သည်ရှိသော် ထို (ပုဒ်ဗျည်း) တို့သည် သုတ်တရားတော်၌လည်း မသက်ဝင်ကုန်ငြားအံ့၊ ဝိနည်းတော်၌လည်း မနှီးနှောမိကုန်ငြားအံ့၊ (သို့ဖြစ်လျှင်) ''ဤစကားသည် ထိုမြတ်စွာဘုရား၏ စကားတော် စင်စစ်မဟုတ်ချေ၊ ထိုသံဃာ၏မှားယွင်းစွာ သင်ယူထားသော စကားသာ ဖြစ်ချေသည်''ဟု ဤအရာ၌ ဆုံးဖြတ်ကြရမည်။ ရဟန်းတို့ဤသို့ (ဆုံးဖြတ်၍) ထိုစကားကို ပယ်ကြလေ။
        (သို့မဟုတ်) သုတ်တရားတော်၌ သွင်းကြည့်လျက် ဝိနည်းတော်၌ နှီးနှောကြည့်သည်ရှိသော် ထို (ပုဒ် ဗျည်း) တို့သည် သုတ်တရားတော်၌လည်း သက်ဝင်ကုန်ငြားအံ့၊ ဝိနည်းတော်၌လည်း နှီးနှောမိကုန်ငြားအံ့၊ (သို့ဖြစ်လျှင်) ''ဤစကားသည် ထိုမြတ်စွာဘုရား၏ စကားတော် စင်စစ် ဖြစ်ပေသည်။ ထိုသံဃာ၏ ကောင်းစွာ သင်ယူထားသော စကားလည်း ဖြစ်ပေသည်''ဟု ဤအရာ၌ ဆုံးဖြတ်ကြရမည်။ ရဟန်းတို့ နှစ်ခုမြောက်သော ဤမဟာပဒေသကို မှတ်ထားကြကုန်လော့ ။ (၂)

       ရဟန်းတို့ ထို့ပြင် ဤ (သာသနာတော်) ၌ (တစ်စုံတစ်ယောက်သော) ရဟန်းသည် ဤသို့ ပြောဆိုငြားအံ့-
''ဤမည်သော ကျောင်း၌ အကြားအမြင်များကုန်သော ပါဠိတော်ကို နှုတ်ငုံဆောင်ကုန်သော တရားတော် ဝိနည်းတော်ကို ဆောင်ကုန်သော ပါတိမောက်ကို ဆောင်ကုန်သော များစွာသော မထေရ်ရဟန်းတို့သည် နေလျက်ရှိကုန်၏၊ ငါသည် ထိုမထေရ်တို့၏ မျက်မှောက်မှ ကြားနာခဲ့ရပါ၏၊ ခံယူခဲ့ရပါ၏၊ ဤကား တရားတော်ပါတည်း၊ ဤကား ဝိနည်းတော်ပါတည်း၊ ဤကား ဘုရားသျှင့်အဆုံးအမတော်ပါတည်း''ဟု (ပြောဆိုငြားအံ့)။
         ရဟန်းတို့ ထိုရဟန်း၏ စကားကို လက်လည်း မခံအပ်သေး။ပ။ ဝိနည်း၌လည်း မနှီးနှောမိကုန်ငြားအံ့၊ (သို့ဖြစ်လျှင်) ''ဤစကားသည် ထိုမြတ်စွာဘုရား၏ စကားတော် စင်စစ်မဟုတ်ချေ၊ ထိုမထေရ်တို့၏ မှားယွင်းစွာ သင်ယူထားသော စကားသာ ဖြစ်ချေသည်''ဟု ဤအရာ၌ ဆုံးဖြတ်ကြရမည်၊ ရဟန်းတို့ ဤသို့ (ဆုံးဖြတ်၍) ထိုစကားကို ပယ်ကြလေ။
      (သို့မဟုတ်) သုတ်တရားတော်၌ သွင်းကြည့်လျက်။ပ။ ထို (ပုဒ်ဗျည်း) တို့သည် ဝိနည်းတော်၌ လည်းနှီးနှောမိကုန်ငြားအံ့၊ ''ဤစကားသည် ထိုမြတ်စွာဘုရား၏ စကားတော် စင်စစ်ဖြစ်ပေသည်၊ ထိုမထေရ်တို့၏ ကောင်းစွာ သင်ယူထားသော စကားလည်း ဖြစ်ပေသည်''ဟု ဤအရာ၌ ဆုံးဖြတ်ကြရမည်။ ရဟန်းတို့ သုံးခုမြောက်သော ဤမဟာပဒေသကို မှတ်ထားကြကုန်လော့ ။ (၃)
      ရဟန်းတို့ ထို့ပြင် ဤ (သာသနာတော်) ၌ (တစ်စုံတစ်ယောက်သော) ရဟန်းသည် ဤသို့ ပြောဆိုငြားအံ့ -
''ဤမည်သော ကျောင်း၌ အကြားအမြင်များသော ပါဠိတော်ကို နှုတ်ငုံဆောင်သော တရားတော်ဝိနည်းတော်ကို ဆောင်သော ပါတိမောက်ကို ဆောင်သော တစ်ဦးသော မထေရ်သည် နေလျက်ရှိ၏၊ ငါသည် ထိုမထေရ်၏ မျက်မှောက်မှ ကြားနာခဲ့ရပါ၏၊ ခံယူခဲ့ရပါ၏၊ ဤကား တရားတော်ပါတည်း၊့ ဤကား ဝိနည်းတော်ပါတည်း၊ ဤကား ဘုရားသျှင့် အဆုံးအမတော်ပါတည်း''ဟု (ပြောဆိုငြား အံ့)။
      ရဟန်းတို့ ထိုရဟန်း၏ စကားကို လက်လည်း မခံအပ်သေး၊ ပယ်လည်း မပယ်အပ်သေး၊ လက်လည်းမခံ ပယ်လည်းမပယ်မူ၍ ထို (ပြောဆိုသော) ပုဒ်ဗျည်းတို့ကို ကောင်းစွာ မှတ်သား၍ သုတ်တရားတော်၌ သွင်းကြည့်အပ်ကုန်၏၊ ဝိနည်းတော်၌ နှီးနှောကြည့်အပ်ကုန်၏။
    (ဤသို့) သုတ်တရားတော်၌ သွင်းကြည့်လျက် ဝိနည်းတော်၌ နှီးနှောကြည့်သည်ရှိသော် ထို (ပုဒ် ဗျည်း) တို့သည် သုတ်တရားတော်၌လည်း မသက်ဝင်ကုန်ငြားအံ့၊ ဝိနည်းတော်၌လည်း မနှီးနှောမိကုန်ငြားအံ့၊ (သို့ဖြစ်လျှင်) ''ဤစကားသည် ထိုမြတ်စွာဘုရား၏ စကားတော် စင်စစ်မဟုတ်ချေ၊ ထိုမထေရ်၏ မှားယွင်းစွာ သင်ယူထားသော စကားသာ ဖြစ်ချေသည်''ဟု ဤအရာ၌ ဆုံးဖြတ်ကြရမည်၊ ရဟန်းတို့ ဤသို့ (ဆုံးဖြတ်၍) ထိုစကားကို ပယ်ကြလေ။
     (သို့မဟုတ်) သုတ်တရားတော်၌ သွင်းကြည့်လျက် ဝိနည်းတော်၌ နှီးနှောကြည့်သည်ရှိသော် ထို (ပုဒ် ဗျည်း) တို့သည် သုတ်တရားတော်၌လည်း သက်ဝင်ကုန်ငြားအံ့၊ ဝိနည်းတော်၌လည်း နှီးနှောမိကုန်ငြားအံ့၊ (သို့ဖြစ်လျှင်) ''ဤစကားသည် ထိုမြတ်စွာဘုရား၏ စကားတော် စင်စစ် ဖြစ်ပေသည်၊ ထိုမထေရ်၏ ကောင်းစွာ သင်ယူထားသော စကားလည်း ဖြစ်ပေသည်''ဟု ဤအရာ၌ ဆုံးဖြတ်ကြရမည်။ ရဟန်းတို့ လေးခုမြောက်သော ဤမဟာပဒေသကို မှတ်ထားကြကုန်လော့ ။ (၄)
     ရဟန်းတို့ ဤမဟာပဒေသ လေးပါးတို့ကို မှတ်ထားကုန်လော့ဟု (မိန့်တော်မူ၏)။

မြတ်စွာဘုရားသည် ထိုဘောဂမြို့ အာနန္ဒစေတီ၌ နေတော်မူစဉ်လည်း ဤသို့သော တရားစကားကိုသာလျှင် ရဟန်းတို့အား အကြိမ်များစွာ ဟောတော်မူ၏၊ ''ဤကား သီလတည်း၊ ဤကား သမာဓိတည်း၊ ဤကား ပညာတည်း။ သီလ၌ တည်၍ ဖြစ်စေအပ်သော သမာဓိသည် များသော အကျိုးအာနိသင် ရှိ၏။ သမာဓိ၌ တည်၍ ဖြစ်စေအပ်သော ပညာသည် များသော အကျိုးအာနိသင် ရှိ၏။ပညာ၌ တည်၍ ဖြစ်စေအပ်သော စိတ်သည် ကာမာသဝ ဘဝါသဝ အဝိဇ္ဇာသဝဟူသော အာသဝေါတို့မှကောင်းစွာသာလျှင် လွတ်မြောက်၏''ဟု (ဟောတော်မူ၏)။
------
၁။ (ဂုဏ်ကြီးသူတို့ကို ကိုးကား၍ ပြောဆိုသော တရားစကားတို့ကို အမှားအမှန် ဝေဖန်ဆုံးဖြတ်ရန် နည်းညွှန် ဥပဒေသများဟု ဆိုလိုသည်။}                   
                                                          (မဟာပရိနိဗ္ဗာနသုတ် )
                                        by လင်္ကာ အရှင် on Monday, January 16, 2012 at 7:37am ·